أريد أستقيل...بس قبل أقروا قصتي وأنصحوني يا أهل الخير...

أرجو أي شخص يقرا موضوعي وينصحني لأني خلاص تعبت ووتوقف تفكيري..فأرجوكم ثم أرجوكم لا تنطشوني...وبدخل في الموضوع...

كان وضعنا المادي كثير صعب...وكنت مثل أي بنت أتمنى أني أخلص دراستي الثانويه وأدخل الجامعه أحقق طموحي وأساعد أهلي وخواني الصغار..وطبعا خلصت الثانويه بنسبة 85% بس ما قبلوني بالجامعه!! وحزنت حزن ربي وحده أعلم به :( ...وما شفت جدامي غير الكليه ودخلتها ودرست فيه سنتين وأنا أشوف وضعي ووضع أهلي كثير صعب وكنت أدعي ربي يوفقني بوظيفه والله مو لي ولا لطموحاتي بس لأهلي أساعدهم وأحسن من الوضع بالبيت...

بعد تخرجي من الكليه رب العالمين وفقني بوظيفه في مؤسسه للحكومه فيها نسبه معينه ونسبه الباقيه للشركات ثانيه يعني فيها أختلاط.. مع أني كنت أتمنى اني أحصل لي وظيفه بالمدرسه....

وبهالمؤسسه أكتشفت عالم ثاني..عالم غير من البيت والمدرسه والكليه..عالم غش وخداع ومصالح..عالم كلام الفاضي..بالرغم من أنها مؤسسه عالميه...عالم نفسي وبس...

طبعا هالمؤسسه فيه ميزات كثير حلوه والراتب كبير..يعني راتبي بالدرهم 9000..بالريال العماني 900..وبالريال السعودي 9000...وطبعا وأشتغل الحسد سواء من القريب أو بعيد...

مرت أيام وسنوات...وضعنا المادي تحسن كثير وأخواني تقريبا الكل خلص دراسته (لا تفتكروني كبيره بالعمر بس أنا بديت الشغل وأنا عمري 19 سنه)...

طبعا تعرفون كيف يكون مكان أختلاط..بلاوي في بلاوي...بس طبعا الحمدلله حنا ملتزمين بس الوحوش اللي موجوده ما تخلي حد بحاله..تحملت وتحملت عشان أمي وخواني..كنت أرجع البيت وأنا أخبي دموعي...لأني عانيت كثير وما كنت أتكلم أمي لأني اللي فيها مكفيها...لا تفتكرون سويت شي غلط أو أي حد تجرأ علي..لا أبد..بس أبد ما أرتحت في مكان فيه أختلاط..الكلام كثير والنظرات...وأشياء وأشياء....

والحين بعد 8 سنوات وراح أدخل في سنه التاسعه من شغلي قريب..تعبت كثير والله تعبت أريد أرتاح بس بعدني أفكر في أهلي صحيح الأوضاع تحسنت من قبل..بس لأنه عندي أخ صغير مريض وأمي أنسانه تعبانه..وأبوي ريال كبير بالعمر وما يشتغل أحس أني بظلمهم لو تركت شغلي...لأني أصرف عليهم

بس يا ناس كرهت الحياه بهالشغل وبهالمكان...وتعبت...أرجع من الدوام ساعه 5 ومرات 6 مسا عشان أخلص الشغل...من غير الذل والأهانات اللي نحصلها...

كلمت أشخاص قريبين مني بس محد شجعني يقولوا هذا مستقبلج ...لأنه مثل ما قلت لكم هالشركه فيها ميزات وعلاوات وكورسات ودراسه..بس أنا ما أريد أي شي منهم أبد أبد..حتى دراسة الماجستير كنسلتها...الكل يقول لو تركتي هالشغل مستحيل تحصلي وظيفه ثانيه لأنه صعب الواحد يحصل وظيفه بهالوقت....الكل يقول فكري في أهلج...

فكرت وفكرت وفكرت وفكرت ومو مقتنعه أني أكون بهالوظيفه أبد..أروح الدوام وما قادره أشتغل أكره كل شي هناك...

تدرون شو اللي أتمناه وأريد...أتمنى أصلي النوافل..أتمنى أصوم أيام غير رمضان..أتمنى أقول الليل وما أنقطع..أتمنى أحفظ القران..أتمنى أختم القران كل شهر..فهل أنا مريضه أو أبالغ؟؟

ساعدوني أرجوكم وقولوا لي شو أسوي...أترك وظيفتي وأتوكل على الله...ولا أستمر وأتحمل مع أني أحس أني بنهار خلاص؟؟
لا تبخلوا علي أرجوووووووكم...

نسيت أقولكم أني أحاول أدور لي وظيفه بالمدرسه...وممكن أتحمل التعب بالمدرسه..بس ماريد أكون بهالوظيفه اللي أنا فيها حاليا....

جــــــــــــزاكم الله كل الخير...