أحتاج مساعدتكم

السلام عليكم
حابه أستشيركم في شي و اتمنى تحطون نفسكم مكاني و تعطوني نصيحة من عقلكم قبل قلبكم ..
انا متزوجه صار لي ٦ سنوات و دخلت في السابعة عمري ٣٠ سنه زوجي إنسان طيب و كريم و حنون و يحاول يلبي طلباتي اللي يقدر عليها دائماً و مو مقصر معي بالمصروف ودايماً يوقف جنبي لما أكون متضايقه يعني فيه ايجابيات كثيره و لكن عنده سلبيات متعبتني كثير أولها ان بداية الزواج كنت افتح جواله " اكبر خطأ سويته معه " و كنت اشوفه يتكلم مع بنات مو علاقات و حب و غرام لا اشوفه يسولف عادي و احيانا يقول لهم عن مشاكلي معاه وزعلت و صارت بيني و بينه مشاكل بسبب هذا الشي و ما ارتحت الا لما اخذت عهد على نفسي ما افتح جواله لكن هذا الشي مأثر فيني لحد الان و مازلت اشك فيه ..ثاني شي ان عنده مشاكل بالإنجاب و للاسف عالجنا مره و قالوا مافي أمل و وقف بعدها صار له ٣ سنوات بدون علاج صار عنده يأس كبير .. ثالث شي إنسان عصبي جداً جداً يعني لما يعصب يسب بالفاظ بذيئة حتى الام و الاب و يجرح كثيررررررر بالكلام احيانا يقول انتي شكلك أصلاً مو عاجبني و ما احبك و اللي خاطبها قبلك كنت ابيها بس للاسف الظروف كانت ضدنا و يقول ان حياتي معك تحصيل حاصل و انا مو مقتنع فيك و يهدد بالطلاق و يطردني و تقريباً ٤ مرات صار فيه ضرب لاني كنت اتجادل معه وقت مايكون معصب "لكن مو عذر انه يمد يده "و بعد ما يهدأ يعتذر و يندم و يقول لما أكون معصب ابعدي عني لاتكلميني و ادعي لي ان ربي يخفف عصبيتي و لما تصير مشكله و اروح عند أهلي تتعب نفسيته مره و يحاول يراضيني و يرجعني
طبعا مشاكلنا غالباً تصير قدام أهله لاني ساكنه في شقه عندهم و يسمعون كل الكلام اللي يقوله لي و هذا الشي مضايقني مره انا حالياً محتاره تعبت من التفكير هل اكمل معه بالرغم من سلبياته عدم قدرته على الإنجاب او انفصل و اشوف نصيبي انا نفسيتي تعبانه مره خاصة لما وصل عمري ٣٠ و انا بدون اطفال اتمنى تساعدوني💞