أخواتي في الله أحتاج تعطوني رايكم بصراحة و بدون مجاملة :(
أحتاج مين ينصحني غير أهلي و صحباتي لأنهم طبعاً كانو في صفي
بس قبل مااتكلم ابغا اوضح شي اني ماشاء الله ولله الحمد علاقتي بأهل زوجي من أحسن مايكون وربي عالم إني اعاملهم زي أهلي واحسن و هم يعاملوني بما يرضي الله . يعني كلوا 100%
المهم خليني أقلكم ايش سار أمس :44:
يوم الخميس كان عند أهل زوجي عزيمة ، و عملت حسابي ان حتأخر في الليل فقلت لزوجي خلاص ننام عندهم ، و أكثر شي اكرهو ان انام متأخر وبالذات إن بكره الجمعة ، و طبعا نمت متتأخر و صحيت العصر و أنا معصبة ، المهم صليت و روقت ، خرجنا انا و زوجي و اخوه البزر و اختو بعمري ..
و انا الله يسلمكم عندي مرض المنيير اللي هو خلل في التوازن بسبب الأذن الداخلية و كلام كثير ....
المهم أذن المغرب و رحنا مول نصلي و مااقدر اتحكم بتوازني دايماً، فتلاقيني أزحف على ورا .. فكم مره كنت حاطيح تقوم اختو تقولي ايش الاستهبال دا، مره بتدلعي ، مره بتسوقيها و مزويداها، قلتلها الله لا يوريكي اللي انا فيه , واختو قوية و مستوية بس طبعا انا مااسكتلها فمتعودين ان نرد على بعض بدون ما احد يتدخل و هي تعز على قلبي ..
خرجنا من المول رايحين نتعشى، في السيارة بتكلم مع زوجي و شدينا في الكلام فكل واحد ضرب بووووز ...
وصلنا المطعم قالتلي ايش في زعلانه قلتلها مافي شي بس دايخه قالتلي يعني مااعرفك،أنا ضحكت وخلاص .
في المطعم سرت بأهدي الوضع بيني و بين زوجي، فبمزح معاه بتقل دم لاني حتى انا زعلانة، وهو ساااااكت.
تقوم هي ترد و تتلقف بإستهبال، تقول الله يعينك عليها لك الجنه بإذن الله، قلت و ليه ان شاءالله ، قالت لأ الظالمين و المفترين لأ ، قلتلها ايش دخلك بيني و بين زوجي ، تقول اخوية ، قلت ليش ماعندو لسان يرد عليه، تقول هو مسكين ساكت وانت مفتريه ، قلتلها والله ياما تحت السواهي الدواهي ، تقول واااااه شفت خلتك كمان دهيه، زوجي يضحك وساكت، انا طنشتها وسكت ، وقعدت العب بالجوال،
تقوم تقلي ايش زعلتي ايش ماتعرفي تمزحي ، قلتلها ايوه عشان مالك داعي تتدخلي، لاني بحاول اهدي الا عصبتيني زياده،
والبزر اخوهم يقلي خيييير انت على اخويه واختي ( والله مابقي غير البزارين يتكلمو ) زوجي يطالع فيه يقولي اصلا انت من لما صحيتي معصيبه من جد ماانت طبيعية، طنننننشت بس مرره عصبت يعني دحيين فجاه عرفت تتكلم و ترد
، وعادي جلسنا نتكلم ، خلصنا اكل قلت هيا نحلي ؟؟ زوجي و اخوه قالو ايوه، هي تقول خلاص لا كثير مو لازم تحلي ، قلتلها اذا ماتبي تاكلي لا تاكلي ، تقلي لأ بس تبغي تصرفي فلوس ، قلت ايش دخخخلك انت اللي حاتدفعي؟ تقول لا اخويه اللي حايدفع، قلتلها و اخوكي دا زووجي يعني حقي يعني علييه واجب النفقة، يقوم يقلها طنيشيها خليها تدفع من جيبها، وقت مابنتكلم جا الرجال انا طنشتهم وقلتلو جيب واحد ، تروح تقول للبزر اخوها قوم قوم بسرعه قله يلغي الطلب .. قااام زوجي قاله اجلس بلا هبل
