ضحى أحمد :

السلام على الجميع .. اكتب لكم الآن وانا باكل لب وسوداني بمختلف انواعه .. بغيظكم يعني .. بالمناسبة اللب او الفصفص او الحب وكلها مسميات لجريمه واحده بيطخن جدا يعني الي ناويه تعمل العملية او عملاها تبعد عن الحاجات دي تماما او تاكل بس تعتبر ده وجبتها .. يعني امبارح نمت من غير عشا بس تعشيت لب وسوداني .. نعود لموضوعنا .. ضحكة امي .. مش عارفه والله التحوير بتكلف كام بالظبط لكن سمعت من زمان انها بـ 65 الف جنيه ( الريال السعودي يساوي جنيه ونص ) ووحده في المنتدى قالت لي من كام يوم انها سألت ولقيت التحوير عند خالد جودت بـ 100 الف جنيه .. معرفش ان كان الرقم دقيق ولا لاه .. بس على كل حال اعملي سيرش في النت على اسم الدكتور ده ( خالد جودت ) هو الي عمل لديانا كرزون بس على فكره اظن ديانا عامله تدبيس مش تحوير .. وعلى فكره برضه لاحظي شكلها بقى عامل ازاي سيبك من جسمها ماشاء الله نحف لكن الوجه شوفي عامل ازاي والاهم انها معادتش بتضحك زي زمان نهائيا .. نفس الي لاحظته على ليلى علوي .. نحف ممتاز لكن الابتسامه اختفت نهائيا .. نفس الي لاحظته علي برضه كل صوري لاحظت فيها حزن واضح جدا بينما صوري القديمه مبتسمه معادتش ابتسامه زمان دي معرفش ليه .. ماعلينا برضه .. المهم اعملي سيرش هتلاقي له موقع على الانترنت وفيه كيفية الاتصال بيه راسليهم واسأليه بالظبط التكلفة كام وهو هيرد عليك .. على كل حال حاولي بكل السبل تعمليها في مستشفى حكومي عندكم ولو مفيش امكانيه فكري في السليف هي على مااظن هتكون ارخص من التحوير وفي كل الاحوال انتي مضطره تغامري طالما معدل السمنة عندك عالي .. بس على فكره في وحده كانت معانا هنا في الرابطه الله يذكرها بالف خير وكان وزنها 140 ماشاء الله تبارك الله نزلت للثمانينات على مااذكر يعني نزلت اكتر من خمسين كيلو ماشاء الله ربنا يحميها .. كل ده بحزام بس ولا تدبيس ولا تحوير لكن كانت بتلعب رياضه وسباحه والتزمت تماما تماما بكل الي قاله لها الدكتور وعملت دايت وكل شيء يعني عملتها مسألة حياه او موت وفعلا ماشاء الله تبارك الله جابت نتيجه احسن من الي عاملين تحوير كمان .. بالمناسبة لاحظت حاجه غريبه جدا .. اني نزلت 25 في المية من وزني ووقف النزول على كده وبرضه قريت مشاركه لوحده مامتها كانت عامله تدبيس ورجعت ردت وزنها وحسبت المقدار الي فقدته كان بالظبط هم الـ 25 في المية من وزنهم ووقف على كده .. ياترى في حد نزل وزنه بمعدل اكبر ؟ ياريت حد يديني امل لاني خايفه يكون ده آخر النزول وابدأ تاني في مشوار الزياده ..

السلام على الجميع .. اكتب لكم الآن وانا باكل لب وسوداني بمختلف انواعه .. بغيظكم يعني .....