أشهر الحرائق في تاريخ مصر

من فترة حدث جدل كبير على مواقع التواصل الاجتماعي بعد الحرايق اللي حصلت في شارع الرويعي بمنطقة العتبة وغيرها من المناطق في قلب القاهرة زي الغورية وغيرها ، الحرايق كانت كبيرة وخلفت وراها خسائر كتيرة ، علشان كدا كان لازم نتكلم عن أهم الحرايق اللي اثرت في التاريخ المصري .

القاهرة 52
في 26 يناير سنة 1952 اندلع حريق في أكتر من 700 محل وسينما وكازينو وفندق ومكاتب ونوادي بمنطقة القاهرة ، الحرائق فضلت ممتدة مابين الساعة 12:30 ظهرًا لغاية الساعة 11:00 مساءًا، التهمت اشهر المحلات والفنادق والمكاتب في مصر زي شيكوريل وعمر افندي وصالون فيردي وفنادق زي شبرد ومتروبوليتان وفيكتوريا وسينمات زي ريفولي وراديو ومترو وديانا وميامي ، وللعلم لغاية دلوقت الفاعل والجاني اللي تسبب في الحريق مجهول.
الأوبرا المصرية
في 28 أكتوبر سنة 1971 ، التهمت النيران مبنى الاوبرا بوسط البلد، اللي كان مبنى ذا طراز معماري مميز وفريد ، تم تدمير المبنى اللي كان مصصم من الخشب بجميع الملابس والديكورات والإكسسوارات والتحف ولغاية دلوقت بردوا السبب مجهول رغم ان في ناس بتقول ماس كهربائي .
قصر ثقافة بني سويف
في 5 سبتمبر سنة 2005 وبعد انتهاء العرض المسرحي في قصرثقافة بني سويف اشتعلت النيران وقت تحية الفنانين للجمهور التهمت النار كل الموجودين في القاعة وماقدرش رجال الحماية المدنية إخماد الحريق إلا بعد ساعتين من اندلاعه ويقال أن سبب الحادث كانت سقوط شمعة ضمن ديكورات العرض أدت إلى ثلاثة انفجارات دمرت قاعة المسرح بشكل كامل .
مجلس الشورى
في 19 أغسطس سنة 2008 حدث حريق كبير في مبنى مجلس الشورى بالقاهرة واستمر الحريق لغاية اليوم التالي لأكثر من 16 ساعة وتسبب في تدمير المبنى بالكامل .
المجمع العلمي
في 16 ديسمبر سنة 2011 اشتعلت النيران بمبنى المجمع العلمي بالتحرير بعد الاشتباكات اللي حصلت بين قوات من الجيش والمتظاهرين اللي كانوا معتصمين في التحرير خلال أحداث مجلس الوزراء فشلت وقتها قوات الإطفاء في السيطرة على الحريق ليتسبب الحريق في تدمير عشرات الألوف من الكتب والمخطوطات والوثائق العلمية والتاريخية لدرجة أنه لم ينج من المخطوطات والوثائق الكتب الاثرية اللي كان عددها 200 ألف وثيقة سوى 25 ألف فقط .