حيا الله اللي نورت موضوعي ..
موضوعي هالمرة أساليب وطرق بسيطة تعزز الثقة بالنفس ..
لي أكثر من 5 سنوات وأنا أقرأ بها الموضوع لأني أحس إني ينقصني الثقة بالنفس شوي من قبل زواجي ..
صحيح تحسنت كثيييييييير بعد الزواج بفضل من الله ،،
لكن مع المحاولات والقراءة في هالموضوع الحمد لله أحس إني راضية عن نفسي ولله الحمد ..
أنا راح أحطها على شكل نقاط .. شي منها أنا جربته بنفسي وشي لا قريته وطبقته ..
أولاً: لما تكونين بالبيت .. حاولي تكونين دائما مرتبة .. ـ أقصد هنا اللي ماتزوجت لأن المتزوجة ما يحتاج نقول لها أصلاً ـ :biggrin: ترتبين من شكلك وتحطين كحل بسيط وغلوس ناعم وبنوتي وتعطري .. يعني ريحتك دااائما حلوة باستثناء وقت الطلعة للسوق أو غيره .. يعطيك إنتعاش وراحة ويحسن نفسيتك شوي .. حطي مناكير في الأوقات اللي ما تصلين فيها .. اهتمي ببشرتك وشعرك .. وأنتي أكيد أعرف مني في الأشياء هذي ..
ثانياً: لما تروحين عند الناس أثناء دخولك لمجلس الحريم وقبل سلامك عليهم قولي السلام عليكم بصوت مسموع ومو عالي مره وحاولي تدخلين وأنت رافعة راسك واعطي الجميع نظرة سريعة وشاملة وحلوة لكل اللي في المجلس .. وادخلي وأنتي مبتسمة ابتسامة طبيعية وغير متكلفة .. فيه ناس يدخلون بابتسامة باين إنها مصطنعة .. أنتي لآ تكونين كذا أبداً حاولي تكون تصرفاتك تكون طبيعة جداً .. وادخلي وأنتي تتخلين نفسك نجمة مشهورة أو شخص عاجبتك شخصيتة تلقائياً تتقمصين شخصيته ..
ولما تسلمين اسألي عن الحال وحسسي اللي تسلمين عليه كأنه هو الوحيد اللي في قلبك وتحبينه حتى لو إنك ما تعرفينه سوي نفسك كأنك تعرفينه من زمان..
بعض الناس لما أسلم عليها ما تسأل ولا ترد حتى لما أسألها عن حالها ترد بهمس أو حتى بس تحرك شفايفها بدون صوت الحمد لله << صغرتها عشان تفهمون القصد :biggrin:
ثالثاً: لما تقعدين حاولي تحطين رجل على رجل بطريقة حلوة ومحترمة وما فيها أي إحتقار للغير والظهر مستقيم ..عودي نفسك في البيت على استقامة الظهر لأنه يحسن من الشكل ويجمل حتى اللبس .. إذا ما تقدرين فيه حزامات خاصة بالظهر تباع في صيدليات شارع الضباب .. خصوصاً للي أقل من سن 23 مرره حلوووة وتعدل شكل الظهر ..
نرجع لموضوعنا .. لما تحطين رجل على رجل انتبهي ..!! فيه بعض الناس يخلون باطن القدم في وجه اللي جنبهم.. أو يميلون في القعدة وتصير المؤ... في وجهه بعد :angry2:<< أكررررررررههم من قلب واستحقرهم اللي يسوون هالحركتين..
مع ابتسامتك الحلووة لاتنسينها ,, الإبتسامة الواثقة مو البلهاء:p
رابعاً: الشي اللي ما تعرفينه ما يمنع إنك تسألين عنه بأسلوب لبق مو عيب ولا شي .. كل إنسان خلق وهو ما يعرف شي .. على الأقل أحسن من اللي تهايط وتسوي نفسها تعرف وهي ما تدري وين ربي حاطها ..
تذكرت قصة واحد فقير ومنتف قرر إنه يتمرد على فقرة ويجمع اللي عنده ويسافر بالسفينة .. وفعلاً سافر وأخذ معه خبز وجبن وأشياء بسيطة عشان ياكلها في السفينة ..أثناء الرحلة يشوف الناس ياكلون من مطعم السفينة مما لذ وطاب وهو يتحسر على حاله .. آخر يوم في الرحلة قرر ياكل من المطعم عشان لو سأله أحد يكون عنده علم وعارف وشو المطعم .. اكتشف إن الأكل مجاني داخل ضمن سعر التذكرة ..!!
لو إنه سأل قبل كان ارتاح لكن خجله وعدم ثقته بنفسه منعته من السؤال ..!!
وهذا حالنا نخاف يضحكون علينا الناس ونخجل من سؤال ..
أحياناً يكون غرور اللي قدامنا هو اللي يضعف ثقتنا بأنفسنا ..
لكن للمعلومية المغرورة واللي تفتخر بكل شي ,, ترا ما عندها ماعند جدتي ..!!:tongue3:
يعني أنا أعرف عائلة غنية مرررررره ماشاء الله تبارك الله .. أول زواجي رحت لهم عزموني .. أول مره أشوفهم دخلت وأنا مرتبكة .. كيف بيكون وضعي .. لقيتهم جداً متواضعين وكأني أعرفهم من سنين وحتى لبسهم عاادي جداً .. كأنه لبس مدرسة رايحه للمدرسة ..!! تنانير سوداء وبلايز عادية ..! :humm:
لأنه عارفين إنه عندهم فما يهمهم كلام الناس ..
وأنتي ما عليك من المنتفين ..
خامساً: لما تتناقشين مع أحد قولي رأيك وبكل صراحة وبدون تجريح إذا كنت على حق لا تتنازلين عن رأيك ولا تنهزمين .. وإذا حسيتي إن اللي قدامك عنيد قولي أحترم رأيك لكن لكل منا وجهة نظرة واختلاف الرأي لا يفسد للود قضية .. وأنهي الموضوع بكذا تكونين تبينين له إنك ما انهزمتي ..
كثير منا ـ وأنا كنت كذا ـ إذا شفت إنه عنيد أحاول أجاريه وأخليه هو اللي صح حتى لو داخلياً كنت مو مقتنعة برأيه .. بس انهزاميتي وعدم ثقتي كانت تلغي جزء من شخصيتي ..
لكني حاولت وحاولت .. وأحياناً يهاوشني زوجي ما يحب الانهزامي قدام الناس لين ما تعدلت ولله الحمد والمنه
أخيراً : دائماً رددي ,, أنا حلووة وجميلة وش ينقصني ..
أنا أحسن من غيري .. أنا واثقة من نفسي ..أنا لي شخصيتي
أنا أسوي الشي الفلاني لأني أبيه مو عشان فلانه سوته ..
أنا أحب الشي الفلاني .. ماعلي من اللي يحبونه الناس ..
عشان تستقلين بشخصيتك ..
ختاماً إذا أعجبك موضوعي لآتنسيني من دعواتك ..
سلمت اناملك يااعسل