أريد الزواج ولكن!

عارف إن الموضوع كبير.. بس أتمنى تقرأوه وتساعدوني لأني بتعب .. وجزاكم الله خير
أنا عمري 20 بحب بنت عمرها 18 وهي بتحبني جدًا.. ومرتبطين بعلاقة غير رسمية وبإذن الله قريبًا هتقدملها.. هي بتحبني جدًا وبتسمع كلامي في كل حاجة بطلبها.. بتحبني لحد الجنون.. لدرجة إني بشتمها بأوسخ الألفاظ وبتستحمل.. وكنت بكلم بنات عليها وبتقعد تزعل وتعيط وتحاول تخليني ما اكلمهمش.. وكنت بهددها بالبعد وببعد عنها.. كانت تتقهر جدًا وتعيط وبتستحملني.. حتى إني مرات لما كانت بتغلط أو مش بتسمع كلامي كنت بضربها ! .. كنت بعاملها بأسلوب زفت لأني كنت بتمادى بسبب حبها ليا.. ومن شدة حبي ليها كانت اصغر غلطة ليها بتجنني ف كنت بتعصب.. بس حاليًا أنا هديت شوية وبعاملها معامله أقرب للحسنة عشان هي إستحملتني كتير.. هي زميلة أختي ودايمًا بتجيجي بيتنا وكإنها فرد من بيتنا.. ووالدي ووالدتي عارفين بعلاقتنا وقالولي هنخطبهالك.. مع العلم إن والدي متدين جدًا وشيخ وأنا إمام مسجد وحافظ للقرآن وحتى إني بلقي خطب يوم الجمعة.. ووالدي قال هخطبهالك بس ماينفعش تتكلموا بعلاقة غير رسمية عشان حرام وكده.. بس بنتكلم عادي بدون علمهم.. بالنسبة لـ إزاي إرتبطنا؟ كانت أختي كريضة وفونها مكسور ف كانت تكلمني على الواتس تسأل على أختي.. وكانت تفتح كلام معي وكنت أرفض.. هي كانت بتحاول ترتبط بيا.. وفعلاً إرتبطت.. إللي بيثبت إنها بتحبني إن إبن عمها وإبن عمتها عرفوا بعلاقتنا وحاولوا يفرقونا.. بس هي رفضت.. فهددوها بيعرفون أمها.. ف هي خافت وقالت هبعد عنه.. لأنها كانت مرتبطة بعلاقة غير رسمية وهي صغيرة في 1 إعدادي.. فأهلها عرفوا وحصل مشاكل.. وهي دي المشكلة إللي بتكلم عليها.. المهم هي بعدت عن بنت عمتها علشاني.. مع ان بنت عمتها أقرب حد ليها.. بعدت عنها لما حاولت تفرقنا..
مشكلتي إنها كانت مرتبطة زمان بشخص.. وهي عقلها صغير جدًا وقلبها طيب لدرجة ممكن أي حد يخدعها.. وانا متأكد من كلامي.. ف وصلني كلام من حبيبها السابق إنه كان يتكلم معها كلام مش حلو.. كلام جنسي وكده.. مع انها قالتلي لأ.. وأنا أشك إنها عملت كده بسبب إن عقلها صغير وممكن هو إستغللها.. وكمان كانت أخدت معاه صورة سيلفي.. وكده.. فأنا لما عرفت الدنيا ضلمت في وشي وحزنت وكإن قلبي هيخرج من مكانه.. مع العلم إني بكلمها بشكل جنسي عادي.. وهي متقبلة.. وكانت في أول العلاقة ترفض رفض بسيط.. بس أنا خليتها تتعود إني أكلمها بشكل جنسي.. وأنا عارف إن ده غلط.. بس أنا للأسف عملت كده عشان اشوف عقلها.. وعشان برضو أتمتع.. وده غلط وأنا عارف.. وبتصور معاها صور وفيديوهات تيك توك.. بس الصور لينا مش لحد تاني.. وكل ده بسبب إن عقلها صغير وإيمانها ضعيف.. إنما هي من داخلها أقسم بالله طيبة جدًا.. لدرجة إني كنت بستغل صغر عقلها ف إني أخليها تعمل معايا كده لأنها أحياناً لما كانت ترفض تبعتلي صورة لجسمها.. كنت بخانقها وأقوللها إنتي مش بتحبيني وألعب عليها.. للأسف كنت بحبها حب طيش.. بس فجأة حبيتها حب وكإن حياتي وقفت عليها!!! حُب وصل للجنون!!!
في نفس الوقت قلبي بيقتلني.. وبقول إزاي أحب بنت مش محترمة.. وبعيط بدل الدموع دم.. من ناحية بعشقها وعاوز أتجوزها.. ومن ناحية بقول هحب بنت كانت مرتبطة قبلي ومش منضبطة معايا أو مع اللي قبلي.. والوسواس بيلعب ف عقلي ومش بنام والله من الدموع.. إللي هو بحب بنت ممكن نقول منحرفة.. بس بحبها!! يعني مستعد أضحي بنفسي لأجل الحب ده لأني بعشقها بجنون.. بقول يمكن لأن والدها مات وهي صغيرة بقت كده.. وبقول يمكن لأن عقلها صغير.. بس هي والله قلبها طيب وأنا أكتر حد بيفهم في القلوب.. طيبة جدًا.. لدرجة إني لما بتعب بتموت من القهر وبتسيب دروسها الخصوصية وبتيجي عشان تكون جنبي.. حتى إنها كل ما تشوف أمي تقوللها خلي أحمد ييجي يتقدملي دلوقتي عشان انا ماقدرش اعيش من غيره..
ومن ناحية تانية الأفكار بتيجي تقتلني وتقوللي بنت غير منضبطة و..و..
أعمل إيه؟؟ أتجوزهاا والوسواس ممكن ينتهي؟؟ ولا ماتجوزهاش عشان هي مثلاً مش محترمة.. ولا أتجوزها وربنا بيهديها.. ولا ماتجوزهاش وأعيش مقهور!!
أتمنى مساعدتي.. مع العلم
____
وبدلاً من النصائح الدينية زي كده حرام وأصلاً العلاقة حرام وماتحل لك.. ياريت تكلموني بعقل.. أنا شاب ملتزم وإمام مسجد وحافظ للقرآن.. وعارف إن ده خطأ.. بس إنتوا عارفين السوشيال وعارفين الإنفتاح إللي حصل في العالم.. وده مش مبرر طبعًا.. فَ ياريت تنصحوني وتساعدوني في موضوعي وفي نفسيتي المقهوره لأني عاوز أتقي الله وأعمل حاجة ترضي ربنا.. عشان كده بستشيركم !! والله يهدينا وإياكم ويسترها علينا وعليكم وعلى كل المسلمين.. ويفرج عنا الهم والغم ويرفع البلاء والواباء عن الأمة
وأتمنى من المشرفات أن يتركوا موضوعي.. أعلم أنه منتدى نسائي.. وفي الحقيقة تم مساعدتي أكثر من مرة بفضل الأخوات الكريمات.. وأنتم تعلمون أنه لا يوجد منتديات نشطة غير هذا..
وجزاكم الله خيرًا..