أروح أو ما أروح ،،، ذلك هو السؤال ،،،

خواتي البارحة اتصلت أختي الكبيرة تعزمني على ملكة بنتها بالأربعاء و الحفلة فبيتها ،،، لكني من سنتين و هاي الثالثة قررت إني أقطع علاقتي بأختي نهائيا ،،، إلا فبيت الأهل عشان خاطر أمي و أبوي ،،، فكنت أقعد معاها إذا شفتها فبيتهم و هالشي نادرا الحمدلله ،،، و كنت أشوفها في الأعياد فبيتهم و أكون عادية وياها أسلم عليها ،،، بس أحاول إني ما أسولف وياها ،،، يعني مجرد سلام ،،، و السبب اللي خلاني أتخذ هالقرار هو اللي بقوله الحين ،،،

أنا عندي بنت معاقة بشلل دماغي و ما تمشي على كرسي متحرك ،،، و يدها فيها ضعف ،،، فما تكتب إلا شوي شوي وما تروم تتحمل الضغط ،،، وفيه مرة كان عليها اختبارات من الوزارة لمدة أربعة أيام و كل اختبار عبارة عن جزئين ،،، فكلمت أختي لأنه بنتها فنفس المدرسة و صديقتها الروح بالروح هي الوكيلة و قلتلها شو أسوي في الموضوع بنتي مستحيل تقدر تكتب هالمدة ،،، قالت لي روحي عند فلانة و اشرحيلها وضع بنتج رغم إني شرحتلهم كل شي أول ما دخلتها المدرسة ،،،
المهم رحت و وضحتلها إنه بنتي بتحتاج مساعدة في هالاختبار و لازم حد يكتب عنها ،،، و قلت لها اسمعيني يا فلانة أنا بوصي بنتي تكتب و إذا حست بالتعب توقف و تطلب من الإدارة المساعدة ،، و قالت مب مشكلة نحن بنساعدها بإذن الله ،،، و راحت بنتي المدرسة ،،، و لما رحت آخذها على البيت من بعيد لقيت يدها ترتجف ارتجاف مب طبيعي ،،، و انفجرت من الصياح أول ما شافتني ،،، و لما هدت قالت لي طلبت المساعدة من فلانة الوكيلة لما تعبت و قالت لي كملي الاختبار و ما وفرت لي المساعدة ،،، و كلمت المراقبة مرة ثانية و قالت لي كملي بروحج ما عندي أوامر بمساعدتج ،،، و لما الكل خلص إلا أنا ،،، نقلتني المشرفة لغرفتها و أهي تشوف يدي ترجف و أقوللها أنا تعبانة و أصيح و تقولي حركي يدج و سوي تمارين و ردي كملي ،،، طبعا أنا اتصلت مباشرة بأختي لأنه على البيت و محد بالإدارة ،،، و قلت لها رمسي فلانة شو السالفة ،،، ليش ما ساعدت البنت يوم تعبت ؟؟؟؟؟

و ردت علي و تقول بنتج ما طلبت المساعدة يوم أنا موجودة ،،، و باجر لو احتاجت المساعدة بنساعدها ،،، أنا ودين بنتي المستشفى و خذت تقرير من الطبيبة و قالت لي البنت تعرضت لضغط كبير و صار لها شد عضلي شديد جدا و التهاب في أوتار الكتف ،،، طبعا أنا كنت على يقين أنه بنتي طلبت المساعدة بس الوكيلة أنكرت لأنها ما تبغي تتحمل المسئولية ،،،

اليوم الثاني قلت لها شوفي حبيبتي بتسيرين المدرسة إذا رمتي تكتبين اكتبي و إذا ما رمتي حطي القلم و اطلبي المساعدة و أنا بمر عليج المدرسة و بطمن عليج ،،، و طبعا يد بنتي ملفوفة بضمادة ،،، و راحت الالمدرسة و الجزء الأول من الاختبار كان كله اختيارات ،،، فحلته لما فتحت الجزء الثاني كان كله كتابة فحطت القلم و طلبت المساعدة ،،، وطبعا جلست تنتظر بدون فايدة لكنها الحمدلله التزمت بالوصية ،،،

