أطباق الخير و البركة مقادير واحدة لعدة أطباق الرجاء عدم الرد

جمعت الأطباق معا لأنو من الصعب تصفح 28 صفحة لغاية الآن هيك بكونو كلهم مع بعض

قبل ما أكتب الطبق الأول .. أحب أذكر لكم المقادير الثابتة اللي راح تمر معنا في جميع

الطبخات .. وهي /

4 بيضات ، بيالة زيت ، بيالة حليب جاف ( نيدو مثلا ) ، بيالة طحين أبيض ، ملعقة
صغيرة P.B

وهذي صورة البيالة :



تخفق المقادير بالترتيب في الخلاط الكهربائي .. ثم يصب الخليط في صينية بايركس متوسطة .

هذي المقادير ثابتة .. والطريقة هي نفسها بتستمر معنا على طول ان شاء الله ..

يعني ماله داعي كل شوي أكتبها ..

انتي راح تستعملين نفس المقادير ، وتسوين نفس الطريقة في كل طبق

وإذا كان فيه مقادير إضافيه راح أذكرها لك

وبإذن الله راح تفهمون الفكرة مع الطبق الأول:

( فطيرة الزيتون )

المقادير الأساسية والطريقة : ذكرتها لك في البداية

المقادير الإضافية : زيتون شرايح أسود وأخضر

بعد ما تصبين الخليط في الصينية تنثرين فوقه الزيتون ، وكل ما كان أكثر بيكون الطعم

أحلى ..

بعدين تدخلين الصينية لفرن حرارته هادية ، وتحمرينه من تحت بعدين من فوق..

بعد ما تطلعين الصينية قطعيها مربعات .. وقدميها للحبايب

وعليكم بألف عافية ..

اترككم مع الصور :




















( فطيرة الدجاج بالجبن والزعتر )

المقادير الأساسية :

ان شاء الله انكم عرفتوها .. واللي داخلة الموضوع للمرة الأولى ترجع للصفحة الثانية

المقادير الإضافية :

1- دجاج مفروم ( الجاهز طبعا ) مكشن ببصل وثوم وصلصة وملح وبهارات .. بإمكانك استخدام لفة كاملة أو صحن دجاج كله بالكامل إذا بغيتي الدجاج يكون كثير أو نصف حبة إذا العكس .. أنا استخدمت كاملة

2- جبن كرافت مبشور (اشتري علبة وأبشرها في البيت تطلع ألذ من الموزاريللا )

3- شوي زعتر ..

الطريقة :

بعد ما نسكب المقادير الأساسية في الصينية .. نرش عليها الدجاج المفروم ( بعد ما يكشن )



بعدين ندخلها للفرن .. وتحمر من أسفل ثم من أعلى

بعدما نطلعها من الفرن نرش على الوجه الجبن المبشور .. ونرش فوقه شوي زعتر

لأنها راح يعطي نكهة حللللللللوة :



ثم دخلي الصينية للفرن من الأعلى فقط حتى يذوب الجبن .. أوعلى حرارة الفرن تكفي ..

وإذا انتهيتي قطعيها وقدميها مع الأكل ..



كنت مسويتها مع العشا .. وأعجبت الجميع








طبقنا الثالث هو ( بيتزا سرييييييييعة وخفيفة )

في الخلاط نضيف رشة ملح ، ورشة فلفل أسود على المقادير السابقة ..

المقادير الإضافية :

كل المقادير اللي تحبين إضافتها للبيتزا ..

يعني : زيتون / فطر / فلفل بارد / نقانق .. طبعا فوقهم جبن مبشور

أنا استعملت : زيتون شرايح أسود وأخضر ، فطر ، فلفل بارد ، وقطع طماط صغيرة

أما الجبن بشرت جبنة كرافت أحب طعمها ..

طبعا بعدما نصب الخليط على الصينية .. نضيف فوقه مقادير البيتزا :



ندخل الصينية للفرن .. وتحمر من أسفل ثم من الأعلى :



بعد ما نطلعها من الفرن نرش عليها الجبن ، وندخلها مرة ثانية على حرارة الفرن

حتى تسيح الجبنة ..

تقدرين تاكلينها دافية مع كاس عصير .. أكيد راح تستمتعين بالطعم :



وترا ممكن ترشين على الجبن شوي زعتر ( وحدة ما تستغني عن الزعتر ) .. وكذلك

ممكن تستبدلين الطحين الأبيض بطحين أسمر ( بر ) تراه أحسن للصحة .. سواء في هذي

الطبخة أو في الطبخات السابقة أو القادمة بإذن الله تعالى ..

أتمنى أعجبتكم البيتزا ..

