أخوي وأمي

مساء الياسمين والفل


أول معلومات عن شخصيه أخوي

( عمره 24 , موظف وظيفة محترمه ولله الحمد,,, جامعي ,,, مؤدب ,,, خجول مره ,, ماعمره راح تمشى في مجمعات بوحده أو مع شباب ,,, ولاعمره تعرف على بنت ,,, بار بأمي وبأبوي ويتحمل أمور ممكن شاب غيره مايتحملها مستعد يقضي اجازته بخدمه أمي ولا يتأفف , يخاف الله مره ولاعمره همل في صلاته .. وماشاء الله مملوح وأنيق ونظيف من صغره مستحيل يقبل يجلس بالبيت بسروال وفانيله لازم بجامه ,, عنده بيت ملك الحين يبني فيه طبعا بمساعده أبوي الله يحفظة ويطول بعمره والبيت تقريبا خالص ,, عنده أصدقاء معدودين ماهم كثير وأكثرهم من الأقارب لأنه حريص جدا على من يكون صديقه )


اللي حاصل كثير من الأقارب يبونه لبناته لدرجه اقسم بالله رجال من الأقارب كلمه وخطبه لبنته بس أخوي مايبيها


بس مو هاذي المشكلة ,,, المشكلة هي


أخوي يبي يتزوج وكلم أمي علشان تدور له على البنت المناسبه ,,, وأمي الله يهديها ماعطته وجه

وقالت له مو وقته وهالكلام صار له شهور ,,, وكل مافتح معاها الموضوع ماتعطيه وجه

وهو شروطه كلها ماتتعلق بالشكل يقول مايهمني شكلها المهم بنت راعيه دين وتخاف الله ومحتشمه

وأهلها ناس محتشمه ,,, وأمي تبي له وحده تناسب ذوقها مو ذوقه


اللي حصل في رمضان كان رايح المسجد يصلي وهو بالعاده كان يمر على صديق له ويروح معاه

وفي احد المرات لما وصل بيتهم كلمه علشان يطلع له قال له دقايق وبيكون عند البيت وانتظره أخوي

ووصل وكانت معاه وحده لابسه عباه راس ومحتشمه مره مو باين منها شيء ودخلت بيتهم وصديقه ركب السيارة

وقال السموحه منك بس رحت أجيب أختي ( مع العلم كان جايبها مشي مو بسيارة )


وأخوي يدري ماعنده خوات متزوجات وماعنده الا وحده كبيرة والباقي صغار ,, وحطها أخوي في باله اعجبه احتشامها ومن يومها كل يوم يكلم أمي تخطبها له


وهو مايدري وش شكلها ويقول مو هامني شكلها بس البنت دخلت عقلي وأمي راحت شافتها وماعجبها شكلها

ولا تقبلته بالمره ,,, وأخوي قال لها والله مايهمني شكلها وأخوي مقتنع فيها مررررره لأنه عرف عنها أكثر وتحمس أكثر

ويقول مابي غيرها والبنت عمرها 20 وبسنه ثانيه بالجامعه وتدرس دارسات اسلاميه ودرست القرآن والحين صارت هي تعطي دروس فيه بالاجازات ويكون شغل تطوعي

وأخوي من عرف هالأمور أصر أكثر ومايبي غيرها ويقول والله هاذي اللي بتسعدني وهاذي اللي كنت اتمنى وأحلم أخذ مثلها


وأمي ماهي راضيه مو عاجبتها لا بشكل ولا بلبس وتقول شكلها غير مقبول


والله يهديها مو متقبله وحده كذا في التدين تقول عنها اللي كذا معقده وبتجيب لك عقد وبتطفش منها


وتقول له بعدين بتقارن بينها وبين البنات وبتحس أنك ظلمت نفسك أنك ماأخذت وحده شايفه الدنيا

وكلام كثير الله يهديها أمي مدري وش صاير فيها

حتى أخوي مستغررررررب يقول تقول كلام مايدخل العقل بالمره ولا كلام من العقل

بس والله استحي أقول لكم وش تقول وش تفكيرها وبنفس الوقت مابي اذكر وش تقول لأسباب ماأحب أذكرها


أخوي كلم أبوي وأبوي موافق وماعنده مانع


بس أمي ماهي راضيه بالمره


وأخوي مايبي غيرها يقول والله بتحسف على نفسي لو أخذها غيري


يابنات والله ماتتصورون شلون أخوي يبي هالبنت بالحيل



وأنا كلمت أمي وهي مو راضيه ولا مقتنعه وتقول لي اقنعه يغير رايه وبتشوف له بنت مزيونه وتناسب مستواه وتناسب شكله

أمي اختصرتها لي تقول مافيه اي توافق بالشكل لا بالشكل ولا بالطول ولا بالعرض ولا بلون البشرة



الله يخليكم لا أحد يقول كلام جارح في حق أمي أدعوا لها بالهدايه ترى كل إنسان له ظروفه


بس الحين شلون أقنعها أو أقنع أخوي يتراجع لازم واحد فيهم يقتنع



أختكم في الله

أصيلة