أضرار الدارسين عن تجربة ( نصحوني )/قديم

السلام عليكم ورحمة الله

حياكم الله جميعا
انا بصراحة سجلت بالمنتدى عشان أطرح عليكم مشكلتي هذي وان شاءالله ألقى عندكم حل


أنا من فترة أشهر هبيت بشرب الدارسين إذا جتني الدورة ، ومصختها حدددددددددي ! كنت اشرب يوميا ! لا ومو استكانة وحده ! ثلاثة أربعه لما أخلص كل الي سولي إياه : )
عبالي مفيد ( عرفت الشي من قرده على قولتهم ) وأظن كنت حتى سادس يوم أشرب ، عبالي قعد اسوي شي زين،
المهم شصار بعدين ؟

بعدين الله يسلمكم ، الدورة الي كنت شاربه فيها دارسين ( أنا شربت أكثر من دورة بس آخر وحدها شربت لها ) لما خلصت غسلت وبعد يومين تقريبا نزل علي دم مرة ثانيه ( أول مرة بحياتي يصير جذي ) وبعدين قام ينزل يوميا وانا يعني تدودهت اول مرة ، فهديت الصلاة ايام بعدين لما تعدى ال15 يوم قالوا هذا مو حيض ، هذا استحاضة صلي، المهم أظن استمر معاي الدم ثلاثين يوم تقريبا ،
ورحت الطبيبة وعطتني حبوب orgamental أكلها لي تاريخ معين وأهدها فسويت جذي ، ولما صار وقت العادة الثانية صار نفس الشي!!! اغتسلت وبعد كم يوم قام ينزل دم !!
ولما رحت وسويت سونار قالت لي إن رحمي " عايش الدور " إن علي العادة !
وعطتني هل حبوب قالت اخذهم يوميا اثنين وقبل الدورة بيومين تقريبا اوقف عشان تنزل الدورة وخامس يوم الدورة اكلهم مره ثانيه ثلاثة اشهر ، وسويت جذي ، الحين انا جايتني الدورة خامس يوم بس ما راح اخذهم لأن خلصت ثلاثة أشهر (يعني أخلص الكورس مع هل دورة ) ، والحين اخاف ينزل علي مرة ثانيه بدونهم : ( والدكتورة قالت اصلا يمكن يرد .

انا لما قلت حق الناس شسويت وشصار قالوا لي مجنونه شلون تسوين جذي ! وقالوا لي اصلا هذا الحوامل يشربونه عشان يوسع رحمهم مادري يرخيه ( شي كذا ) وقالوا لي وحده شربت دارسين مصختها بعد ونزل رحمها !! وقالوا لي أصلا الدرسين بس يشربونه أول يوم دورة ويهدونه ! مو نفسي لي آخر يوم !

المهم يعني خرعوني ، وزعلت وضاق خلقي :"(
وأمس قلت حق رفيجتي وقالت حق أمها ( هم يعرفون بهل سوالف ) قالت أمها أصلا رفيجتك أكيد رحمها مرتخي ! خل تشرب " طبيخة " الطبيخة تشد الرحم ، تشربه كل يوم دورة ، وقالت خل تشيل منها الحلبة والدارسين وخرزة الكمر .

مادري شرايكم يا جماعة الخير ؟
من جرب الطبيخة هذي ؟ وشنو نتايجها ؟
ومن عنده أي فكره شصار برحمي من الدارسين ؟

أنا أكثر من وحده قالت لي الطبيخة تشد الرحم وقريت بالانترنت بعد ، بس أنا خايفه أشربها لأني تعقدت عقب الدارسين ، وقالوا لي إن الأعشاب خطره مو على كيفج تاخذين ، لو تزيدين شوي مثلا ممكن تصير نتائج عكسية ( مثل الي صار لي ) ، ولأن وحده قالت لي ما أشرب الطبيخة لأن مو زينه حق حالتي قالت الطبيخة تنزل الدم وانتي ما تبينه ينزل (بس هالمرأة مو شرط يؤخذ بقولها في هذا الباب : ) لأن ما تعرف بطب الأعشاب وكذا ، وأصلا ماعرفت الطبيخة لما قلت لها ، بعدين قرت عنها بالانترنت وعرفتها .

وسلامتكم ، سامحونا عالطوالة

وياليت تساعدوني .. ترى زعلانه شوي : (

ورحم الله من أعان مبتلى ، والله في عون العبد ما كان العبد في عون أخيه