وبالهناااااااااااء والعااااااافية
( فطيرة البر بالنخالة )

نستبدل بيالة الطحين الأبيض اللي بالخلاط ببيالة طحين بر ، وبعدها بيالة نخالة ( تلقينها عند المطاحن )..
وفي الأخير تضيفين للخلاط :
رشة حبة سوداء ، أو رشة يانسون
بصراحة أنا فاتني أحط ، لكني أضفت شوي فلفل أسود علشان يلغي نكهة البيض
هذي صورة النخالة :



بعد ما ننتهي من الخلط نصب المزيج في صينية بايركس :



ندخل الصينية للفرن وتحمر من الأسفل ثم من الأعلى ..

وهذا بعد ما طلعتها من الفرن وقطعتها :



وهذي من قريب :



أتمنى تسوون هذا الطبق لأنه مفيد ..

لكن لا تاكلوه مع الشاهي .. تراكم بتلغون كل الحديد اللي فيه

كاس عصير برتقال أحسن وأفود ..

وإذا أصريتوا على الشاهي .. معليش باسمح لكم لكن اعصروا عليه ليمون

ترى صحتكم غااااااااالية علي









طبقنا الجديد هو ( فطيرة اللبنة بالزعتر )

المقاديرالإضافية / لبنة ، زعتر

بعد ما نسكب المزيج في الصينية ندخلها للفرن وتحمر من أسفل ثم من الأعلى ..

بعد إخراجها نتركها تبرد قليلا .. ثم ندهنها باللبنة ونرش فوقها زعتر

وهذا شكلها بعد التقطيع :








ممكن نستبدل اللبنة بجبن سايل ..

وتراها من جد لذيذة .. وتصلح حتى مع الفطور











حلى ( الجبن بالزعتر )

شكلكم راح تسموني ( زعتورة )

هذا الحلى سبق وكتبته في قسم الحلويات ..

المقادير الإضافية / بيالتين سكر ( تضاف للخلاط بعد البيض ) ، جبن كيري ، زعتر

واللي ما تبغى نكهة للبيض بإمكانها تضيف القليل من بشر الليمون أو فانيليا ..

الطريقة /

بعد سكب المزيج في الصينية نقطع جبن الكيري قطع صغيرة وتنثر فوق الخليط :



ثم نرش عليها زعتر بصورة بسيطة :



ندخل الصينية للفرن وتحمر ..

تقطع وتقدم :

شوفو شكل الجبن كيف متداخل مع الكيك :



تفضلوا حياكم الله :



ان شاء الله هذ الحلى راح يعجبكم
سويته اليوم مع الفطور لأن أهلي كانوا صايمين .. والحمد لله طلع ممتاز وطعمه لذيذ خاصة مع القهوة ..

المقادير الإضافية :
علبة فواكه مشكلة / 6حبات جبن كيري / ثلالة أرباع( أونصف) علبة حليب مركز كبير

الطريقة :
بعد سكب المزيج في الصينية نوزع الفواكه المشكلة على الوجه بهذي الطريقة :



بإمكانك زيادة الكمية مثل ما تحبين .. لكن أنا نثرتها بس على الوجه ..

ندخل الصينية للفرن وتحمر من الأسفل ..
في هذا الوقت نخلط في الخلاط الجبن مع الحليب المركز ..
بعد ما نحمر الصينية من فوق نطلعها من الفرن ، نصب عليها خليط الجبن والحليب
ندخل الصينية مرة ثانية للفرن لكن من الأعلى فقط ..
إذا بغيتي تعرفين إذا كان الوجه استوى مضبوط أو لا .. حركي الصينية ..
إذا تحركت الخلطة معناها تحتاج زيادة وقت في الفرن .. أما إذا ما تحركت الخلطة خلاص طلعيها من الفرن ..

وهذا الشكل النهائي :





أتمنى الحلى يعجبكم .. وأنتظر تجاربكم ..

باقي الأخوات راجعة لكم وراح أرد عليكم وحدة وحدة .. لكن لأني مشغولة كتبت هذا الحلى بسررررررعة وما قدرت أرد ..
دعواتكم ..
بنات معليش من الطفاقة نسيت أقول لكم بعد خلط البيض أضفت بيالة سكر وحدة ..
وبعد ما تستوي الخلطة اللي فوق نطلع الصينية من الفرن وندخلها للثلاجة لأن الحلى إذا كان بارد بيطلع أحلى ..
أهلين فيكم من جديد ..
هذا آخر حلى جربته وكان روعه تحسين أنه كيكه على بسبوسة .. عملته وكانت عندنا خالتي وبناتها و ما شاء الله الصحن ما بقى منه ولا حبه ..
شوفوا الصور أول شي :





طبعا المقادير الإضافية :
بيالة سكر بعد خفق البيض .. وترى مو لازم أربع بيضات ثلاث تكفي ..

بيالة سميد / عسل أوشيرة / جوز هند أو سمسم للزينه

الطريقة :
نخفق المقادير بالترتيب وبالطريقة اللي سبق وذكرتها .. وبعد إضافة بيالة الدقيق نضيف بعدها بيالة سميد ثم ملعقة البكينج باودر ..
بعد ما ندخلها للفرن وتحمر من أسفل ومن أعلى .. نطلعها ونخليها شوي بعدين نقطعها مربعات ثم نصب عسل أوشيرة ويفضل مسحة بسيطة عشان ما تصير حالية مرة .. بس لازم تكون حارة شوي علشان تتشرب، ثم نرش السمسم أو جوز الهند أو أي إضافة تفضلينها .. بالنسبة لي رشيت جزء سمسم وجزء جوز هند ..
وعساه مداخيل العافية يارب ..
حياكم الله من جديد .. ومع حلى آخر جديد..
المقادير الإضافية : قرفة / حليب مركز
طبعا في كل حلى لابد من إضافة بيالة سكر بعد البيض مثل ما تعودنا ..
نخفق المقادير بالترتيب في الخلاط .. بعدين نصب الخليط في صينية وندخلها للفرن
تحمر من أسفل ثم من أعلى مثل كذا:



نصب على الكيكة شوي حليب مركز وهي حارة .. طبعا ما نكثر يكفي مسح الوجه لأن الكيكة فيها سكر فحاولي ما تنسين نفسك ..
ثم بالمنخل نرش قرفة على الوجه لحد ما يتغطى بالكامل .. بيكون شكلها قريب من حلى الشامواه
للأسف كنت مصورة هذي الخطوة لكن انحذفت من الكاميرا .. قدر الله وما شاء فعل
طبعا دخلي الصينية للثلاجة لكن لا تغطينها الين تبرد ..
وهذي الصور بعد التقطيع :





إن شاء الله المرة الجاية راح أعمل لكم حلى قريب من هذا لكن بإضافات مختلفة ..
أتمنى تجربوه .. ويارب يعجبكم
صحتين وعافية ..
لا تنسوني من دعواتكم ..








أهلييييييييين فيكم يابنات أحلى عالم .. ما تتصورون قد إيش مبسوطة وسعيدة بردودكم اللي تبرد القلب ..
الله يجزاكم ألف خير .. ويسعدكم دنيا وآخرة يارب ..
معليش تأخرت عليكم .. لكن ان شاء الله راح تعذروني إذا جربتم هذا الحلى اللذيذ وإن شاء الله يعجبكم وينال رضاكم كل أبوووووكم..

يالله نبدا الشغل :

المقادير الأساسية :
خلاص تعودتوا عليها ..

المقادير الإضافية :
1- 5حبات كاكاو جالكسي من النوعية هذي :



2- شوي حليب سايل تضيفينه على الكاكاو أثناء وضعه في الحمام المائي ..
3- لوزمبشور للزينة

الطريقة :
طبعا تخفقين البيض في الخلاط 3 دقايق أو أكثر ثم تضيفين بيالة سكر وتستمرين في الخلط وبعدها بقية المقادير بالترتيب ..
( للتخلص من رائحة البيض أضيفي ملعقة خل )
صبي الخليط في صينية( الأفضل بايركس وسط مثل ما أنا موضحة في الطبخات السابقة)وبعدين دخليها للفرن وحمري من الأسفل ثم من الأعلى ..
بعد ما تطلعينها من الفرن خليها تبرد شوي ..
أثناء ذلك جهزي الكاكاو في الحمام المائي لحد ما يذوب وصبي عليه حليب سايل ( بوني مثلا ) بحيث يكون الكاكاو سايل نوعا ما ما يكون خفيف مره ولا ثقيل يعني وسط ..مثل كذا :



قطعي الكيك قطع صغيرة :



غمسي كل قطعة من الكيك في الكاكاو .. ثم ضعيها في ورق الكيك .. وراح يكون شكلها من برا ومن جوا مثل ما أنتو شايفين :



أو بعد ما تغمسين قطعة الكيك في الكاكاو ضعيها مباشرة في اللوز المبشور من فوق ومن تحت .. يعني تمرين على الكاكاو ثم اللوز :



بعدين دخليه للثلاجه حتى يتماسك تماااام ..

بإمكانك تزيين صينية تحتوي على ثلاثة أشكال :
كيك سادة .. كيك بالكاكاو .. كيك بالكاكاو واللوز .. مثل كذا :



هاه وش رايكم ؟؟
بس عاد لا تنسون القهوه اللي تعدل الراس ..
اعملوه واعزموني أتقهوى معكم .. أحب الحلى لا صار معه قهوه وجلسة بنات حلوين مثلكم ..
وألف صحة وهنااااا