سارة الدوسري @sar_aldosry

عضوة فعالة

أدعوا لي بالعوض ..

فرحتي اللي ماتمت ..:44:

أنا كنت عضوة بهالقسم و اتعالجت و لله الحمد حملت بس :icon33: للاسف

فقدت حملي ... فقدت اثنين بدال واحد .. لاني كنت حامل بتؤام ..

اللي حصلي اني بيوم من الايام و بالضبط في يوم الاثنين 12 محرم كنت ببيت اهلي

صحيت من نومي الظهرعلى مغص شديد ببطني ما قدرت اتحرك من السرير من قوة

المغص و صرت اصرخ من شده الالم و للاسف محد سمعني لاني كنت مسكره باب

الغرفة و الكل جاي من دوامه ونايم و مالقيت نفسي الا اتصل بالجوال على زوجي

اللي مافهم مني شي من كثر ما كنت ابكي المسكين ترك اجتماعه و طلع طيران

سكر الخط مني واتصل على اختي وقالها الحقي سارة مدري وشفيها كلمتني تبكي وتصرخ

جتني اختي وارتاعت مسكينة و قامت تسالني وشفيك ؟ وشفيك ؟ و انا مااقدر ارد

وقامت تشوفني من تحت تبي تشوف فيه نزيف او مويات بس مالقت شي شوي الا

واخواني الثنين عندي وشالوني الين نزلوني تحت لانس ما قويت اتحرك ابد

لبسوني عباتي وطيران على اقرب مستشفى وطبعا الوقت ظهر مافيه دكتورة نساء

واضطروا يطلبونها لي من البيت و كلها عشر دقايق الا والدكتورة جاية و على طول

سوت لي اشعة وقالت البيبي كويس وسمعتني نبضه بس شافت شي في الاشعة اقلقها

شافت حوالين الرحم مويه وماعرفت مصدرها والغريب ان بطني انتفخ قبل مااوصل

المستشفى بشكل غريب المهم الدكتورة ارسلتني لدكتور ثاني لان عنده اجهزة متطورة

في عيادته و جاء زوجي وخذاني طيران للدكتور وطبا كانت الدنيا قربت على اذان العصر

والشوارع زحمة و انا مستمرة بالصراخ من شدة الالم واخيرا بعد ساعة كاملة وصلنا للدكتور

وما قصر جاء برضوا طيران من بيته بعد مااتصلوا فيه المستشفى وسوا لي اشعة وتحاليل

واكتشف ان السائل اللى حوالين الرحم دم وعلى طول قال لزوجي ودها لمستشفى الشميسي

لان الاستشاريين هناك بعرفون زين لحالتها انا هنا نسيت الالم من زود الخوف لما سمعت

كلام الدكتور و طبعا زوجي طار فيني للشميسي و اول ماوصلنا لاسعاف الشميسي الولادة

رفضوا يدخلون معي احد لا زوجي ولا حتى اختي و انا بموت من الخوف و من الالم بنفس

الوقت المهم الدكتورة المناوبة بالاسعاف ذاك اليوم كانت مغربية بس حسبي الله عليها

ونعم الوكيل كانت تصارخ علي وتبيني اتحرك بسرعه وانا الله وكيلكم ماني قادرة اوقف

على رجليني و حتى الممرضات بعد نفوسهم خايسة و لا وحده منهم ساعدتني تخيلوا

اللي ساعدتني وحده حامل جايه تولد الله يجزاها خير ولما كشفت على الدكتورة العله

من تحت قالت قومي مافيك شي قمت اصارخ عليها بكل قوتي قلت لو مافيني شي

ماجيتك وقامت تسالني وشفيك وقعدت اشرح لها وهي بكل استهتار تناظري من فوق

لتحت و بالاخير قالت بسوي لك اشعه و سوت اشعه قالت انتي مو حامل ولا شي

الا وشوي اختي تتطاق مع الامن علشان تدخل لي لان معاها تقرير الدكتور و الدكتورة

اللي رحت لهم و دخلت واعطت الدكتورة التقرير و برضها قامت تطالع بالتقرير بدون

اي اهتمام وقالت اختك موب حامل و النبض اللي سمعته هذا كان صوت امعائها

تخيلوا الرد ...

واختي ماخلتهم طلبت دكتورة ثانية وبالعافية جابوا وحده باكستانية وكشفت وقالت الا انتي

حامل بس فيه عندك مشكله ولازم تتنومين و طبعا على طول شبكوا فيني المغذي وعطوني

ابره مسكن و طلبوا زوجي علشان يوقع على اذن دخولي المستشفى وهو من الخوف علي

وقع مع اني كنت ابي اطلع منهم لكن وين ..

خذوني ورفضوا يخلون اختي معي وانا بموت ماادري وش بيسوون فيني وحتى الجوال

اللي عطتني اياه اختي مافيه شحن بطارية المهم طلعوني للغرفة فوق وتقريبا كانت الساعة

6 المغرب و لطعوني محد جاني الا هالممرضة كل شوي تجي تشوف الحرارة والضغط

وانا بموت من الالم اللى كل ماله يزيد و بالاخير جاني دكتور سوداني و كشف علي

وسالني كم سؤال و لما قلت له انا وش عندي وشفين قال : ان شاء الله خير

وطلع و لطعوني الين الساعة 2 بالليل الله حسيبهم و اخيرا جاء الاستشاري المناوب

وكان دكتور سعودي و سالني متى اخر مره اكلتي قلت انا مااكلت بس شربت سؤائل

واخر مره كانت الساعة 3 شربت موبة علشان الاشعة وبس قال انتي محتاجة جراحة

لان عندك ( حمل خارج الرحم ) ؟؟!!!!!!

