أحس ان الغلا بقلبي له ... قل!!

مرحبا عزيزاتي .. هذا أول موضوع أطرحه .. بس هو مشابه لمواضيع كثيرعرضوها الأخوات
وللأخوات الي يلومو الزوجات على " شحتفتهم " على أزواجهم .. ووصفات وطرق كيف تحافظي على زوجك وكيف تملكي قلبه وياعيني مايشوف غيرك:35: ..أقول هذا طبيعي في مجتمعات محافظة ان الوحدة فينا يكون شغلها الشاغل أسرتها وزوجها " جنتها ونارها" والمبدأ هنا من وجهة نظري مو ضعف وان الزوج هو محور الكون .. لا القصد هو ان الوحدة تأدي واجباتها الزوجية وتعطي الاهتمام بالقدر المعقول والي يجنبها القصور والملامة
لكن .. وللي انضربت على راسها جامد زيي واللي لسة على الطريق.. أقول ان الرجال " كتلة عقد" ماتعرفيله قرار
انا هنا مابغى اتفلسف ولا اعطي حكم .. بس الحمدلله .. مافي طبخة ماتعلمناها .. ولا قميص "من إياها" مالبسناه.. .. والولد ياحرام تصريف كل شوي عند الاهل .. " عشان الأجواء الرومانسية".. وزيارات وسط الاسبوع مافي.. >> أمحق مثالية

وفي النهاية .. مع اني ماحب اسميها كذا علما ان مالي الا اربع سنوات متزوجة
الاقي الباشا وباختصار انضم لقافلة " مدمني الصور الاباحية " .. بس
يمكن تقولو قديمة .. وايش يعني .. فكرنا عندك سالفة
اقول ريحو انفسكم انا مادور حل للموضوع الي كان وقتها يمثل مشكلة
الموضوع الان مر عليه سنة والحمدلله خاويت لابني ببنوته زي القمر يارب يحفظهم .. وبشهادة الجميع ملامحي مقبولة وكل من حوليا يغبطني على احتفاظي بجسمي بعد الولادات >>هذا بس للي حينبشو ويقولو اكيد قاعد يدور الخصر النحيل وانت يمكن اهملتي نفسك .. ماهو الرجال ملاك مستحيل يغلط بدون ماتكون المرة هي الي حدته
الهرجة ان الرجال مهما اعطيتيه مايشبع ويفضل يبغى ويطلب..
بس اللي مايعرفوه انهم يخربو على انفسهم لأن الوحدة فينا اذا حبت اعطت بكل ماتملك .. وبس تنجرح .. تنكسر هالقارورة .. وخل الطمع ينفع هالرجال
حتقولو برضو .. طب ايش تبغي ياحرمة ؟
أقول بس هي فضفضة جات متأخرة .. استنتاج .. سموها الي تسموها .. :كلام مارتبته اعذروني فيه
بس الرجال بير ماله قرار .. الي حابة تشارك برأيها .. انا مادور حل .. بس هو شي واحد مخوفني .. احس ان غلاه في قلبي كل ماله يقل .. لاتقولولي طبيعي .. هذه هي المشكلة الوحيدة الي قابلتني في حياتي معه .. بس احسها سودت كل شي .. وانا عمري ماكنت انسانة تحكم على الناس من تصرف واحد " مهما كان حجمه" وتتنكر للباقي .. فكيف بابو العيال
اسفة على طول الموضوع بس ودي اعرف الي تكون مكاني .. بعد مايمر على الموضوع وقت طويل لسة تفضلي كارهة زوجك .. ولا قلبك وسيع ويصفح .. أنا ماقدر اسامح .. الله لايخليني في يوم اكشفه مع وحدة مو صورة مدري وقتها ايش بسوي.. بس انا زي الفريك مابحبش الشريك:mad: