Mrs Asma @mrs_asma

عضوة جديدة

أحتاج لحل مع زوجي..

بسم الله الرحمن الرحيم

السلام عليكم ورحمة الله وبركاته،،

من كثر حيرتي ما عرفت أشتكي لمين.. وآسفة إن كان الموضوع مو في مكانه لكن مو عارفة حتى أكتب فين..
متزوجة ودوبي كملت سنتين يوم الأحد اللي فات..
زوجي كان متزوج من قبل مرتين ومطلق..
أنا أصغر من زوجي بـ18 سنة وهو قريب الخمسين من عمره..

وزي أي وحدة متزوجة ومبسوطة والحمدلله على كل حال.. مو مقصرة معاه في حاجة وكل حاجة يبغاها أعملها له..
الحمدلله مو مقصرة حتى في نفسي، دايما مرتبة ومزبطة حالي لأني عارفة الرجال يحبوا زوجتهم مزبطة 24 ساعة.. الشغلة متعبة لكن إرضاء الزوج واجب علينا..

ما كملت سنة والأخ بدأت معاكساته.. بالصدفة لقيت في جواله صورة صدمتني جدا.. مو من باب اني فتشت جواله! لا..
هو ماله معرفة بالجوالات وطلب مني اسجله رقم لكن لما فتحت الجوال كان فيه رسالة مفتوحة مسبقا وهو كان داي من برا وناسي يقفلها..

صورة تخدش للحياء.. من غير ما ينتبه حفظت الرقم لانه كان سهل..
واجهته بيها قال الصورة من صاحبه وهما الرجال تصير بينهم حركات زي كدا.. قلت له عيب عليك وانت متزوج أصلا انك تقبل بيها أو تحفظها حتى.. وصارت مشادة انتهت لكن بدون اقتناع مني..

بالصدفة خرب جوالي وكان عنده جوال قديم قال خذيه مؤقتا..
الصدمة انه الرقم كان موجود بيه.. وكان تاريخه قديم قبل نتزوج..

دقيت عليه وكان صوت وحدة!!!

قلبي ما ارتاح.. لما طلع للصلاة شفت جواله وكان فيه 3 وسائط وفيها صورة البنت كاملة.. وصور لاجزاء من جسمها :(

صارت بيني وبينه زعلة وحلف وقسم انها هي اللي تتلزق فيه من زمان وهو ما يعرفها.. رحت لأهلي وما قلت لهم.. قلت أفكر.. كلمني وبكى عشان ارجع له وما اتركه..

اسبوعين ورجعت له..

ورجعت حليمة لعادتها القديمة ..

وحاليا مكالمات بالهبل لرقم شغالة أفريقية كانت تشتغل عندنا.. كلمتها وقلت لها ايش بينك وبين زوجي؟ قالت لا هو يسلم علينا وعلى أمي؟!!!!
وانا ايش دخلني بأمك!!!

كلمته قال شغلة لاخوها ومدري ايش وانا احاول اعمل فيهم خير..

انا مو مقتنعة

وعندي أدلة انه بيلعب عليا... لكن ماهي أدلة أقدر أوريها لاحد أو أواجهه بيها لانها محرجة ولو احد من برا عشان أثبت كلامي ما راح يقتنع وممكن هو يألف عليها حكاية :(

انا هادية الطبع وحساسة
ما انكر اني احبه بقوة ومترددة أكرهه ولا أأدبه لكن ما باليد حيلة :(
من ناحية تقصير هو اللي مقصر في العلاقة الخاصة وأنا اللي أجامل..
في المصروف من باب انه مضغوط حاليا.. وقلت يالله ربنا يفرجها الحمدلله مستورة في بيتي ومحد حاسس بيا
وفوق كدا استغفر الله،، ما يخلف وانا متحملة واستنى الفرج.. وحاليا ما أفكر أجيب أولاد منه وبلاها علاج..
أمي وابويا اللي عارفين عن حاله وقالوا ربك كريم ووعدهم بالعلاج..
الناس اللي برا العيلة فاكرة انه العيب مني ولا حبيت افضحه ولا احسسه انه ناقص
وفي حاجات استحي اقولها.. لكن انا تعبت منه ومو عارفة ايش اعمل

كل دا صابرة وساكتة

لكن ما اتحمل فكرة الخيانة
حتى لو بالتلفون.. اسمها خيانة

كيف اتصرف معاه؟
هل أقول لأهلي؟
لو قلت لهم ح يقولوا لي اتطلقي منه الكرامة فوق كل شي.. وانا عارفة دا الشي ولا يمكن انه اهلي ح يرضوا اني ارجع له..

كل ما يطلع من البيت اتنكد وأبكي ..
واقول لحالي غبية.. ايش الحب دا اللي مخليني اتحمل
لكن مالي خبرة في المواجهات ولا خبرة في الحياة الزوجية
أحتاج منكم النصح والمساعدة..

آسفة إذا كلامي مو مرتب.. أكتب وقلبي محروق وأعصابي تعبانة.. وبحاول اني اشبك لاحقا لكن عندي مشكلة بالنت

يلزم عليك تسجيل الدخول أولًا لكتابة تعليق.

تسجيل دخول

زهرة السندان • 14 سنة

عمره يقارب الخمسين؟؟؟؟الله يكون بعونك مايبيلك الا الصراحه وفهميه لو كررها انك بتطلقين وتتزوجين سيد سيده ..يعني اول نقول شباب وطايش والحين شايب ومراهق الحمدلله وشكر متى يعقلون هالرجال؟؟

اروى2222 • 14 سنة

الله يعينك حبيبتي عليك بالدعاء والاستغفار

ام الكتكوتين • 14 سنة

حسبي الله على كل رجال خاين الله لايوفقه وش يبي بعد

راوية الجزائرية • 14 سنة

غزال يمانيه • 14 سنة

الله يعينك ويصبرك

البنات ما بيقصروا معك

ان شاء الله تلاقين حل لهذه المشكله

بس خليك حازمه اكثر من كذا علشان يتادب وما يعيدها