لما جا الحلى هي ما اكلت، زوجي سار يقلها كلي مدي ايديك هي مطننننشة ، سار زوجي يطالع فييه ، انتبهت ان بيطالع فيه قلت خير؟
و كملت اكل وخلصنا ومشينا و في السياره انا ساااكته، وصلنا بيتهم.. جلست مع ابوه و امه في الصاله بنتكلم ،
زوجي قال لحماتي بناتك اليوم كانو حيخسرو بعض ، قلت والله بسببك، قال لا اصلا انت من لما صحيتي يا شر اشتر ، سكت ، اختو تقوم ايوه من جد رزك محروق و بس تنفخي ، سكت وسرت اضحك، ماعرفت ايش اقول انحرجت من حمايه، وقعدت تغلللط ، امها قالتلها خلاص اسكتي روحي غرفتك
شويتين زوجي قال هيا مشينا ؟؟ قلت طيب ، رحت غرفة اختو اسلم عليها
.. (هي لها فتره بتعالج وجها فتقول على نفسها انا مشوها، فسرت دايما امزح معاها اقلها مشوها)
دخلت الغرفة قلتلها ياالله يا مشوها مع السلامة وبأسلم عليها ادتني كف على وجهي تقولي انا مو مشوهة -------- انا ماسمعت ياقي الكلام لأن اذني اتسدت وقتها من الضربة و انا مع الفجعه احس كنت في عالم اخر ، بس زوجي و امه كانو واقفين اتفجعو من اللي سار ،
انا قلتلها لاااا انت من جد زودتيها و اعطيتها ابتسامه شيطانية قلت مع السلامة، خرجت لقيت حمايه في وجهي قلت تصبح على خير و مشيت،رحت السياره ، زوجي طول شويتين في البيت
،بعدين رجعت البيت مافتحت فمي بكلمه وانا مره اقرقر على راسه قبل النوم ،سألني معصيبة مني؟؟ قلت ليش عملتلي شي ؟؟ سكت ، قلي زعلانة من أختي؟ قلت ليش هي عملت شي ؟ سكت ونمنا زعلانين .
صحيت اليوم الصباح حالتي سيييئة من الضربة ، و الخلل زاد ، هو راح الشغل، وانا جيت عند أهلي تعبانه و زعلانه، وطبعا ماقلت غير لاختي،
رجع من الشغل أخذني ، يقول ليش زعلانة كانت بتستهيل !!! قلت يعني عايدي تضربني كف ؟؟ قال لا انا ماسكت هزأتها ، قلت لو لقت مين يردها من اول ما بدات تغلط ماكانت اتجرأت و مدت يدها ..
حتى اختو الصغيره عمرها 6 سنوات قليلة ادب معايه دايما تسبني مايقلها شي ، قلتلو انت مو عاملي اي احترام عندهم عايدي يغلطو تسكت
،امه وابوه يحترموني اكثر من اخوانه، يقولي عايدي كانت تستهبل، قلت اذا الاستهبال سار بقلة الادب و الضرب عايدي ، يسير من جد ــــــ وهنا طبعا انا غلط عليه في الكلام والله استحي اقول ايش قلت، قلتلو ( يسير هذي قلة تربية مو قلة أدب
) قلي انتبهي على كلامك ،قلتلو رجعني بيت اهلي ولما تعرف كيف تحترمني انت و اهلك تعال خدني. (لأن لما يصير موقف قدام أهلي يشبه دا الموقف على طووووول اهلي في صف زوجي عشان لا يزعل مني مو يعصيبو و يحرضوه عليه..)
اول مادخلت البيت لقيت بابا وانفجررررررررت بكا ومررره زعل اني انضربت والبيت كلوا عرف و كل اهلي زعلانين و احس مااالي داعي عرفو لأن المشكلة حاتكبر ... وانا الان عند أهلي.
ياريت تفيدوني ! وأسفة طولت عليكم
آلله يعينكــ...