أخت مرت أخوي جايبة عريس لأختي .. و المشكلة بشوفتها ..

السلام عليكم و رحمة الله و بركاته ..

صباحكم / مساءكم ورد ..

كيفكم يا بنات ؟؟؟

ان شاء تكونون دوم بخير ..

أبي شوركم يا بنات في موضوع ..

أخت حرمة أخوي جايبة لأختي عريس بصراحة من البداية كلامها عنهم كل خير و تمدح العريس و أهله .. والله أعلم لسا احنا في بدايات بدايات الموضوع ...

و الحرمة اللي جايبة لأختي العريس قالت لها أخت العريس أنا ما أبي أروح على طول للناس و أحرجهم و أحرج نفسي لأنها ما عمرها شافتنا .. فقررت أخت حرمة أخوي أنها تطلب منا نزورها .. مع العلم إن الحرمة والله لها واجب علينا زارتنا بعد ما توفت الوالدة و هي تو مخلصة الأربعين و جابت بنت بعد و احنا ما رحنا لها .. و كل ما شافتنا قالت زوروني تعالوا لي و احنا متفشلين حييييييييييييل منها ..

و أنا و أختي أمي و أبوي متوفين و عايشة معنا أختي الكبيرة مطلقة يعني حقة زيارات حريم هذا المفروض بس هي ما تروح و لا تجي ... عمرها 40 تقريبا ..

المشكلة في الموضوع إني أنا و أختي مو متزوجات .. بس أعمارنا أعمار عقل و رزانة .. >>> أمحق خخخخخ

و مو متعودين نروح و نجي .. تصدقون و لا عمرنا رحنا لأحد غير قرايبنا المقربين جدا يعني أخوات بس و بيوت أخواني ..

و أخت حرمة أخوي ما هي كبيرة أكبر منا بكم سنة مو كثير ..

المهم احنا من زمان نفسنا نروح لها و لغيرها بس عشان أختي ما تروح ولا تجي احنا ما نروح مكان من غيرها ..بالذات الزيارات .. نستحي بصراحة .. و تقوقعنا على بعض و جلسنا ..


و من سنة تقريبا قالت لي على الموضوع بس قالت لي لا تقولين لأختك عشان لا تستحي وبعدين ما تجي وأنا بصراحة ما أبي أقول لأختي قلت لين تشوفها ويتكلمون ... و بنروح بنروح و مترددة أنا ما أبيها تفهمناغلط و تقول جوني عشان العريس ..

و قبل شهر رجعت كلمتني هاه يا بنات متى بتجوني أبي زيارتكم .. و مع الأخذ و العطا جابت طاري العريس ليتها ما قالت لي .. عشان نروح و احنا ناسين الموضوع و ما تفكر اننا جينا عشان العريس ..

و اليوم قررنا نروح لها مع العلم إني ما فلت لأختي على العريس ..
المشكلة الحين .. اننا ودنا نزورها أنا وأختي اللي أصغر مني طبعا لحالنا لأن أختي الكبيرة ما بتروح ..
واليوم أنا ناوية أتصل عليها و أقول لها بنجيك ..

بس متفشلة من أمرين..

الأول أخاف تفكر الزيارة عشان العريس ..
و احنا والله نبيها من زمان .. بس المشكلة بأختي الكبيرة ..

و الثاني .. إني أنا و أختي مو متزوجات و بنروح لها لحالنا بناخذ لها هدية .. و أخاف تنقد عدم جية أختنا معنا .. مع العلم إنها عادي جدا من ناحية خرجات البنات .. بس عشان ما عمرنا دخلنا بيتها و لا شيء .. و واجب بعد على أختي انها تروح بس عجزت فيها ..

و بعد خايفة الحرمة اللي بتخطب أختي تجي و تشوفنا لحالنا و تستغرب ..

مع العلم اننا مو صغار أنا 29 و أختي 25 ..

ايش رايكم ؟؟؟

أروح و أخذ أختي معي والا بلاش .. من الموضوع كله ..

مع العلم إننا والله من زمان نبي نروح لها و متفشلين منها بس الصدف جات كذا ..

والله محتارة ..

تكفون ردوا لي يا بنات ... و يا حريم بالذات ايش رايكم في موقفنا ؟؟

والله تعقدنا لا احنا اللي نروح ننبسط مع الناس و لا اللي يشوفونا و يخطبونا ..