أسهل تورته في العالم تورته الجيلي الرهيبه

💥💥 الحر ده عاوز حاجه ترطب ☀️🏖️ قررت اعمل تورته بتكلفه قليله وتكون اقتصاديه لو عندك كوب دقيق باكو جيلي تعالى نعمل احلى تورته تفرحي بيها أولادك
🔴 المكونات
كوب دقيق(الطحين)
نص كوب سكر
3 صفار بيض
3 بياض بيض (يعني 3 بيض تفضلي الصفار عن البياض)
نص معلقه صغيره بيكنج بودر
نص معلقه صغيره فانيليا
نص كوب ماء
زيت
3باكو جيلي
سكر
💥💥💥💥💥💥💥💥💥💥💥
🔴 الطريقه
هنحط المواد الجافه مع بعض الدقيق عليه البيكنج بودر على الفانيليا ونقلبهم ونسيبهم على جمب.. وبعد ما فصلت البياض في بوله والصفار في بوله تانيه نبدأ نضرب في كل واحد البياض لحد مايعمل فوم معايا ويوصل للقوام اللي موجود في الفيديو👌والصفار نضرب فيه لحد ما لونه يفتح ويكون ابيض.. خلاص ضربت الصفار والبياض ناخد معلقه من البياض نخلطها على الصفار لأن قوام الصفار تقيل مش هينزل معايا بسهوله عشان كده بنحط عليه معلقه من البياض عشان قوامه يكون سلسل معايا وسهل اني اخلطهم على بعض.. خلطهم على بعض خلاص ونحاول مانخرجش الهوا اللي موجود فيهم وننزل بيهم في صنيه وعلى الفرن ويكون ساخن مسبقا ب10 دقائق قبل ما ادخل الصنيه على درجه حراره 180 مش بتاخد وقت نلاحظها على طول خلاص بدأت انها تستوي نختبرها بالله قبل مانطلعها ولما تخرج اسيبها تبرد خالص وتعالى نجهز الجيلي مع بعض على ما الكيك تبرد😂معايا 3 باكو من الجيلي وطبعا كلنا عارفين الجيلي بيتعمل ازاي. تيجي واحده تقولي طيب هو اصلا بيتعمل ازاي 😂هقولها تعالى لما اقولك على كل باكو جيلي كوب ميه بارده وكوب مايه سخنه و2 معلقه كبيره سكر. بس كده ياستي وهتعملي احلى جيلي.. ندخل في موضوعنا خلاص عملنا الجيلي هنسيبه في الحله وندخله الثلاجه اه وربنا زي ماسمعت كده بس قبل ماندخله الثلاجه ناخد شويه في الصنيه اول اي حاجه هنعمل فيها التورته كده تمام 🤔وندخل الحله والصنيه التلاجه اول ما الجيلي يبدأ يمسك في الصنيه نكون مقطعين فراوله ونرصها في الصنيه وندخله الثلاجه تاني تتماسك اكتر عشان الفراوله تثبت تيجي وحده تقولي طيب ما كنا نحط الفراوله قبل ماندخل الجيلي الثلاجه هقولك لا ياناصحه لو حطينا الفراوله والجيلي لسه ميه الفراوله مش هتثبت في مكانها 🤨خلاص طبقه الجيلي والفراوله مسكت وبقت كويسه نخرجها ونجيب الكيك اللي بردت معايا وهحطها على الجيلي والفيديو بيوضح الطريقه بالتفصيل👌استنوا نسيت اقولكم⚠️⚠️⚠️ الصنيه اللي هنعمل فيها الكيك هي اللي هنعمل فيها الجيلي...وبعد ماحطينا الكيك هنجيب الجيلي اللي لسه ماجمدش في التلاجه لسه سايب شويه بس مش ميه عشان الكيك ماتش به وتعجن 🙄 ونجيب كيس ثلاجه ونحطه فيها ليه عشان نتحكم واحنا بنحطه عشان مايبهدل الدنيا كده تمام. ونيجي على أطراف الصنيه نحط الجيلي هنملي الفراغات اللي بين الكيك والصنيه..خلاصنهم كده تمام نحطه في الثلاجه تاني لحد ماتتماسك...معلش بقى اتكلمت كتير بس عاوزه أوضح الوصفه والخطوه الصغيره قبل الكبيره.. ممكن تقولي الوصفه خطواتها كتير لكن بالعكس هتعمليها وانتي بتعملي اي حاجه في المطبخ اللي مش بنخرج منه 😭بإذن الله تجربوها وتعجبكم. وبالف هنا على قلوبكم❤️❤️❤️❤️❤️❤️