أخت زوجي تريد البقاء عندي ساعدوني

السلام عليكم ورحمة الله
أخواتي العزيزات أول مرة اطرح موضوع ومشكلة بهذا القسم
واسأل الله ان اجد من يخفف عني ويدعوا لي ..
عمي ابو زوجي الله يرحمه تزوج عمتي ام زوجي وبعدها
تزوج ثانية لكن ماجلس معها شهور وطلقها لكن حملت وجابت بنت ..
وهالبنت هذه مسكينة عاشت مع امها الى 8 سنين وبعدين اخذها عمي
وعاشت ببيت أهل زوجي وتعرفوا مستحيل العمه تكون مثل الأم
في المعاملة وغيره ... وكانت مشاكل كثير تحصل بينها وبين عمتي لما كبرت على شغل
بيت وغيره .. المهم تزوجت بنت عمي هذه العام وفرحنا كثير وهي بداية العشرينات
وصار على زواجها 6 شهور لكن المصيبة الحين انها بمشاكل مع زوجها وطلع سيء
الأخلاق لأبعد حد يغلط ويلعن ويسب وغير كذا بياخذ ذهبها يبيعه وهي رفضت وراحت
عند أمها ( طبعاً امها متزوجة وماعليها مبسوطة ) وبعد كذا اتصلت على اخوانها يآخذوها
لكن رفضت ترجع عند عمتي وطلبت تجلس عندي .. أنا كنت زمان اساعدها بحل مشاكلها
واوقف معها .. والحين هي رجعت عندي وفي بيتي ومن سوء الحظ انا وزوجي نمر حالياً
بمشاكل ومقاطعة أكثر من 3 شهور حسبي الله ونعم الوكيل
وانا نفسيتي دمار وجات اخته عندي وانا مو متقبلة هالشيء ابد واقول انا يكفيني الي فيني
وقلت لزوجي بالصريح اني مو مستعدة ونفسيتي ماتسمح اني استقبلها خليها عند اخوك الثاني
بس ماسمع كلامي .. وهي الله يهديها من النوع مايساعد ومايرفع شي يعني انا الحين
اطبخ واشتغل واقدم واناديها تاكل وتقوم ياعلى التلفزيون او تدخل الغرفة وتقفل عليها
والمشكلة انو من كلامها خلاص ماتبغى زوجها وتبغى الطلاق وتقول بكل ثقة واجلس
عندكم احسن لي !
بالله عليكم ارشدوني مالعمل ؟ كيف اتصرف معها ومع زوجي
ادعوا لي ربي يسخر لي زوجي ويحنن قلبه لعل فيكم من تستجاب دعوتها ..
وادعوا لأخت زوجي ان يفرج الله عنها ..
وجزاكم الله كل خير ..