أرجوكن يا المشرفات والعضوات والضيوف إنكن تقران موضوعي

:44:
السلام عليكم ورحمة الله وبركاته
أرجو من الللي فتحت الموضوع إنها تقرأه بالكامل وترد عليه لو تبى ولو ما تبى فيكفيني إنه نفست عن نفسي وقلت اللي في خاطري
موضوعي عبارة عن مشكلة متعرضه ولازلت من تسع شهور يعني من تزوجت
الموضوع هو
إني فتاة في 22 من عمري تزوجت من فترة تسع شهور يعني مب قصيرة وكان الهدف من زواجي هو إني ألاقي الشخص اللي يعوضني عن ابوي اللي فقدت وانا عمري أربع سنين بسبب إنفصاله عن أمي ، يعني ما حسيت بشيء إسمه أبوة وأحس كلمة ابوي غريبة علي لأنه أهل أمي هم اللي ربوني وصرفوا علي لين مادخلت الجامعة
المهم تزوجت من واحد قريبي وقلت في بالي ها الريال اللي بعتبره ظهر لي وسند وأب وأخ خصوصاً إني ما عندي أخوة أولاد وبرزق منه الذرية الصالحة بإذن الله بس .....

تم الزواج وسرت شهر العسل اللي عمري ما بنساه لزوجي لأنه فعلاً كان رائع بس بعد ما رجعت بدأت المشاكل ، رجعت وطبعاَ لاني متاخرة عن طالبات الجامعة كان لازم اشد حيلي لاتم اللي طافني وكنت دوم حاطة همي في الدراسة ، وكأي عروس هناك واجبات وعزايم لازم أسير لها وكنت أسير لبعضها والبعض الآخر أعتذر بسبب الدراسة خصوصاً إنه كان آخر كورس لي في التخصص .

