أتركوني أفضفض حتى لاااااأنفجر

مرحباااا عزيزاتي أنا ضايقه بي الوسيعه وودي افضفض لكم اللي بصدري ....

.قبل اقول مشكلتي بعطيكم نبذه بسيطه عن علاقتي بزوجي انا متزوجه من 18سنه واكبر عيالي بنت بالثانوي
علاقتي بزوجي علاقه كانت مبنيه على الحب و الاحترام  والثقه
كلها ولله الحمد بااااااقيه ماعدا الحب تلااااشى من قلبي تجاهه بسب تصرفاته 😢
مشكلتي 😐 اللي متعبتني من زوجي .وجابت لي الكبت والامراض النفسيه
 زوجي عنده مبادئ في الحياة ماشي وممشينا عليها ومحسسني اني في معتقل او وحده عسكرية...؟
طبعا فرض عليناجدول للاكل وجدول للنوم وجدول للاعمال اليوميه يعني ماشين زي الساعة احس عقارب الساعة تدق في راسي

...يعني العيال لازم ينامون الساعة 9والعشاء لازم يكون بدري بعد اذان العشاء مباشره واذا قبله احسن..والعيال يفرض عليهم اشياء معينه زي ولدي فرض عليه شرب الحليب بالحلبه في الويك اند عشان يقوى عضمه ويدافع عن نفسه واخوانه اذا كبرو.
مع ان ولدي كاره للشئ هذا وله اكثر من خمس سنوات ..والى الآن وهو واره عشان يشربه والولد بس عشان ابوه ولاهو مايبيه ولايحبه...

والسهر ممنوع وياويله اللي ماينام في الوقت المحدد..حتى بناتي يقولون ليش صديقاتنا ينامون ويقومون في الوقت اللي يبون وحنا لأ؟؟

ونومه الظهر هذي ممنوعه عليهم الايوم توسطت لهم وسار يخليهم ينامون والساعة 4ونص وهم صاحين وياويلهم لو يطولون...

حتى انا ماسلمت منه لو سويت قهوه وحلى يسويلي سالفه انتي تبين تدمرين صحة العيال وماتهتمين فيهم ...كل يوم وانتي مسويه حلى !!!مع اني يمر علي الشهر مااسوي وداخليا ابي بس امنع نفسي عشانه عشان افتك من بربرته الزايده ومحاضراته..وياويلي بعد لو اعطيهم شكولاته او بسكوت ممنوعه من البيت الاتهرييييب...يقول انا اغذيهم واتعب عليهم وانتي تخربين اللي اسويه...اللي بسمع كلامه يقول اني فاتحه بقاله في البيت ....واني مااكلهم اكل مفيد
وحرمت نفسي من القهوه والحلى عشان تعليقاته...
حتى السهر كرهني فيه مع اني من عشاقه..
والعيال فرض عليهم انشطه ورياضات معينه ويجبرهم يحبونها...
حتى الاكل الصحي يفرضه عليهم مايحببهم فيه
لدرجه انهم ياكلونه بس قدامه واذا مو موجود ماياكلونه  ...
و من باب أني ماابي العيال يعصون ابوهم في غيابه اقول لازم تنفذون أوامر أبوكم عشان يحسون ان كلمتنا وحده....بس داخليا انا رافضه هذااااا كله
رافضه الطريقه والاسلوب مو رافضه مبداء النوم بدري والاكل الصحي .....مقهووووره احس انه  تدخل في اموري وتربيتي لعيالي همشني حطني نقطه على الشمال
احس انه اخذ دوري ...؟؟
وغير كذا طلبات المكتبه او العثيم او أي شئ لازم تكون جاهزه نهاية الاسبوع ومكتوبه في ورقه حقت اسبوع كاااامل يجيبها   ..وياويلي لو انسى اكتب شئ يسويلي محاضره لانه مايبي يروح مره ثانيه
يقول مره وحده اروح في الاسبوع بس...

مع انه بجنبنا بقاله توصل وقريبه اقدر اروح لها على رجولي او ولدي يروح يجيب منها .بس يقول لاابدااا البقاله مانطلب منها ولاتروحون لها...احسد جاراتي  اذا قالو لي انهم يروحون للبقاله او يوصون عيالهم يجيبون لهم منها...والله اني احيانا اشتهي اطلب شئ منها ايس كريم او بطاطس او ان شاء الله خبز
واحس انه مقيدني وحارمني
وكم مره طلبت وصادف انه جاء في نفس الوقت اللي جاء فيه راعي البقاله وسوالي سالفه وكبرها ...وقال اذا بغيتو شئ وصوني انا بجيب لكم ...احيانا انا مابيه يدري وش طالبه موب لازم كل شئ يدري عنه ....
السوق مااروح مع السواق ورافض فكرة انه يجيب سواق.... وياويلي لو كلمت البايع او خذيت منه الكيس وهو موجود معي...يفشلني في السوق
اكره اروح للسوق معه..احس شخصيتي صارت مهزوزه قدام بناتي وعيالي مع اني المفروض اكون منبع ثقه واعتزاز لهم


دايم احسه رقيب علينا ومعنا على طول حتى وهو برى احسه ممشي البيت زي ماهو يبي مو زي ماأنا ابي ...احس شخصيتي انمسحت واحس انو عندي خوف داخلي منه....
اضغط على نفسي واكتم ومااناقشه في اللي مضايقني لاني عارفه نفسي بارفع صوتي وهو بيسويلي محاضره ويفتح لي مواضيع مالها داعي....؟؟
انا شخصيه اجتماعيه واحب الناس وتصرفاته خلتني انطوائيه وانعزلت عن الناس
لي ثلاث سنوات وانا اعاني من ضغوط نفسيه سببت لي اكتئاب

تكلمت معه في الموضوع  وقلت انك انت اللي تأمر وتنهى وانا مالي دور قال انا الرجال وأنا لي القوامه
وانا أأمر وانتي عليك الطاعة
أبي آرائكم وردودكم كيف اتعامل مع هالإنسااااان
لاني بجد سرت اكررررهه واتمنى اني اعيش في بيت لحالي مع عيالي وأربيهم بالطريقة اللي تعجبني