أخبر صاحبتي بالموضوع والا اسكت ؟

السلام عليكم ورحمة الله وبركاته

أخواتي

لي صديقة مطلقة من 3 سنوات تقريبا ً وهي مو كبيرة يعني الحين عمرها 25 تقريبا

المهم هي مخطوبة الآن

اللي صار ان اليوم اتصلت علي وحدة من صديقاتي العزيزات واللي أثق فيهم وهي متزوجة وقالت لي ان الرجال اللي خاطب فلانة ( اللي هي صاحبتي المطلقة ) رجال مو زين يعني من من ناحية أخلاقة وراعي سفر وسوابق بالاضافة الى انه عاطل ولا شغل ولا مشغلة وهي متصلة خصيصاً عشان تقول لي عن هالموضوع تقول ان زوجها يعرفه زين وانا بصراحة أثق بهالبنت مررررة يعني ما عندي ادنى شك بنيتها

وبرضو قالت لي انو هالشي ماترضاه هي لو كانت المخطوبة أختها او احد قريباتها تقول والله لا اعلمهم على طول بس لأن هي مالها علاقة بصديقتي المطلقة فما تقدر توصل لها هالكلام

بصراحة انا ضاق صدري مررة صديقتي حبوبة وعسل بس ماوفقها ربي بالمرة الأولى وما أبي يصير لها ماصار لها المررة اللي قبل يعني صعبة جدا ً الوحدة تتطلق مرتين وهي لسه صغيرة وانا خايفة عليها مرة

المهم السؤال الحين وش رايكم كيف اوصل لصديقتي اللي سمعته انا ما ابغاها ترتبط بهالرجال ياعمري هي يتيمة ولا لها أخوان او احد يسأل لها زين عن هالرجال

كيف اوصل لها هالكلام احس صعبة ادق عليها واصدمها واقول اللي خاطبك فيه وفيه و و و

وبرضو ما اقدر اصبر والله هالشي ما ارضاه على احد يقرب لي فكيف ارضاه لها واسكت لازم أخبرها بأسرع وقت بس احس بحرج شديد من الموضوع

الحمد لله انا علاقتي فيها قوية يعني واثقة انها ماراح تسيء الظن فيني او تقول هذي بتقطع رزقي او شي من هالكلام لكن ماودي اصدمها مدري كيف ببدأ ومن وين هل ارسل لها رساله بالجوال او اكلمها واحطها قدام الأمر الواقع بس ماودي انكد عليها بهالايام تعرفون عيد واجازة والواحد مبسوط مابي اضيق صدرها وبنفس الوقت مقدر اصبر المشكلة انها شابكة واخاف تتملك ودي الحق عليها الله يخليكم مسكوني طرف الخيط وانا اكمل بس قولو لي كيف ابدا واي وقت مناسب اقول لها فيه

والف شكر لكل من يساعدني