المهم....
دخلتوا على بالكم فضيحة لولمرت ... لأ ما حزرتوا....
اسم معروف, اشهر من نار على علم...
يمكن يكون اول محل تدوسة رجلين المغتربات حديثا و السبب نصيحة البنات ليها انه رخيص و بتلاقي فيه كل شي...
و فعلا هالكلام صحيح.. كل شي موجود فيه, من الاكل الى الزرع, من الطفل الوليد للشيخ الهرم...
من الماء للدواء...
كله فيه و بأسعار معقولة و واو wow لكن حذار حذار من ولمرت...
بقلكم السبب اللي خلاني اكتب التحذير و التنبيه و هو فكرة صارلي يومين بدورها براسي...
انا "و اعوذ بالله من كلمة انا" من النوع اللي بيحب التوفير, سواء معي دولار و لا الف, بتلاقوني مزروعة بناحية التنزيلات و الsale rack....
و انا برضه من النوع اللي ما بيحب يشوف الناس بتصرف فلوسها على الفاضي, فبتلاقي اختي او صديقتي رجعت من الشوبينج معي بتبكي و تشكي اني ما خليتها تشتري شي...
الموهيم... نخش بالقصة, يوم الجمعة طلعت شوبينج انا و اختي, فاضيين اشغال.. هههه لأ بجد رحنا لعند تارجيت لانه اقرب لبيتي و كنت راح اجيب كم غرض ضروريين, اختي on the other hand اول مرة تدخل تارجيت تتبضع اشياء ضرورية للبيت, بالعادة بتروح فين؟؟؟
بتروح لولمرت....
انا مشيت في جهة و هي في جهة و التقينا ناحية الcosmetics جايبة اغراضها و اشتكت من غلاء الاسعار!!!!!
مشينا لعند ال ال ال شو اسمه, الcash register المهم, خلصنا اغراضي و دفعت, جاء دورها و ايدها على قلبها لانها على budget... قال لها البياع مدري شو بتسموه اللي بيكون واقف على المحاسبة حسابك: فورتي سفن دولارز اند ايتي فايف سنتس, هي جاوبت بالعربي مذهولة و مستغربة و عينيها فتحوا عليه بدها تاكله : شو؟؟؟؟
انا خفت قمت طلعت 50 دولار بدي ادفع و هي اعطتني ذيك النظرة و بلشت تبتسم و قالت معقول!!!!!! دفعت و انتهينا....
اتاريها بتقول انه نفس نفس الاغراض (ايوه عارفة كتبت نفس مرتين) لما تشتريها من ولمرت بتطلع دافعة فوق ال100 دولار و امرار بتطلع عليها فوق ال200 اذا زوجها بيكون معاها و الاولاد!!!!!! مع انه الاغراض بتارجيت اغلى بشي نص دولار الى دولارين القطعة.... طيب ليش هيك؟ و كيف صار؟؟؟ مش فاهمة!!!!! و قعدت تضحك و قعدت اضحك عليها و قلت لهيك ما بحب اتقضى بولمرت.
تعالوا افهمكم اللي حصل بتارجيت و اللي بيحصل معاها و مع الاغلبية و كان يحصل معي بولمرت, و تعالوا افهموا معي الstrategy و خطة البيع بولمرت.
اولا: ولمرت شعارهم always low prices يعني دائما بنعطيكم اقل الاسعار... اكيد اقل الاسعار في اغلب بضائعهم. و لما يدخل الشاري و هو عارف انه كل شي باقل الاسعار بينتابه شعور بالارتياح, فيدخل مرتاح نفسيا متأهب للشراء.
ثانيا: بما انه هالقطعة بدولار و رخيصة ليه ما آخذ وحدة بالمرة يلا اجيب قطعتين او ثلاثة احتياط يمكن احتاجهم.. هيك شعور الجميع عند الاغراض ام الدولار و الدولارين و الثلاثة حتى... فبتلاقي نفسك جبتي اغراض ب5 و 10 و 15 و احيانا 20 اذا مش اكثر انتي في غنا عنها.
ثالثا: يوه ما انا نسيت اكتب في النوتة انه نحنا بحاجة لبوظة و بحاجة لمكوى و بحاجة للمنظف الفلاني... بولمرت بعد الشعور بالارتياح و اللفة بين الشلفات بتتكتشفي انك بحاجة لاشياء انتي اساسا في غنى عنها, و الحسابة بتحسب.
رابعا: الاطفال يا حبة عيني عليهم, بيموتوا بشي اسمه حلويات و شي اسمه العاب و شي اسمه باربي و دورا و برينسيس و سيارات و سبايدر مان و مدري مين مان... بتلاقي تقريبا في كل رف غرض بينفع للاطفال, و هاتك يا ماما: بقدر اشتري كذا؟ ماما ليه ما بتخليني اجيب كذا؟ ماما انتي عمرك ما جبتيلي غرض انا بدي اياه!! ماما i hate you!!! ماما just this one thing و ما بدي اشي ثاني!!! هاد غير عن الاغراض اللي دخلت العربة بدون ما تشعري فيها او تنتبهي ليها.
خامسا: الزوج .... اياكم ثم اياكم انه تتفرقوا عن بعض, اتفرقتوا معناه كل شخص اشترى اشياء مش ضرورية لوحده (و هو في قرارة نفسه عارف و متأكد انه هالغرض بدنا اياه, و احنا بحاجته)... فبتشوفي زوجك زاد على الفاتورة يمكن 40 دولار و انتي بنفسك زدتي عليها 30 و الاولاد زادوا عليها 15 الى 20 يعني بسهولة زادت فتورتكم بمية دولار بدون ما تنتبهوا...
(مرة بعثت زوجي يشتري غرض ما بيكلف 4 دولار غاب ساعة و رجع صارف 95 دولار و شوية فكة, و السبب اغراض احنا بحاجة ليها, قعدت عنا في الخزائن ما حدا استعملها و بالاخير راحت للتبرع!!!!!!)
من السهل جدا جدا الواحد ينسى نفسه و هو بولمرت و يجيب اشياء ما كان محسوب حسابها و يمكن اساسا مش بحاجتها.
فأختي بولمرت بتدخل بحاجة لكم غرض بتطلع بكذا كيس و دافعة الشيء الفلاني بدون ما تحس فيهم... انا نفسي لما اطلع بقعد اقول يمكن غشوني مش معقول غرضين و طلع سعرهم كذا و بشوف الreciept و بجمع اغراضي لأتأكد..
نجي لتارجيت و اختي لما شافت الاسعار عالية بتارجيت مسكت نفسها, ما لمت من هون و هون كذا غرض, ما اتذكرت شي هي ناسيته و مش بحاجة ليه, طلعت بالاغراض اللي هي بحاجتها و بسعر معقول...
انا مش ضد ولمرت, ابدا بالعكس, حتى بنفسي بدخلة مرة او مرتين بالشهر... لكن انا ضد الoverspending و الصرف الغيير ضروري...
فيا عزيزتي المغتربة اضبطي نفسك و انتي داخلة ولمرت, و اذا قدرتي تجهزي قائمة و stick with it و ما تجيبي غير اللي على القائمة بتكوني ربحتي المعركة مع ولمرت و علو سعر الفاتورة.
يمكن الشعار اله علاقة بالموضوع؟؟؟ يمكن ولمرت always low prices بتخلي الواحد يشتري اللي ما بيخطر على بال
و يمكن تارجيت target بمعني get to the point و بس الغرض الضروري اله تأثير على نفسية الشاري؟؟؟؟؟؟
شو رأيكم؟؟؟؟