أدري إنها متأخره .. قصة ولادتي .. فلم هندي .. اللهم لك الحمد ...

الحمد لله ولدت ورزقني ربي بولد ... وتوني مخلصه الأربعين ...
طبعا أنا عديت التاسع وأعطتني الدكتوره مهله أسبوع إذا ما ولدت بتولدني غصب...
أو أوقع على مسؤليتي .. وزوجي رفض وحدد الموعد مع الدكتوره ...
آآآآآآه من جد رعب مانمت الليله اللي قبلها ماقعدت فكره زينه ولا شينه ماجات في بالي ... وصحيت قبل النجمه من الخوف ... وصليت الفجر صلاة مودع ...حسيت إني بموت في هالولاده ماأدري وش هالأفكار الغريبه .. يمكن إني لوحدي ماأحد من أهلي معي .. غير إني ما قلت لأحد عن موعد الولاده .. يعني شلت الهم لحالي ...
ولما رحت المستشفى ودخلت قسم الولاده .. وشوي إلا أسمع صوت بيبي يبكي وجاتني أم الركب ... ولما قريت على الباب غرفة الطلق عاد هنا مت من البكا وزوجي يضحك علي يقول وش فيك ما قد صار شي ...
دخلت الغرفة الساعة 6,30 الصبح ومن الخوف الساعه 7 نزل مني دم وجاني زي مغص الدوره وقلت للقابله ويليتني ماقلت ... قالت بكشف عليك وأحط تحميله .. وأنا مدري وش السالفه .. والله إني شفت الموت بعينه من هالكشف ماكنت متوقعه إنه مؤلم لهدرجه ...
وهنا بدت معي الطلوق وزوجي يروح ويجي موقادر يجلس متوتر ..
كان الطلق قوي حيييييل ولما جات الساعه 1الظهر أثر الطلق على قلب الجنين وبدت تنخفض النبضات .. وما فتح الرحم إلا 4 سم .. عاد خافت القابله وجات تسوي كشف داخلي تبي تطلع التحميله عشان يخف الطلق شوي .. وماخليتها تسويه عقب اللي شفته من الكشف الاول .. ونادت خوياتها عشان يقنعوني ورفضت .. بس طلعوها غصب عني ...ونادوا الطبيبه وطلبت مني اوقع على إبرة التخدير حقت الظهر ورفضت خفت منها ونادوا دكتور التخدير وحاول معي ورفضت .. وحاول زوجي بعد ورفضت .. واتصلوا على أخوي وطبعا هو دكتور في نفس المستشفى واقنعني وأخذتها ...
والله إنها أكبر نعمه من الله خف الألم علي واااااااااااااجد وبقت ألآم خفيفه أسفل البطن .. ولو أدري أخذتها من بدري ..
بس تفشلك شوي لأنها تفقدك الاحساس فممكن تطلعين اصوات ((...........)) أنا ماهموني الدكتوره والقابلات همني أخوي دخل علي وكنت خايفه أسوي شي وكنت أدعي ربي إنه يسترني والحمد لله ستر ربي علي ..
وماأمداني أتهنا بالإبره وارتاح إلا قرروا لي عمليه قيصريه عشان الجنين انخفض نبضه وااااااااجد .. ودخلت العمليات الساعه 4 العصر وسووا لي تخدير نصفي وكنت منهاره و ابكي بس لما شفت النونو وهم يطلعونه من بطني نسيت كل الألم..وجابته القابله لي وكان معصب فديته ...
عاد هذي قصة ولادتي بس نصيحه مني لاااااااااااازم يكون أحد معك وقت الولاده يخفف عنك خاصة إذا كان زوجك قلبه مو قوي في هالمواقف مثل زوجي ..
والابره إذا وثقتي بالدكتور اللي بيعطيك إياها لااااااتترددين وخذيها والله إنها نعمه من رب العالمين ...
والله يسهل على كل حامل ويرزق كل محرومه .. ويجزا أمهاتنا الجنه والله ماعرفت معاناة أمي إلا بعد ماجربت ...