بعدها إكتشفت في زوجي إنه من النوعية اللي يحب يسهر يعني ياريت معاي وأنا توني عروس لا مع ربعه وأهله وكنت مب متضايجة من ها الشيء خصوصاً إنه شاب بعد وحبيته يعيش شبابه.
في أواخر الشهر الثاني من الزواج عرفت إني حامل ، والصدمة :44: إني ما وجدت الفرح من زوجي كل ها لاني خفت من نتايج التحليل المنزلي وما سويته من اول ما طلب وتخيلوا عصب يوميتها وقال والله كرهتيتني بالياهل اللي ياي كل ها علشان قتله أنا يايه تعبانة من الجامعة وياريت تأجل الموضوع لباجر ويومها طلع من البيت معصب ولا شفت ابد بعدها اي إهتمام منه بالطفل اللي في بطني وكل ما اقله تعبانة من الحمل يقول تراج مب اول وحده تحمل ، يعني ما شفت ولا يوم الدلع اللي يبديه الزوج لزوجته لما تكون حامل بطفله الأول ( معقول كل ها علشان قلتله مو قادره أسوي التحليل اليوم اللي يباه )
المهم طنشوا كل اهل البيت ( أهل زوجي وزوجي ) أهل زوجي سالفة حملي لأنهم من شافوني تعبانة ومو قادرة على الواجبات الإجتماعية بدوا المشاكل معاي وقالوا إنتي ما تحبين الناس ( إنزين يا جماعة إنا حامل واتوحم وأسير الجامعة وارد من الجامعة هلكانة يعني اللي فيني مكفيني) وإنعزالية وتصوروا بدت المشاكل من يومها يعني خالتي أم ريلي كرهتني وقالت إنتي ما عندج إحترام للناس وما تسيرين للناس وما تتطلعين أعراس ( شوفوا أنا في شو وهي في شو ) بس والله لأنه بديت أشوف ريلي هو بعد يزعل لنفس السبب كنت أسير معاهم على الرغم إني دايخة وتعبانة.
وها وايد زعل أمي وقالتلي فلانة خليج منهم إرتاحي ولما كلمة امي خالتي في الموضوع قالتلها عمتي ( حماتي) بنتج ما تحب الناس وأنت ربيتيها على الدلع وأنج تدخلين في حياتها. وفي ايام كان يزعلون علي كل أهل البيت لنفس السبب. 
والمشكلة الثانية تعرفون الحرمة لما تتوحم تقل شهيتها للأكل فنفسي عافت كل شيء فيلست أمي تحاتيني وتقولي لو تبين شيء قولي ولو نفسج في شيء قولي بسويه لج وكانت دوم تعطيني مصروف في يدي وتقولي سيري الجامعة وكلي اللي تبينه على الرغم إني معرسة بس كانت تقول خليها معاج لو نقصت شيء .
المهم وفعلاً كنت كل ما أطلب شيء منها تلبيه في نفس اليوم ومره تخيلوا كان خاطري في عصيد والله وعلى الرغم إنه ما تعرف تسويها سارت تسأل الحريم كيف تسوون العصيد وسوتها لي والله تعبت فيها فديتها كله علشاني، المهم إنه أهلي حطوني في عيونهم من أول ما عرفوا إني حامل وكل طلباتي عندهم أوامر.
المهم ها الشيء سبب مشاكل لي في بيت أهل ريلي وقالوا إنه أمها تغريها وما تخليها تاكل من أكلنا وإنها تكرهنا وتحب أمها والله يا جماعة كل ما أطلب منهم يقولون إن شاء الله وينسوون السالفة ولما أسير عند أمي علشان أطلبها يزعلون ويقولون ما عندها دم بصراحة علاقتي بحماتي وريلي صارت سيئة في ذيج الفترة لأني أطلب من أمي لو خاطري في شيء ولا اقوم أسويه بنفسي على الرغم إني تعبانة ودايخة وريلي نفس الشيء زعل وقال ليش تسيرين تاكلين عند الناس لو خاطرج في شيء قومي سويه عندنا وبنفسج. ولما كنت أسوي الشيءأو الأكل يقولون ما حسبتي حساب اهل البيت يعني لو بطبخ شيء خاطري فيه حتى لو حليب لازم أطبخ حق أهل البيت كلهم ، واقدمه بعد حقهم وبعد لو أريد شيء من السوق لازم أسأل أهل البيت لو يبون شيء حتى لو كان زجاجة بارد. وها مب مبالغة مني لا والله ها من الآداب اللي أمرني زوجي وحماتي إني أسويها. بصراحة ها الشيء اللي خلاني أعتمد لو خاطري في طبيخ على طبيخ الوالدة فديتها وبعد سرت أكره أقول أبى آكل شيء معين في بيت أهل ريلي وأحياناً لما يسوون شيء نفسي تعافيه او ما أحبه أقلهم مشكورين وما آكل شيء. وها الشيء اللي دمر العلاقة بين أمي وحماتي على الرغم إنهم كانوا ربع
المهم،
أنا والله ألحين أحس إني تسرعت في الزواج لأنه ريلي يطالع الله ثم أهله وربعه وانا ولا شيء في حياته ودوم يقلي أهلي أهم عندي منج ومن عيالي تخيلوا ، وفعلاً صار مسؤول عن أهله ويلبي طلباتهم أما أنا فدوم يقول لما أطلب شيء إن شاء الله وينسى السالفة على الرغم إني قلتله أريد أعتمد عليك مو على امي .
ولما أكلمه في الموضوع يقلي قتلج أهم شيء عندي أهلي ولو تبين رضاي راضيهم بالأول ولو عندج إعتراض طلعي من البيت والياهل اللي في بطنج بيوصله معاشه لين عنده ( ها طفله البكر) ، يعني تخله عن تحمل مسئوليتي على الرغم إني زوجته
وألحين رجعت مثل ما كنت بنت لو أريد شيء أطلبه من الوالدة الله يحفظها يعني مب حاسة إن متزوجة وبعد طموحي صارت مثل ما كنت بنت إني أشتغل وأصرف على عمري وعلى الياهل اللي في بطني لأنه أبوه متحمل مسؤولية أهله
يعني الريال اللي تمنيته تبخر في الهواء وأحلامي من الزواج تبخرت بعد و رجعت بنت أمي وأمي مسؤوله عني وأنا والله كارهة ها الشيء.

ولا تستغربون لو قلتلكم إنه ريلي لو يبى يعرس أنا ما بزعل لأنها مو فارقة عندي وما أحس أصلاً إني متزوجة ، ولو أحد قالي إطلقي عن ريلج بعد ما بزعل لأنه كل نفس الشيء

المهم يا جماعة أعرف إني طولت عليكم واااااااااااايد بس والله وااايد متضايجة و ما أعرف أتكلم لمنو وما لقيت إلا ها المنتدى وأنا أضطريت إني أتكلم لأني دوم أبكي على حظي. وأنا حامل في الشهور الأخيرة وأعرف إنه ها الشيء يضر الياهل

والسموحة

:(