أخواتي أنصحوني و أفتوني ربي يجزاكن خير

السلام عليكم و الرحمة

أخواتي ,,

المسألة شئ لاحظته في نفسي و بديت أخاف على روحي ,,

كنت ولله الحمد من النوع الي ما يتكلم في الناس لدرجة الكل يتطنز علي و يقولون فلانه دلخه مالها في الدنيا ,, و كنت ما اشيل بقلبي على احد أبد بالرغم اني فترة مراهقتي كنت حساسه كثير بس هم ما علي اسامح الكل ..
كبرت و دخل عالم المتزوجات و الحريم ,, و كنت اتضايق من كثر ما يستغبوني الناس و التعليقات الي تيي على تصرفاتي الـ( ساذجه ) حسب نظرتهم مع اني الكل يشهد لي بالرزانه ..

والنتيجه استغفر الله استخفيت و تطبعت بطبعهم ,,, صحيح المساله ما وصلت معاي إني اصير نمامه و لكني صرت أتعامل بأسلوب صار كذا او صار كذا مع دم حامي حبه و فرض شخصيه ...

سبحان الله ما أرتحت أبد مع ان البعض عجبه الوضع و صرت أعتبر أخيرا حرمه موب بزر .. لكن أنا ما أرتحت لان بعد صرت أهاوش و صرت حاميه ... و بالاخير قررت أغير نفسي و أرجع لطبعي الله يعيني بصراحه التغير صعب و لكني أحاول إن شاء الله إني أرجع مثل ما كنت و أحسن

بتقولون وين المشكله دامج وعيتي لروحج ؟؟

المشكله في سالفة مسامحة الناس ..
هذي يمكن راجعه لحساسيتي الزايده .. مع إني والله ربي الشاهد لو يبدر من الطرف الآخر اي نوع من الندم على طول أسامح ..

أخواتي المشكله الحين تفاقمت .. بسبب وجود شخص دخل حسب ما أرى ( و المساله يدخل فيها غموض) دخل في معصيه كبيره و الله العالم إن فيها كبيره من الكبائر

أنا هذا الشخص قبل المساله هذي تصير كنت مقاطعته مع إنه مقرب لي , و السبب الي شفته من أفعال مشينه فيها تعدي ديني و أخلاقي ..
الشخص هذا صديقه عزيزه كان لها قدرها لين ما انصدمت فيها بعدها طاحت من عيني و بدت امور ثانيه تطلع فصرت استغفر الله اشمئز منها و اضيق بها .. حاولت في فتره إني ارجع العلاقه لوجه الله ولكن كلها فتره ثم رجعت قاطعتها لبدور نفس التصرفات منها .

و جا الوقت الي صارت فيه المشكله الكبيره هذي .. والحين الاقي فيني ( و إن شاء الله إنه مو مثل ما احسه) صرت أحس مثل الغل مو حقد ما ادري مثل مقت و كره لهالانسانه .. هي متواجده في حياتي الإعتياديه .. فيرتفع ضغطي لا شفتها عايشه عادي و الناس ساكتين عن الخطئ الي هي واقعه فيه ..
وفي الاخير بديت أشك هل المشكله و الخطأ فيني ..

يمكن لازم أكون إنسانه متسامحه و أدعي لها بالهدايه .. ما أدري بصراحه هي مو غلطه ولا غلطتين و انا ما كنت أكرهها الشعور هذا تولد بعد كل الامور الي سوتها .. مع إني آخر من يتكلم ما أزكي نفسي الا يمكن هي اقرب عند ربي مني ..

بنات أنا متضايقه مرررره من السالفه و مو عارفه شلون أتعامل مع مشاعري و مع الوضع عموما :(
خاصه إني أحيان أتضايق من صديقاتي الي يتعاملون معاها عادي و أحس إن المفروض يقاطعونها أو يعاملونها معامله تحسسها بأخطائها دامها مصره على الخطأ ..

:( تكفوووووووون إنصحوني