أختي أول مره تصارحني....وضيقت صدري....!!

السلام عليكم بنات...الله يفرج كربكم ولا يووريكم مكروه لا فيكم ولا بمن تحبون

والله ينولكم الي ببالكم وييسر عليكم كل عسير

انا الصراحه مره خجلانه اكتب في هذا القسم من كثر ما اقرا من المشاكل الي تشيب الراس

وموضوعي الحمد لله ما اشوف انه مشكله بقدر ما انه شاغل بالي ومضيق صدري

بدخل بالموضوع علطول

انا عندي اخت اصغر مني عمرها 21 سنه من فتره وانا ملاحظه عليها تغير بتصرفتها وصايره مالها خلق شي ولا تطيق احد..وانا كنت حاسه بالي فيها بس ما حبيت اضايقها

واليوم بس صارحتني ..وصار سبب تضايقها انه كل الي حوالينها من صديقات واقارب تزوجو وهم اصغر منها وهي الي حطمت الرقم القياسي على قولتها والي الان ما تزوجت

انا الي قاهرني انها توها صغيره والبنت جميله وطولها وجسمها اكثر من ممتاز تبارك الرحمن ومشاء الله عليها راعيه خلق ودين يندر ببنات هاليومين وعائلتنا مرموقه ومعروفه والوالد مشاء الله له مكانته الاجتماعيه وله معارف واصدقاء كثير

يعني ليه يكون عندها هالفكره انها خلاص صارت عانس وكارهه الدنيا وما فيها

علما انها لها اكثر من سنه ما تقدم لها خطاب وتقريبا الي تقدمو لها رسمي اثنين فقط وللاسف ماكانو مناسبين..بالله مو تحسون انه عدد قليل بالنسبه لمواصفات اختي وخصوصا انها ما تخلي المناسبات الاجتماعيه الا ما ندر!! الصراحه زمن يخوف كثرت فيه العنوسه

بنات الله يخليكم ساعدوني اختي تعيش حاله قلق فضيع وتعب نفسي شديد لدرجه انها طول وقتها نايمه كانه عندها مصيبه لا سمح الله

واتوقع ان حالتها زادت لعده اسباب ..

واحد بعد ما تزوجت وحده من قرايبنا في اخر الصيف وهي اصغر منها بسنتين تقريبا وتعتبر صديقتها المقربه

ثنين اخوي الصغير متأثر بالمسلسلات وما يسميها الا يالعانس ..صحيح انه صغير بس ولو احس الكلمه تجرح

واخوي الكبير لما عرف ان بنت جيرانا ما تزوجت مع العلم انها اكبر من اختي بسنه قال خلاص هاذي عنست ومره اختي مسكينه انقهرت من كلامه

اخر نقطه وحده من قرايبنا حسبنا الله عليها ...تسمعها كلام دايم يقهر ويحسسها انها خلاص عنست ولا لها امل ..وامي مسكينه مره حبوبه وما تقدر تقول لهالانسانه شي أحترام لها وتقدير لصله الرحم..مع اني دايم احاول اقنع اختي انها غيرانه منها علشان هي احلى من بناتها

انا فكرت بفكره بس ما ادري هل اقدم عليها والا لا وارجوكم ساعدوني

زوجي عنده صديق اخلاقه عاليه وملتزم وانا شفت فيه صفات الرجل المثالي من خلال كلام زوجي طبعا عنه

وحاولت اقنع زوجي انه يكلمه عن اختي لو هو عنده نيه زواج..طبعا زوجي رفض رفضا قطعيا ..يقول ان هذه الحركه مو زينه بحق البنت ..والبنت ما فيها شي ينعاب علشان نلجئ لهذي الطريقه

ولكن انا اقول ان الحكمه تقول اخطب لبنتك قبل ولدك والرجال كويس ومقرب لزوجي ليش ما يحاول

يا بنات هالزمن يخوف ومتى يلقى الواحد رجال كويس يعطيه بنته ..الله يخليكم علموني برايكم هل احاول والح على زوجي لما يقتنع؟ والا عندكم طرق اخرى؟

الله ياربي يزرق كل بنات المسلمين بالزوج الحبيب اللبيب الي يخاف الله ويستر عليهن دنيا واخره

المقهوره...الاخت محتاااره

أنتظر ردودكم الله ياربي يستر عليكم