أرجوكم يابنات، كيف أتصرف لو عندي طفلة عندها التهاب نسائي

السلام عليكم
اخواتي كيف حالكم
ماقدرت أنام من كثر التفكير بالموضوع ومالي غير الدعاء لله ثم طلب المساعدة منكم
وياليت تتحملوني موضوعي طويل شوي بس علشان أوضح كل شيء،

بنتي عمرها 5 سنوات
دايم تصير لها التهابات بول متكررة، وهي طفلة ماتعرف تشرح لي
كانت دايم تقول عندي حرقة في البول ولما ناخذها يطلع عندها التهاب بالبول ويعطيها الدكتور مضاد ،
يروح الالتهاب وخلال اسبوعين ثلاث يرجع يمكن لأن شربها للماء قليل
المهم
الظاهر ان التهاب البول سبب لها التهاب نسائي وكانت تشتكي لي من ألم و حرقة في المنطقة الحساسة (من الأمام)
شيكت عليها شفت عندها احمرار وحبوب صغار (هالحالة جتها لما كانت طفلة رضيعة) المهم اذكر من زمان مع كريم الحفاظات راح عندها هالالتهاب
المهم رحت حطيتلها كريم الحفاظات سيباميد و خلال كمن يوم راح
لكن، اعتقد انه انتقل لها لداخل المهبل
لان من فترة تشتكي من ظهور فقاعات هواء، وساعات تشتكي من حرقة في المنطقة الحساسة
انا اكتشفت الموضوع بالصدفة في بداية رمضان و لما حاولت اعرف من متى يطلع الفقاعات ماعرفت تشرح لي لانها صغيرة يعني ماقدرت أ فهم من اسبوع أو شهر أو اكثر
المهم، توقعت ان عندها التهاب بول - لان ايضا التهاب البول ممكن يعمل فقاعات هواء - وخذتها الطبيب عطاها مضاد (مع ان سوالها تحليل وطلع تحليل البول سليم لكن في السونار يقول باين في التهاب)، خلال فترة المضاد خفت الفقاعات بشكل كبير لدرجةان يوم يومين اختفى عندها نهائيا
ولكن رجع لها بعد انتهاء فترة العلاج
رجعت وديتها الدكتور، وحولها لدكتور ثاني و عملولها تحليل بول طلعت سليمة، وسوالها سونار للمثانة والكلى الخ الحمدلله سليمة
بكل الأحوال عطاها مضاد نوع ثاني و هي باقيلها 3 ايام وتخلص بس مافي تحسن، وهو قال لو مافي فايدة بحولها نسائي

الخلاصة يابنات
انا صارلي يمكن اسبوع اسويلها التالي:
مغاطس ماي دافي وبابنج وملح صباحا
مغاطس ماي دافي و مغلي قشر رمان مساءا
اعطيها زبادي
أعطيها خلطة عسل و قسط وحبة سوداء 3 مرات يوميا
أعطيها كوب شاي بابنج العصر
وكوب شاي شمر الصبح
غير اني اكثر عليها من شرب الماي
وطبعا ممنوع الحلويات والايسكريم والخرابيط هاذي
امس سويتلها مغطس ماي بحر

يابنات شو تنصحوني اسوي، من مرت بهالتجربة؟؟ جدا خايفة على بنتي لدرجة ماقدرت انام
انا عارفة هو قال بحولها نسائي، بس كيف الدكتورة بتعالجها من داخل المنطقة الحساسة ، يعني احنا كبار ينفع لنا تحاميل ودوش مهبلي لكن هي طفلة؟ خبروني يابنات شوروا علي جدا جدا حزينة على حال بنتي

ارجوكم بنات اللي تقدر تفيدني بأي شي تفيدني واللي تقدر تدعي لبنتي تدعيلها واللي تقدر ترفع الموضوع الله يرفع من قدرها يارب