أحس بضيقة........ونفسيتي صايره مثل سلك الكهرب المكشوف

السلام عليكم ورحمة الله وبركاته

صباح الخير

يابنات احس اني وصلت لحدي الاخير ومابقى الا شوي وانفجر
والله مابقى بيني وبين الانهيار الا شعرة
احس اني ورطت نفسي بشي انا ماني قدهـ
عقب ماكنت المدلـلة وكل شي حولي بسيط.......احس وهقت نفسي بعقدة مشاكل

والله من ضيقة الصدر جدعت بنفسي بالصالة لحالي وجالسه اكتب <<ابي افضفض يمكن انسى مشاكلي
والله خلاص ودي امسحهن بديليت من مخي وارتاح

والله احسب العرس حب وعشق ووناسه واعيش ملكة زماني وكلمة احبك هذي بالذات اسمعها بالطالعه وبالنازله
والله احسب العرس شهر عسل بأخر الدنيا
وسوق ومقاضي كل اخر شهر
وطقوم ذهب وساعات مرصوصات بالدرج عندي
وبنت وولد اربيهم على مزاجي والبسهم على مزاجي واسميهم احسن الاسماء
وعلاقاتي مع الناس ماتنقطع بالعكس ازيد من رصيد معارفي وصديقاتي
والله حلمي بشقة انا ارتبه وأأثثه على ذوقي
ونظامه كله يصير تحت اشرافي
انا اقرر اليوم وشو الغداء
وانا اللي اقرر اليوم وشو العشاء


والله وصحيت على طراقات ماهو طراق واحد:09:

رجال يبي كل شي على كيفه وعلى هواه وعساي ما اعترض او ابدي رايي الا ويقلبه زعله
تربية لبنتي تدخل به
ترتيبي لشعره تدخل به
اسمه هو فرض رايه غصب ماهو برضاي وسماه
انا طبخت رز قال لا ابي مرق
وان طبخت مرق قال لا ابي ايدام هندي
ان سويت له فطور قبل الدوام قال لاتسوين افطر مع اخوياي وان ماسويت قال اني مقصره بحقي وماتشتغلين
حتى السكن جالس يهدد يبي يحشرني عند اهله
جوالي صار مايسدد الا ومابالعين قطرة لا وفوق هذا يمن علي
مصروف صارت هذي قضيتنا بالبيت انا اشحذ ويقول ان شاء الله وثاني يوم من نزول الراتب يقول مامعي شي ماهو لازم والله كأني انا وهو على هالسالفة حرب داحس والغبراء
الله المستعان متى اخر مره دخلت مجمع وتقضيت:(
صرت ادور ابو خمسه وابو عشرة دواره.......هذا غير التشليحات من دواليب خواتي عشان اسد الناقص

كلام الحب هذا بالذات شطبت عليه حاسه نفسي كبرت اربعين سنه
الناس تحس بفرحة رمضان والعيد وذكرى الزواج وانا ماعمر مرت علي هالمناسبات الا وزوجي منزل دموعي عشانهن
والله صرت من 27 شعبان او رمضان او 1 بشهر ذوالحجة او 14 شهر ستة الا واقول الله يستر وش راح تكون مشكلتنا هالمناسبة؟
الروحه للاهل صارت بنكد
الروحه لصديقات صارت برضو بنكد
يارررررررررررررربي

وكل يوم منجره انا وبنتي من مدينة شغله لمدينتنا.....والله تعبت والله انهديت والمسافة ماهي بسيطه 1000 كليو
حاولة اكلمه حاولة اناقشه مار ابد ياسرع ماتنقلب هوشه
ياناس والله اني فاقده نعمة الاستقرار
حياتي كله مناقز بمناقز من جدة لحائل

ابي اتهنا في بيتي ابي اتمدد بغرفتي ابي استانس بمطبخي وبحياتي

ورحنا هناك اما عند اهل زوجي ولافه عمري بهالجلال تقل جنازه بسم الله علي والجوع يذبحني واستحي اتجرأ على اكلهم وابي قدري محفوظ عندهم لاني اعزهم واحبهم ومابي توافه الامور تخرب بيننا بيوم
وان رحت عند اهلي ذبحني الشوق لزوجي ولبيتي

صيقاتي وخواتي صارت تمر عليهن المناسبات وصرت انلهد ليه؟لاني ماقوى على قيمة الهدية

المشكله ان تكلمت اخاف يحسبني ناسيه معروفه علي وجمايله وبايعه اللي بيننا وانا قسم اني مانسيت والله يعلم بالحب اللي بقلبي له وانه هو كل شي بحياتي والله اني اموت بتراب رجليه بس انا حاليا متضاااااااااااااااايقه من وضعي
وان سكتت وضغطت على نفسي اخر الوقت انفجر على اسباب تافهه من كثر ما انا اضغط على نفسيتي
انا انثى ابي احس بأنوثتي....هل هالشي غلط ؟او جريمة؟



اللهم اسألك سعادة الدنيا ونعيم الاخرة

دعواتكم لي بالوظيفة ونعمة الاستقرار والاستقلال