أحد يساعدتي في باترون قبعة ,,,,

للرفع

ماحبيت أطلع بدون ماأرد

وفقكِ الله

هنساعدك باذن الله
اذا كان عندك نفس الخيط ده يبقى اعملى تبع الشرح بالظبط اما اذا كان ارفع يبقى اعملى حسابك فى تزويد عدد الغرز او عدد السطور واذا كان اسمك يبقى طبعا هتقللى يا رب تجيبى خيط مناسب وتريحى راسك
شوفى يا ستى ابدئى بعدد من السلاسل وليكن 5 واغلقيهم بمنزلقه
اطلعى ب 3 سلسله واعملى داخل الدايره 9عمود واغلقى بمنزلقه فى اخر سلسله من سلالسل البدايه
(10 عمود)
اطلعى ب3 سلسله واعملى عمود فى نفس المكان ثم (عمود فى التاليه ثم 2 عمود فى التاليه)يكرر ما بين القوسين حتى نهاية السطر بمنزلقه فى اخر سلسله (15عمود)
اطلعى ب 3 سلسله واعملى عمود فى نفس المكان ثم (عمود فى التاليه ثم عمود فى التاليه ثم 2 عمود فى التاليه) كررى ثم اغلقى بمنزلقه
كررى السطر الاخير وشوفى بنظرك هيكون قرص القبعه مناسب ليكى وله لسه عاوز يكبر ان كان عاوز يكبر امشى على نفس الطريقه طبعا فهمتى ان كل سطر هتعمليه بيكون العمود الفردى زايد غرزه عن السطر اللى قبله يعنى فى اول سطر عملنا غرزتين فى كل غرزه السطر التانى عملنا غرزه ثم غرزتين فى التاليه والسطر التالت عملنا غرزه ثم غرزه ثم غرزتين وهكذا
ودى طريقه ثابته لعمل قرص اى قبعه
لعمل الغرزه الاساسيه فى القبعه هتعملى
بعد ما قفلتى اخر سطر وطلعتى ب 3 سلسله اعملى كمان 2 عمود فى نفس المكان ثم (اتركى غرزتين واعملى 3عمود فى نفس الغرزه) وكررى الى نهاية السطرواغلقى بمنزلقه فى اخر سلسله من سلسلة بداية السطر
اعملى منزلقه كمان ثم اعملى 3سلسله فى نفس المكان ثم 2عمود فى منتصف العمودين التالين وهكذا الى نهاية السطر

كررى نفس السطر الاخير4مرات كمان يعنى هتعملى من الغرزه دى 6 سطور وفى نهاية كل سطر متنسيش تغلقى بمنزلقه
ثم اعملى سلسله واحده واشتغلى سطر بغرزة الحشو فى كل غرزه ثم اشبكى بمنزلقه فى اول سلسله
اشبكى لون اخر مناسب وكررى السطر السابق

ثم اشبكى اللون الاساسى وكررى سطر الحشو
ثم اللون لاخر وكررى نفس السطر
ثم اللون الاساسى وكررى نفس السطر
ثم اللون الاخر وكررى نفس السطر
ثم باللون الاساسى اعملى الحافه كالتالى
بعد ان اغلقتى السطر الاخير اعملى 2 لسله ثم عمود فى نفس المكان مع ترك اخر لفه على الابره ثم عمود كمان بنفس الطرقه ثم اغرزى الابره فى تالت غرزه على السطر يعنى اتركى غرزتين على السطر واغرزى الابره ثم خرجى الخيط من كل اللفات على الابره ثم(اتركى غرزتين واعملى 3 عمود بترك اخر لفه على الابره من كل عمود ثم اشبكى بعد غرزتين واخرجى الخيط من كل اللفات) وهكذا الى نهاية السطر اغلقى بمنزلقه واقطعى الخيط
كده القبعه انتهت لعمل الوردات يمكنك عملها من احدى باترونات الورد او الاكسسوار والمنتدى ملئ بالطرق المصوره البسيطه اذا لم تتمكنى اطلبى وان شاء الله نعملهم معكى بس اعتقد انهم سهلين عليكى ان شاء الله الا اذا كانت دى اول مره تشتغلى كروشيه

الاخت tasneem2006ماقصرت الله يعينك



اللهم صلي على حبيبك محمد


يابنات صلو عليه

يعطيك ألف عافية تسنيييييم انشالله اكون فهمتك ,,,,,

شكرا لج