الفطير المشلتت
استخدمت دقيق فاخر كيسين يعني المجموع (2 كيلو)
وعلى كل كيلو مقدار 1/2 ملعقة كبيرة ملح
وحنحتاه ماء عادي (حسب الدقيق ما ياخد) والفطير يا بنات محتاج عجن كويس .وأنا عملتها لما كان المزاج رايق فعجنت بإيدي مش بالعجانة وعجنت 2 كيلو وتعبت كفاية رغي ونكمل
هنا شكل العجين بعد ما خلصنا من العجن . خدت حوالي نص ساعة ومحتاجين عجينة طرية ولينة ومتماسكة
عجينة الفطير محتاجة ترتاح كويس جدا علشان تفرد معانا بعد كدة بكل سهولة . بعد ما عجنتها قطعتها لكور ودهنتاه بالزيت وحطيتها في صواني مدهونة بالزيت ومتبطنة بورق الزبدة وغلفتها بالنايلون ودخلتها الثلاجة واستخدمتها تاني يوم
لما طلعتها تاني من التلاجة لاحظت ازاي العجينة متماسكة ولينة وجاهزة للفرد
وميزة ورق الزبدة انه مش بيخلي العجينة تازق . بما اني ال عجينة لينة فممكن تلزق بالذات لو خليتها في الثلاجة زي ما أنا عملت ليوم كامل
هنا يا حبايبي لاحظت العجينة بتمط إزاي . وده سر العجينة كده مهما مطتيها متتقطعش . وممكن نوصل للقوام ده عن طريق طول مدة العجن ونخليها تراح لفترة طويلة علشان مادة الجلوتين الي في الدقيق تدقينا القوام اللي بيمط زي ما هنلاحظ
حنحتاج طبعا لسمنة(ممكن نستخدم السمنة البلد وبتبقى جميلة في الفطير)
عملية فرد الفطير
ناخد حته ونبدأ نفردها بإدينا أو بالنشابة
ونبدأ نشد الأطراف
وبكل بساطة يا حبايبي حتمط معانا ومش حتتقطع لأني العجينة ارتاحت لفترة طويلة . ولما تحطي إيدك من تحتيها حتلاقيها واضحة زي الشيفون (تعبير بليغ)
وما ننساش يا حبايبي نفرد الأطراف علشان الفطير يطلع كلو مورق عندنا
وبعد ما نفرد أول كورة عجينة هنلاحظ إنها شفافة جدا ومفرودة حلو
نرش السمنة ونوزعها على كل العجين
ونبدأ نتني الفطير على بعض بحيث إنها تبقى حاجة كده مدورة ومفرودة (يا ريت تكونوا فاهميني)
حنفرد كورة عجينة تانية بنفس الطريقة ونحط (الفطيرة نمرة واحد) جواها
ونبدأ نتني جوانب لعجينة علشان تغلف الفطيرة اللي جوه (دي فطيرة نمرة2)
بعدين بنفس الطريقة تالت طبقة(الفطيرة نمرة3)
الحمدلله هانت آخر فطيرة أهي وهخلص تعبت ورجلي وجعتني من الوقفة والفرد
كدة ربنا سهلها وخلصت لف كور كور العجينة وطلعوا بسم الله ما شاء الله 5 فطيرات. وسبتهم يرتاحوا لحوالي الساعة علشان أعرف أفردهم
والفطير بعد عملية التوريق وبعد اما ارتاح بيبقى ممكن يتفرد بسهولة على عكس بعد عملية التوريق على طول
ونفرد الفطيرة على كل الصينية
طريقة خبز
الفطير محتاج لفرن حامي جدا جدا . أنا خبزتوا على حرارة 200 تقريبا بعد عشر دقايق تقريبا هنلاحظ إن الفطير ياخد لون خفيف واتنفخت
ولو ضغتنا عليها بالسكين هتدخل شوي
وبعد حوالي الربع ساعة طلعتها واتأكدت لو القعر اتحمر ولا لسه (بس الحمدلله بقا كويس جدا وده المطلوب لون دهبي جميل)
ودا شكل الفطير بعد ما إتعمل الصورة 2و3
والصورة 1 دي شكلها من تحت لاحظوا شكل التوريق واضح إزاي
يا رب طريقتي في الفطيرتكون عجبتكم يا حبايبي . ومش عايزة غير دعوة حلوة بظهر الغيب بفك الكرب وربنا يخليلي ولادي
بحبكم جداً
Nora 012 @nora_012
عضوة جديدة
يلزم عليك تسجيل الدخول أولًا لكتابة تعليق.
mdam 012
•
تسلم ايدك
أنا بصراحة محاولتش أعملها قبل كده لأنها باين عليها صعبة
بس إنتي بجد عند إصرااااار
أنا بصراحة محاولتش أعملها قبل كده لأنها باين عليها صعبة
بس إنتي بجد عند إصرااااار
الصفحة الأخيرة
إنتو فـــــــــــــيــــــــــــــــــــــن