أزمة الخادمات في جدة..شوفوا سعرهم في وصل؟؟

السلام عليكم

أنا يا بنات من الحريم اللي احتاروا في الشغالات
يعني لي متزوجة 7 سنين و بيتي عدت عليه 15 شغالة تقريبا
طبعا كلهم من هنا من جدة
يعني مش بالفيزا
1)أول شغالة جاتني في حياتي استمرت عندي 7 شهور و كانت حبشية خرجت من عندي عشانها زعلت اني شلت التليفون (( تخيلوا)) و ماكان عندي الا بنتي عمرها 4 شهور و كنت أدرس في الكلية

2)و اللي بعدها استمرت برضه 7 شهور و كانت اندونيسية بس كانت نوعا ما كبيرة في السن و قالتلي انها خلاص تعبت و قتها برضه ما كان عندي الا بنتي

3)و اللي بعدها برضه اندونيسية استمرت امكن 4 شهور و خرجت بلا سبب ( راحت اجازتها و ما رجعت)..وقتها كنت حامل في ولدي في الاشهر الوسطى

بعد كدة ارتفعت الأسعار
صارت اللي بس للتنظيف بـ 1000 ريال و اللي تنظف و تطبخ بــ 1200
قلنا مو مشكلة

4)جبت وحدة اندونيسية تطبخ بـ 1200 ريال لأني كنت أبغى أنقل بيتي و حامل في الثامن و جلست الخدامة عندي إلين ولدت و صار عمر ولدي 5 شهور راحت اجازتها و ما رجعت بلا سبب..

5)و بعد كدة رجعتلي الأندونيسية رقم (2) اللي كانت عندي قبل كدة اللي هي كبيرة في السن نوعا ما ( الصراحة هي مرررة حبتني و حبت بنتي عشان كدة رجعت) و قعدت عندي 10 شهور و بعدها قالتلي خلاص مرة تعبانة و تبغى تروح الترحيل عشان ترجع بلدها.. و تركتني و أنا حامل بطفلي الثالث و كنت في آخر الشهر التاسع..

بعد كدة... صارت كل شغالة عندي ما تستمر إلا شهرين أو شهر..و تخرج
بسبب أو بدون سبب
اذا بسبب يقولوا: ما نبغى بيت فيه أطفال ( و يكو راتبها 1300 تخيلوا بس )
و اللي تقول : طفشانة أنا أبغى بيت فيه شغالة ثانية معايا!!!
و اللي تخرج لأنها لقت راتب أعلى

يا جماعة دحين عندنا في جدة عدنا أزمة مع الشغالات
الآن الآن
عارفين كم صارت رواتبهم؟؟؟
اللي تنظف بس و ممكن تمسك أطفال و ممكن لا ( حسب مزاجها) راتبها 1300 ريال و ممكن تقولك 1400ريال
و اللي تنظف و تطبخ ( 1600 ريال و بعضهم 1700 رريال...و أحدث شي الآن اللي تطبخ 1800 ريال حتى لو في شغالة أخرى في البيت)

و الآ انتشرت كثييييييير ظاهرة خادمتين في بيت واحد.. يعني وحدة تنظف راتبها 1300 و التانية تطبخ راتبها 1600
المجموع=2900رياااال
يا نااااااااااس راح اتجنن
عشان كدة كل شغالة تجيني مهما خففت عنها الشغل مهما رفعت راتبها موووو عاجبها
بس طفشااانة و تبغى شغالة معاها تقوم تخرج من عندي و تدورر على بيت ناس يبغوا خدامتين

تخيلوا يا جماعة ايش اللي بيحصل معايا
كنت أجيب وحدة بـ1200 بس تنظيف و أنا أطبخ
بعد كدة تعبت و عملت عملية و الدكتورة حذرتني من الوقوف و الحركة الكثير
اتضطريت اجيب وحدة تطبخ.. كانت بــ 1300ريال ( هاذا زمان )
قعدت كم شهر و بعدها خرجت
قلت امكن لانها سمعت انه اللي يطبخوا صاروت بــ 1500 رريال
و بعد تفكير طويل قلت يلا الواحد يشترري صحته
و جبت وحدة بــ 1500 ريال اللي يسمع سعرها يقول اكييد فنااااااانة في المطبخ خخخخخخخ
اكلها عاادي جدا و ما تحسيها متحمسة تسوي شي جديد
مع كدة ما ضغطت عليها قلت بكيفه
و برضه قعدت شهر و نص و خرجت
جبت بعدها وحدة بنفس سعرها قعدت شهر و خرجت
و بعدها جبت وحدة بـ 1600 و تطبخ و تنظف قعدت يا ناااااس (( أسبووووووووووووع))
عارفين ايش قالتلي قبل ما تخرج؟؟؟
قالتلي : اللي يطبخوا دحين بــ 1800 ريال؟؟؟
تخيلوا بس

يعني أعاملها كويس و أرفع معاها و أخلي بنتي ترفع معاها و أشتري لها ملابس و احترمها جدا جدا
و مووووووو عاجبها
صاروا الخدامات عندنا لعاباااااااااات جايين يتسلوا مو يشتغلوا و ما همهم اتي طيبة أو لا
ما همهم شغل كتير أو قليل
و قت ما تطن في راسهم يخرجوا من غير سبب

طيب يا ناس انا ايش اسوي؟؟؟؟؟

اخاف اجيب فيزا تروح تسمع الاسعار و تشرد.. تسمع انه هنا وصلوا فوق الألف و قربوا للألفين و هي راتبها ألف..
و انا متأكدة لو زودتها برضه راح تحس انه الشغالات التانيات مرفهات و مرتاحات اكتر منها.. و لو شردت نكون نحن خسرنا تكاليف استقدامها اللي توصل 9 آلاف..

و زوجي يقوللي أبدا ما نجيب فيزا لانه الفيزا بالحظ يا صابت يا خابت و انا مو مستعد ادفع 9 الاف على شي مني عارفه..و في الاخير تروح تشرد... لأنه ظاهرة هروب الخادمات عندنا في جدة كثيييير مرررررررررررة..

أدري طولت في الكلام
لكن سؤالي الأخير
إييييييييييش الحل؟؟
بليز ردوا عليا؟؟

اللي قالولي جيبي فيزا و لا تخلطيهم بالشغالات .. كييييييف ما أخلطهم..؟؟؟
لو رحت أي عزومة راح احتاج آخدها معايا عشان تمسك بنتي الصغيرة و لو ما أخدتها عاد راح اجري ورا بنتي أجل مالها داعي اروح أصلا..
و لو فرضا ما أخدتها معايا العزايم.. فقط لو آخدها معي المنتزهات و محلات التماشي و أسوق برضه ما راح أسلم من الخادمات اللي هناك.. اصلا مجرد يحسوا انها فيزا راح يحاولوا يستغفلوني عشان يوعوها..يعني شي مررررررررة قلق
أنا عايشة في جدة و أدري باللي يصير آآه بس..