أرجوكم ساعدونني ...أمي اللي ماعمري حسيتها ((أمـــي))

السلام عليكم
للعلم انا عضوة معروفة بالمنتدى وترددت كثير في طرح مشكلتي لذلك اضطريت اسجل بمعرف ثاني عشان اطرح معاناتي.........
والله مدري كيف احكي لكم قصتي مع أمي اللي مع الأسف الشديد ماعمري حسيت لحظة بحنانها واهتمامها حتى بمشاعري..اعذروني افكاري ملخبطة شوي بسبب نفسيتي المتردية من كثر مابكيت قبل شوي..يمكن تظنون انه حصل موقف بيني وبينها خلاني اكتب لكم لكن الحقيقة ان حياتي كلها مواقف مع امي باختصار
امي متعلمة وجامعية وتشتغل مدرسة بس جاااااهلة في امور التربية..معاملتها لنا ندية بشكل مايتصوره عقل عمرنا ما حسينا انا واخواتي انها تحبنا وتحن علينا زي الأمهات عمرها ما حضنتنا عمرها ما دافعت عنا دايم ضدنا وتحرض الوالد علينا..دايما احنا بنظرها اسوأالناس ولا يمكن يكون فينا شي كويس مع العلم ان الكل يشهد لنا بالأدب والأخلاق ..مادري اش اسمي تصرفاتها هذه؟؟
والله اذا شفت ام تحضن بنتها وتبوسها يتقطع قلبي واحس بسكاكين تجرحني
تتوقعون تكرهنا!!!!!!!!!!!!!
لا تقولون مافي ام تكره عيالها..لأن امي ما قد حسستنا بحبها وان تصرفت في يوم بحنية لازم يكون فيه سبب ومقابل..
انا اعتبر نفسي يتيمة دايما اتخيل لو ماتت كيف بيكون موقفي
ماحسيت اني بتأثر كثير لأنها بعيدة عنا وعن مشاكلنا وهمومنا حتى وهي عايشة
كل واحد فينا عنده عقدة بسببها لأنها عمرها ما احترمت مشاعرنا ..تدعي علينا بدعوات ماندعيها على اليهود نفسهم والسبب دايما تاااافه
مانقدر نفضفض لها ابدا ..كل شي تنشره عند اخواتها لايمكن تحتفظ باسرارنا يا اما انها تطلعها لبرا وتفشلنا او تحكيها لأبونا وتسبب لنا مشاكل تبتزنا بها..رحمتك يااااارب متى يكون عندي ام افتخر فيها
انا ماكتبت كل شي..احس ان الصفحة ماتكفي وانتم بتملون وانتوا تقرون وفي الأخر بتضغطون اكس اعلى الصفحة..بس اقدر اقولكم انها انسانة مادية و منافقة يهمها كلام الناس عندها بالدرجة الأولى حتى لو على حساب كرامتنا مايهمها ...والعجيب انه ممكن تتخيلون شخصيتها قوية...لااااااااااااااااااا اطلاقا
ضعيفة ومهزوزة لأبعد الحدود تركيبتها غريبة واحنا صغار كانت دايما تضربنا وتحط حرتها فينا اذا زعلت من احد..منظر لايمكن انساه بحياتي يوم اخذت عود كبريت وطفته بذراع اختي سنه اولى ابتدائي!!!!
قدام الناس تبان ملاك..حمل وديع..الكل يحسدنا على امنا!!!!!
يارب لاتؤاخذني..حتى واحنا برمضان تضطرني اقول عنها هالكلام....
يعز علي والله..بس لازم احكيلكم اوجه من المعاناه
حتى وانا متزوجة وام مو قادرة انسى..حاليا مايجبرني على روحتي لبيت اهلي في الاجازات الا اخواتي المساكين اشتاق لهم ولا كان اكتفيت بمكالمتها بالتلفون من باب البر بها.
لأني كل ما اروح عندها تنكد علي ياتعايرني يا تفهم كلامي غلط ظنها دايما سيئ..علمتننا الحقد والكراهية بسبب افعالها معنا..ولما ارجع بيتي نادرا ماتكلمني مايهمها تعرف اذا كنت مرتاحة ولا لا واذا كلمتني اعرف انها تبي تاخذ اخبار او تقولي خبر وتكون المكالمة جافة وسريعة ماتتعدى دقايق
حتى اخواتي ماتخليهم ياخذون راحتهم بالكلام معي بحجة الفاتورة وهي ليل نهار تمسك التلفون في حش وغيبة....
والله اني احيانا غصبا عني الاقي نفسي اعامل اولادي بنفس قسوتها علينا في صغرنا وارجع اندم وابكي وادعي ربي يفرج همي ويساعدني اكون ام صالحة لأولادي واخت عطوفة على اخوانها لأني اكبرهم ..
ســــــــــــــــــــــاعدوني كيف اتصرف لأني حاولت كثير اتقرب منها وادعيلها دايما بالهداية بس خوفي على اخواني لا يتعقدون زيي هو اللي خلاني اتشجع واطرح المشكلة ..

رجااااااء...ادعوا لي بظهر الغيب ا ن الله يهدي والدتي ويعينني على برها ويبث السكينه والطمأنينة في قلبي وقلوب اخواني..
ورجاااء ثاني للأمهات اللي يقرون مشكلتي....ساعدوا ابناءكم على بركم ولاتكونون انتم والزمن عليهم حتى لو كبروا وتزوجوا لأنهم عمرهم ماراح يستغنون عنكم..................