النهاردة انا جيبالكم طريقة عمل اصابع الجلاش بالموز و كانت طعمها تحفة
انا اعشق الموز و كمان بحب احشى بيه اغلب حلوياتى باختلافها لكن انا اول مرة اجرب احشيه بالموز و النتيجة كانت رائعة شكلا و مضمونا ههههههههههههه حلوة شكلا و مضمونا دى
و ادى صورة تشويقية فى الاول
المهم يالا بينا بسم الله نبتدى
المقادير
نصف كيلو جلاش
5 او 6 صوابع موز
م ك قرفة
مكسرات
كمية من السمن السائح او الزيت لدهن الجلاش
سمسم للزينة ( اختيارى )
الشربات
الطريقة ***سهلة جدا
1- تجيب روقة الجلاش و نفردها بالطول ندهن نصها بالزيت و نتنى النص التانى عليها
2- و بعدين ندهن تانى الجزء المتنى و نسيب جزء فى الاخر مش مدهون عشان نحط فيه الحشو
اما بالنسبة للحشو ( اهرسى الموز كويس و بعدين حطى عليه القرفة و المكسرات
و قلبيهم كويس) و بعدين قطعى ورقة الجلاش نصين و لو بتحبيه صغير قوى اقسمى
ورقة الجلاش ل3 بالطول و خدى بالمعلقة الصغيرة من الحشو و حطى الجزء اللى
مش مدهون المخصص للحشو
3- و بعدين تتنى الحرفين بتوع الجلاش و تلفى لحد يعمل الصوبع او ممكن تلفى الجلاش بالحشو لفة و بعدين تتنى حروفها و بعدين تكملى لف
و الكلام دا عشان مفيش حاجة من الحشو تقع بره الجلاش و فى نفس الوقت بيدى شكل حلو للجلاش من الجنب
و بعد ما تخلصى لف الصوبع هاتى صنية تكون مدهونة زيت و ترصى فيها صوابع الجلاش
4- ادهنى وش الجلاش اللى فى الصنية زيت و زوقيه بالسمسم و حطيه فى فرن يكون ساخن
5- و طبعا تكونى محضرة الشربات من الاول ...و اول ما تحمر صنية الجلاش طلعيها من الفرن هتكون كدا
و اسقيها بالشربات
و استنى عليها شوية لحد ما تشرب الشربات و ترص فى طبق و تقدم و كلى منها ودوقى احلى جلاااااااااش و ادعى لاختك ام يحيى و مازن
و بالف هنا :21:
فى رعاية الله :smile:
