أشلون أخلي شغالتي اليديده تكون مثاليه ...

أخواتي العزيزات
أنا محتاجة مشورتكم في موضوع وايد متعبني نفسياً ... انا أمرأه عاملة ولو ما مضره أشتغل كنت ما أشتغلت ... المهم ما علينا ... أنا عندي ولد واحد ... وال ثاني بالطريج الله أجومني بالسلامه وكل نساء المسلمين ... أنا عندي شغاله مسلمه من أندنيسيا صار لها عندي سنتين وراح تخلص مدة شغلها شهر 9 الجاي ...وما تريد ترجع مرة ثانية ... الحين أحنا مقدمين على شغاله جديدة والله يرزجنا وحده زينه... المهم بالنسبة للشغاله الحالية أنا صراحة دلعتها من أول يوم وصلت فية ...انا وزوجي طبيعتنا ما نحب الأكل وايد يعني يا دوب أذا اتذكرنا ناكل شي ... وجبة الفطور والعشاء ما ضروريات بالنسبه لنا ... والشغاله أتعودت انها ما تسوي الصبح شي حتى شاي ما تسوي علشان أحنا نشرب في الدوام ... والعشا اي شي خفيف ...لبن ... روب ... يعني ابو وام الخفايف...
وللعلم احنا لما نروح الدوام الشغاله وابني انزلو بيت أهل زوجي (أحنا جيران)... والدته ما مقصره هيه تمسك الولد والشغاله تسوي الغدا ... الله اخلي لي عمتي يا رب ... ما شي منها... وأحنا على هالمنوال صار لنا سنتين ... والشغاله أول ما تخلص الغدا ويتغدو تطلع بيتنا قبل ما نوصل بنص ساعة وترجد الولد ... وعاد ما تنزل بيت أهل زوجي ألا اليوم الثاني ..
المهم بيتي صغير ... يعني ما شي وسخ ...علشان ما شي يهال وايد... الملابس والكوي شوي ... يعني الخلاصه الشغاله عايشه بعز ... وصارت ما تهتم ولسانها طويل ... اذا جلتي لها كلمه ردت بعشر ... واذا وصار أن عمتي مريضه ولا رايحه مكان وطلبنا منها تنزل بيت أهل زوجي أتسوي شاي ولا تغسل صحون أنتفخت علينا أسبوع ... والحين أنا صابره عليها علشان ولدي وما أريد أحتك فيها ولا أتنزع علشان ما تسوي فيه شي ... مع والحق ينقال أنها وايد حنونه معاه وما شفت عليها شي من هالناحية وولدي هم يحبها ويرتاح لها ...
ما علينا الحرمة بتروح والله أسامحها ويسامحنا اذا غلطنا عليها في شي... الحين أنا أدعي ربي كل يوم أن يرزجني شغاله زينه تحافظ على أولادي وبيتي ..وما تسد نفسي على الطالع والنازل ...المشكله أنا وزوجي وايد طيبين وخاف أتيي الجديده وتتعود على نفس الأسلوب علشان أحنا ما شديدين معاها ...

خواتي الله أخليكم نصحوني وش أسوي ... ممكن ألي عندها تجارب تشاركني فيها وتنصحني ترى ما أريد أظلم حد ... بس هم أريد وحده زينه أعتمد عليها ... أريد وصفه أتخلي شغالتي اليديده شغاله مثالية ... هل هالشي مستحيل ولازم أقبل بالواقع ولا أشلون ...
طلبتكم يالغاليات فلا تردوني....