أســرار عجـينتي القطـنيه الي الكل يمدح فيها ورب البيت ..

السلام عليكم ورحمة الله وبركاته

اول مره احط موضوع بهالقسم وان شاءالله الجايات اكثر
لانكم ماقصرتوا معي فديتكم ودايم استفيد منكم قلت افيدهم بشي من اللي اطلعت عليه

عجينتي الحمدلله قطن قطن بشكل ماتتخيلونه وريحتها تهبل ولو بقى شي زياده تقدرين تدخلينها الثلاجه
وتطلعينها من بكره وهي نفس الريحه والطعم مايتغير

اقولكم ع عجينتي وبعدها بقولكم الاسـرار معها

3 كاسات دقيق المروه او دقيق كويتي كلها نفس الشي
اخذ كاسين واحطها في زبديه وكاس اخليه ع جنب
احط ع الكاسين ملعقة ونص كبيره خميره فوريه
وملعقة ونص بكنج بودر
وذرة ملح
وثلاثة ارباع فنجال سكر
وتقريبا ثلاثة ارباع او نص كاس لبن او حليب السعوديه او زبادي
اهم شي تضيفين حاجه من مشتقات الحليب
بعدين تضيفين مويه دافيه اهم شي دااافيه مايله للحراره
مو تحطينها حاره ترى بتخرب العجينه وماتطلع لتس بالقوام الي تبينه
وتعجنين لين تحصلين ع الليونه اللي تبين
شفتوا كاس الدقيق اللي خليناه ع جنب
هذا ضيفوه شوي شوي مع الزيت لين تتماسك العجينه وماتصير تتلصق باليد
واذا صارت العجينه قاسية شوي عقب ماعجنتيها عادي حطي شوية مويه ودقيق حاجه بسيطه
وشوية زيت عشان ماتتلصق باليد
خلاص ناسبتس العجينه وليونتها
يله ادهري واعجني واعجني من سبع الى عشر دقايق
راح تنتفخ العجينه وانتي تعجنينها ترى هذا اكوس شي معناها شغلتس اوتسي

يله خلصتي غطيها في مكان دافي وخليها تتخمر ع راحتها من نص الى ساعه الا ربع
واذا مستعجله عادي ابدي الشغل مافيه مشكله
بس قبل لاتدخلينها الفرن سواء خليتيها تتخمر او بديتي الشغل
خليها عشر دقايق عشان تنتفخ الفطاير او البيتزا مثلا وتكوني بهالفتره مشغله الفرن
لان لما تدخليها والفرن بارد راح تقسى وتطلع تفشل
وكلما كان مدة جلوسها بالفرن قليله راح تضبط معتس ان شاءالله
_ اول ماتطلع من الفرن ع طول خليها تفك حرارتها شوي بعدين اكتميها داخل حافظه
طبعا حطي تحتها ورق نشاف عشان يمتص البخار ومن فوقها بعد

واستمتعي باحلى والذ واقطن معجنـات و على قلبتس بالعافيــه :27:
بس انتبهي لاحد يدمن معجناتكم وتبتلشون خخخ
يله حبيباتي نشوفكم ع خير
واي استفسار انا حاضره بخدمتكم
فتكوا بعافيه