دخلت المدرسة و قلت للأخصائية لو سمحتي أبغي حد يطمني على بنتي لأنها تعبانة ،،، راحت تشوفها و إلا شوي و أشوف بنتي ياية و يا المرافقة و شالة شنطتها و مضايجة و تعبانة ،،، أقوللها شو صار وياج قالت سويت اللي قلتي عليه حطيت القلم و طلبت المساعدة و الحين مرت ساعة و محد ساعدني أو كتب عني و يدي تعورني ما أقدر أتم في المدرسة قلت لها روحي السيارة ،،، و سبحان الله راحت بنتي و مرت الاخصائية و قالت لي : فلانة شو صاير ويا بنتج ،، قلتلها : أنا أبغي أعرف شو اللي صاير وياكم إنتو ؟ البنت تطلب المساعدة يومين و محد يساعدها ليش شو السالفة ؟؟ المديرة سمعت الكلام و تدخلت قالت : بنتج ما طلبت المساعدة ،،، الصراحة هني ما تحملتها رفعت صوتي و قلت لها : يعني بتقولين لي البنت فوضعها هذا و يدها متعورة و متألمة و مربوطة بتكتب براحتها و ما بتطلب إنه حد يساعدها ،،، يعني قولي لي شي معقول يتصدق ،،،و فيه مشرفة ردت و قالت البنت طلبت المساعدة و نحن اتصلنا في الوكيلة و خبرناها عن الموضوع ،،، للأسف وصلت الوكيلة اللي هي صاحبة أختي الروح بالروح و صارخت وقالت : أصلا انتي بنتج ما فيها شي ،،، طبعا أنا استغربت لكني ما سكت و قلت ،،، هيه بنتي ما فيها شي أنا مقعدتنها عالكرسي مزاج و دلع و كل التقارير اللي عندكم كذب في كذب ،،،

رحت المنطقة و الوزارة لكن للأسف ما خذت شي و قالي مدير المنطقة بدون شاهد نحن ما تقدر نسويلج شي ،،، رحت هني و كلمت أختي و قلت لها أنا متصلة فيج و طلبت منج تخبرين الوكيلة و قالت هيه ،، و هالشي صار مرتين إني أكلمها و أقولها اتصلي في فلانة و خبريها عن وضع بنتي ،،، قالت هيه ،،، لكني ما أروم أشهد و زوجي ما يرضا إني أروح في مكان فيه رياييل ،،، و طبعا هذا كذب لأنها تسوق سيارتها و قايمة باحتياجات بيتها و عيالها وماشاء الله تروح كل مكان ،،، قلت لها طيب يا فلانة بنروح عند نائبة مدير المنطقة و ما بخليج تجتمعين مع ريال ،،، المهم رفضت نهائيا إنها تشهد باللي صار ،،، و ما خذنا حقنا ،،،، و صارت سالفة طويلة عريضة و ادخل أخوي الكبير و قالها هاي شهادة حق و انتي بتظلمين البنت و هيك و هيك لكنها رفضت نهائيا ،،، حاولت آخذ حق بنتي بأي طريقة لكن للأسف صارت تدخلات يمين و يسار وما خذنا شي ،،،

و بنتي طبعا فقدت القدرة على الكتابة نهائيا ،،، و صارت لها مضاعفات و آلام مزمنة و لين الحين تمر عليها ليالي طويلة لا رقاد و لا راحة ،،، الله يشافيها ،،، و الحمدلله وحدة من خواتي تكفلت بمصاريف دراستها فمدرسة أمريكية من أحسن مدارس دبي ،،، ربي يجزيها خير الدنيا و الآخرة ،،،

نرجع لموضوعنا ،،، مرت سنتين عالموضوع و هاي الثالثة و أنا الحمدلله كنت مرتاحة بقراري لأني ما ظلمت حد في الموضوع ،،، و الصراحة ما عندي الرغبة إني أدخل بيتها مرة ثانية ،،، حتى مسحت أرقامها ،،، و هي لا اعتذرت و لاهم يحزنون عن اللي صار ،،، و لما تشوفني اتي تسلم و تسولف و لا كأنها غلطت بحق بنتي أو حقي ،،، و لو كانت الحفلة مب فبيتها بروح بدون أي تردد بحضرها حالي حال أي حد ،،، لكني ترددت لأنه الحفلة فبيتها ،،، و سؤالي شو رايكن خواتي ،،، كل وحدة تحط نفسها بمكاني ،،، بتروح و إلا ما بتروح ؟؟؟؟
أنتظر الردود و ربي يجزيكن كل خير ،،،