أشك ان ام زوجي ماتصلي

السلام عليكم

بنات لي فتره وانا متضايقه وابي مشورتكم
انا وحده لي 9 سنوات متزوجه وكل اموري تمام والحمد لله
المشكله مو فيني المشكله في ام زوجي ماعمري شفتها تصلي هي مره حبوبه وتحط على الجرح يبرى
الكل يحبها ولسانها يقطر عسل وتموت فيني
بس المشكله اني ماعمري شفتها تصلي ولا عمره حثت عياله على الحج والعمره ولاتجيب طاري الصلاة بشي
اكيد بتقولون انتي ماسكنتي معها عشان تعرفين بقولكم صح بس انا كل يوم اربعاء نكون عندهم من العصر الى 12 باليل ماتتحرك من مكانها الا تروح للحمام وبس
وايام الشتاء نطلع مخيمات من الظهر الى 2 باليل ماعمري شفتها تصلي بس قاعده هي ماشاءالله لها 7 بنات معقوله مالاحظو
انا مااكفرها واتمنى اني اكون ماالاحظ او هي تصلي وانا ماادري بس انا ملاحظه ومتاكده مره بس الله لايحط بذمتي شي

وفي مره كنت توي جايه لم اهل زوجي والاقي عمي اللي هو ابو زوجي عند الباب بيروح يصلي
واسلم عليه وقوله وشلونك طيب يقولي يابنيتي مانب طيب عندي هالمره غاثتن انا ماابي منها شي
ماابي منها الا انها تصلي قسم بالله يابنات كأنه احد كب علي موية حاااااااااااره تفاجأة ماقدرت اتكلم ولااقول شي
وهو راح يصلي وخلاني
دخلت عليهم وانا منصدمه يعني شكوكي اكيد في محلاها

فابي مشورتكم وش اشوي مقدر اقول لزوجي وش اقول له امك ماتصلي الصراحه قويه ولااقدر اقول لخواته بعد
مهما كان انا مرة اخوهم وانتم ابخص مع انهم يموتون فيني بس صعبه

لو افكر احط عندها شريط عن الصلاة اصلا هي ماتحب المسجل ولاعمري شفته تفتحه
وش رايكم بكلامي معقوله اكون انا اتوهم ولا وش السالفه ساعدوني اخاف تموت وهي ماتصلي !