قلت كيف قال ايه الدم اللي بين بالاشعة حوالين الرحم اهو الجنين اللي بالكيس اللي خارج

الرحم ..

وانا للحين مو فاهمة ابد ..

طلع من عندي و انا ابموت و كل شوي اتصل بامي او زوجي او اختي وابكي و زوجي مسكين

منلطع برا المستشفى من 6 المغرب و هم رافضين يطلعونه لي و حتى رافضين انه يطلع لي

جوال لان الغرفة اللي انا فيها مافيها تلفون و الجوال اللي معي قرب يقفل واشوى بعد ما

بخشش عاملة النظافة جابت لي الشاحن و الحمد لله قعد معاي على الخط 4 ساعات من 2 الى

الساعة 6 الصباح لما جاوا يدخلوني غرفة العمليات و طبعا كنت مبنجة ومااعرف وش بيسوون

فيني ومااخبر نفسي الا وانا صاحية و حواليني اهلي وزوجي و انا حاسة بدوخة والم قوي باسفل

بطني واول ما فتحت كلهم يتحمدون لي بالسلامة وزوجي يقولي لاتشيلين هم اهم شي عندي سلامتك

واللي راح يتعوض ولما طاحت عيني بعين امي واختي ولقيتهم يبكون قمت ابكي من كل قلبي

وشوي الا جاء الدكتور وقعد يشرح الوضع وقال:

انتي حامل بحملين واحد طبيعي داخل الرحم والثاني خارج الرحم و لما انفجر الكيس اللي خارج

الرحم سوا لك مشكلة بالمبيض اليسار فستأصلوه لك وقت العملية ..

وقال البيبي اللي بالرحم ان شاء الله انه بيكون بخير ووضعه كويس ..

انا خلاص ما عدت اشوف قدامي من الكلام اللي قاله الدكتور .. وزوجي وامي يكلموني وانا

ماعدت اسمعهم وشلون ؟؟ وكيف ؟؟ وليه ؟؟

و جلست بالمستشفى اسبوع كامل وانا مو قادرة اتحرك الا بمساعدة الممرضات او اللي معاي

بالغرفة لانهم رفضوا يخلون اختي ترافق معاي ..

وخلال هالاسبوع كانوا حاطين لي قسطرة دم و قسطرة بول وانتوا بكرامه وشالوها لي باليوم الخامس

من بعد العملية ..

وكل ما يجيني دكتور كنت اسئلة عن وضع الجنين اللي ببطني كانوا يقولون ماعليه الا وحده

دكتورة سودانية قالت انه طبيعي بينزل بعد العملية لانه ضغير وما يتحمل البنج و الادوية

اللي اخذتيها ..

و بالفعل سووا لي اشعة و مالقوا كيس الحمل و طلعت منهارة تماما من غرفة الاشعة واتصلت

على زوجي لاني ماقدرت اقعد زود بالمستشفى حسيت انهم لعبوا فيني لعب ..

وماكانوا صريحين معاي عيشوني بحلم اني احتفظ بالطفل الثاني و بالنهاية اكتشف انه نزل مباشرة

من بعد العملية ..

مااقول الا حسبي اللع و نعم الوكيل عليهم اذا كانوا هم السبب في نزول الجنين الثاني ..

آسفة اذا كنت ادوشتكم بالكلام بس لاتلوموني وربي مقهورة من اللي صار لي و من التعامل

اللي شفته بالشميسي ..

بالرغم من ان اغلب الناس يمدحونه لكن انا اقول من تجربتي انهم ما يعرفون الرحمة ولا

حتى الانسانية من التعامل اللي شفته فيهم ..

وبالاخير ابيكم اخواتي تدعوني لي الله يعوضني عن اللي فقدتهم عاجلا غير اجل ..

تكفوووون ادعوا لي ..

يلزم عليك تسجيل الدخول أولًا لكتابة تعليق.

تسجيل دخول

اميرة الورد 2 • 17 سنة

الله يعوضك ويعوضني ويرزقنا بي بالذريه الصالحه

ود الوداد • 17 سنة

الله يعوضك يارب

تناهيد جنوبية • 17 سنة

يابعد عمري بكيتيني ورب البيت بكييييييييت

ماعليه يالغالية ربش كريم انشالله ومثل ماحملتي اول مرة بتحملين ثاني مرة

وبتجيبين العيال والبنات ان شالله أهم شي هلله هلله بزوجش حطيه بعيونش

واكسبي رضاه ورضا الشيبان ولا تشيلين هم

ابشرش الرزق جايش في الطريق

بس وانا اختش احمدي ربش وقولي اللهم اجرني في مصيبتي واخلف لي خيرا منها

اللع يعوض عليش ياقلبي

اللهم يارب ياسميع الدعاء اشرح صدر ساره وعوض عليها يارب بالتوم المتعافي ياكريم

اللهم يارب ياسميع الدعاء اشرح صدر ساره وعوض عليها يارب بالتوم المتعافي ياكريم

اللهم يارب ياسميع الدعاء اشرح صدر ساره وعوض عليها يارب بالتوم المتعافي ياكريم

اللهم يارب ياسميع الدعاء اشرح صدر ساره وعوض عليها يارب بالتوم المتعافي ياكريم

اللهم يارب ياسميع الدعاء اشرح صدر ساره وعوض عليها يارب بالتوم المتعافي ياكريم

اللهم يارب ياسميع الدعاء اشرح صدر ساره وعوض عليها يارب بالتوم المتعافي ياكريم

هندااا • 17 سنة

سااااااااااااااااااااااااارونة حبيبتي الله يعوضج ان شاء الله عاجلا غير آجل.....

لاحول ولاقوة الا بالله ...الله يصبر قلبج

قوس السماء • 17 سنة