أحس اني جنيت على امي بتصرفي هذا

هذي المشكله تخص صديقتي بس لان ماعندها يوزر هنا اقترحت ان انا اكتبها لها






السسسسسلام عليكم


اممم ماادري كيف ابدا المشكله سامحوني مااعرف اسردها بشكل مرتب بس تقدرون تسمونها فضفضه



المشكله كلها تتعلق في ابوي ابوي متزوج ثنتين يعني امي ووحده قبلها يعني امي الثانيه

والحمدلله عايشين مبسوطين ابوي وامي صار على زواجهم للحين 25 سنه

المهم ابوي قبل فتره قال لامي اني بتزوج ليش ؟ مقصره بحقك ؟ ناقصك شي ؟

الجواب لا بس شي في راسي وودي اسويه والرجال اللي الله انعم عليه بخير ليش مايتزوج ثالثه ورابعه

وانتم مثل ماانتم ماراح ينقصكم شي وماراح يتغير عليكم شي ويشهد الله انك العزيزه والغاليه ومن هالحكي

امي اكيد مثلها مثل اي حرمه حست بالجرح في قلبها بس تبين لنا انه عادي

ومن حقه يتزوج واذا ماراح ينقصنا شي ليش نسوي مشاكل ونحتج عليه وهو بيتزوج برضانا والا بدون


المهم للحين الاوضاع عاديه وابوي معاملته معنا كويسه ويصرف علينا ومدلعنا وكل شي

بس قبل زواجه باسبوع كنا طالعين نتمشى وسواليف وضحك الا فجأه يقلب على امي

ليش ؟وش صار ؟وش قالت ؟ صدقوني مدري كذا كأنه مضغوط وبدون سبب انفجر فينا

وماباقي كلمه شينه ماقالها امي هنا منصدمه وش السالفه وش صاير وراه كذا !!!

ومن بعدها ماعاد شفناه عرفت ان هالحركه مقصوده انه يسوي نفسه زعلان

عشان ياخذها حجه واذا تزوج يجلس عند الجديده ولا يجينا


سكتنا احنا ولا راضيناه ولا شي اصلا ماغلطنا بحقه عشان نراضيه

بعد اسبوع جا زواجه وبعدها جا يسلم علينا انا واخواني امي كتصرف طبيعي طلعت يوم جا وكأنها ماشافته

اكيد واحد مسفل فيها اكيد ماراح تستقبله بطريقه كويسه بس احنا ولا كأن شي صار استقبلنا بطريقه حلوه وباركنا له

المهم الحين هو مسافرشهر عسل لاترك لنا مصروف ولاشي مع انها مو عوايده
يسافر ويخلينا بدون مصروف بس شكله تزوج ونسى ان له عيال ولهم حقوق


واحد من اخواني متعلق في ابوي مره وابوي بعد يموت فيه صار له فتره ماشاف ابوي واثرت على نفسيته وهو متعود يوميا يشوفه

قلت له تعال انا بتصل لك على ابوي عشان تكلمه من كلم ابوي خنقته العبره وجلس يبكي

خذت السماعه منه وقلت الله يهديه جلس يبكي يوم سمع صوتك وابوي كان حاط على السبيكر عشان اللي جنبه تسمعه

قال وراه تخنقه العبره انا ميت والا فيني شي ؟؟ قلت لا من حبه لك فاقدك

المهم جلس يقول كيفكم وكذا فجأه قال ايييييه وامكم ام لسان الزنانه الحنانه الرنانه انا استغربت وراه يغلط على امي فجأه

وانقهرت هي جنبه مابيها تفرح في امي وابوي شكله جالس يتفيخر ويستعرض عضلاته قدامها

انا رديت عليه ماتحملت احد يغلط على امي بس بطريقه مؤدبه قلت وش مسويه لك امي هالمسكينه تراها مادرت عنك وانت حارق نفسك وجالس تغلط عليها

قال الا هي اللي تحرضكم علي ابوكم قال ابوكم سوواا قلت حرام عليك مسكينه الا قل لو احنا بنغلط عليك بتهاوشنا هي

قال ايه هين الا حية رقطا قلت جعل الحيه تقرص عدوينها والسامعين ( انا هنا اقصد زوجته اللي جالسه تسمعنا ويتفيخر عندها )


هو تفشل درى اني اقصد اللي جنبه قال ايه يلا تبون شي قلت سلامتك وقفل


انا من غبائي رحت قلت لامي انه قال فيك كذا وكذا مدري وش فيني المفروض مااعلمها واقهرها
زياده على القهر اللي فيها

هي انقهررت وانصدمت ليش يقول كذا قدام حرمته وهي اللي صابره عليه ومو مقصره بحقه يكافئها بكذا لا يمدحها بس على الاقل لايسبها


انا يوم شفت امي شوي وتبكي من القهر قلت برسل له رساله اعاتبه فيها بطريقه مؤدبه قالت امي ارسلي له وقولي ترى امي مسافره ومادرت عن هوا دارك (( وامي فعلا بعد زواجه سافرت يومين لجدتي تغير جو ورجعت ))

ارسلت لابوي وربي رساله مؤدبه وماقليت ادبي او قلت له شي غلط

قلت ((( ابوي حزت بخاطري يوم جلست تغلط على امي قدام حرمتك ماتوقعت هالتصرف يجي منك وانت اللي كنت تموت فيها وماترضى عليها
وترى عارفه انك فاتح السبيكر بس علشان تسمعها كلامنا وانك تهزء امي قدام بنتها

وعلى فكره ترى امي صار لها اسبوع مسافره ومادرت عنك ولا هميتها يعني لاتتوقع مثل ماقلت انها هي اللي مخليتنا نكلمك والا شي ثاني )))


دق علي بعدها وجلس يهاوشني ليش مرسله هالكلام قلت انا انقهرت وحبيت اوضح لك اللي بخاطري

ماباقي كلمه شينه ماقالها لي وان هذي مو تربيته تربية امي وانا ماتعودت انه يهاوشني هالشي اثر فيني

وقال يومك تقولين امي مسافره ومادرت عنك وش قصدك اني خروف وان مالي كلمه عليها

قلت لا انت تحسبها هي الحين جالسه تحرضنا عليك وخلتنا نكلمك وانا كنت بوضح لك انها هي مسافره وموسعه صدرها الحين وماجابت خبرك وانت اللي جالس تسفل فيها وحارق عمرك


قال اسمعيني عاااد لاعاد اشوفك مرسله ولا اشوفك داقه ولاعاد تسألين عني مررره

وامك كلميها وقولي لها خليها تجلس عند اللي مسافره لهم لا اشوفها راجعه

قلت انا الا بترجع متى مابغت وان رجعت فهي بترجع عشان عيالها وبيتها مب عشانك

عاد هو صكها بوجهي حسيت اني خربتها علي وعلى امي لو اني ماعلمت امي ولا ارسلت

كان يمكن اذا رجع من السفر يتعدل وضعه مع امي

بس منقهره على قلبته على امي بدون ذنب وهو الحين طاير بحرمته الجديده ماقلنا شي بس لايسوي فينا كذا

وربي كرهت حياتي طول الوقت افكر فيه وانه معقوله سحب علينا بعد ماكان مدلعنا

عشان حرمته الجديده الله يستر من الايام الجايه اذا رجع وش بيصير بعد


ادري كلامي طووووويل المفروض اختصره بكلمتين سامحوني ع الاطاله