أظن بعد كل هاذا الذل نار ستأكل الأخضر واليابس

السلام عليكم ورحمة الله وبركاته


اليوم بأفتح لكم مشكلة تخصنا كلنا كشعب سعودي مآكل تبن ..

أنا ماادري لين متى هذا التسيب والضياع اللي حاصل ببلدنا ..


ليش ماحنا قادرين نآخذ حقوقنا كبشر مانبغاها كمواطنين لأن المواطن بهالبلد ماله الا المرمطه و الذل والاهانة ..

بأدخل في مشكلتي اللي ماني عارفة كيف أحلها ..

طبعا بما ان ملكنا الله يطول بعمره أمر لكل الموظفين في بلدنا ان رواتبهم ماتقل عن 3 آلاف ..

بطبيعة الحال زادت رسوم المدارس الخاصة .. يعني زيادة الرواتب بتطلع من ظهورنا نحن الشعب المغبون .. يعني مين بيدفع الزيادة للمعلمين غيرنا ..

وبسبب هالأمر توجه الكثير من المواطنين للمدارس الحكومية هربا من رسوم المدارس الخاصة اللي تقص الظهر ..

ومن ضمن الهاربين أختكم الفقيرة الى الله ..

ولكن وجدنا المدارس الحكومية واقفة لنا بالمرصاد .. يعني مافيه تدفعون تدفعون للمدارس الأهلية ..

كل مدرسة أروح لها يقولون خلاص اكتفينا علما انه من المعروف ان المدارس الحكومية مو من حقها ترد أي مواطن

خاصة اذا ساكن بنفس الحي الواقعة بها المدرسة ولكن كنوع من ذل وتصريف المواطن ..

وان صممت أن تدخل أبنائك للمدرسة الحكومية وقعدت لهم قالوا روح جيب لنا ورقة من مركز الاشراف التربوي حتى نقبل ابنك ..

طبعا أنا ماصدقت خبر وتوجهت لمركز الاشراف التربوي الساعة العاشرة صباحا ففوجئت بكم هائل من النساء داخل

بيت لم يستطع أن يستوعب كثرتهم وكان هناك نوع من الاختناق ..

سألت موظفة مالمفروض أن أفعله الآن قالت لي ( انتي وش جايبك ألحين ذولا الناس اللي انتي شايفتهم تراهم صلوا

الفجر جنب باب المركز علشان يمديهم يحصلون أرقام وحتى لو حصلتي رقم يمكن ماتآخذين ورقة بنفس اليوم )



طبعا أنا بلعت غصتي وهممت للخروج من المركز واذا بموظفة توزع أرقام وتنادي بالنساء اللي ماعندها رقم تجي تآخذ ..

كدت أطير من الفرح فذهبت اليها مسرعة واذا بها تقول للأجانب فقط

علما أن أكثر المتواجدات هم من الأجانب .. يعني متى خلصت أرقامنا نحن السعوديات ؟؟؟؟ ولما هم لم تنتهي أرقامهم ؟؟؟؟

في اليوم التالي ذهبت الساعة السابعة فكانت نفس الاجابة ( مافيه رقم تعالي من الساعة 4 يمكن تلقين رقم )

وفيه نساء يصرخون احنا هنا من الساعة 5 مالقينا رقم حرام عليكم !!!!!!!!

يعني المركز أصلا مايفتح الا الساعة السابعة والناس واقفين من اذان الفجر ليه ..لهالدرجة البشر عندكم مالهم حقوق ..

يعني علشان نآخذ حق مشروع من حقوقنا تستنزفون جميع طاقاتنا وتذلون والدينا ..

ماأظن أي بلد في العالم تعامل مواطنيها بهالظلم علشانه فقط طلب أن يدرس أبنائة بالمجان .. لا ويبدون الأجانب علينا نحن أبناء الوطن ..

وماذا بعد هاذا الذل كله ؟؟؟؟؟

أيعقل في بلدنا ماحنا قادرين نعلم أبنائنا بالمجان ؟؟؟

أما يكفي مايعانيه المواطن السعودي من غلاء الأسعار وضعف الدخل المادي وارتفاع المعيشة والتعامل السيئ من موظفين المرافق الحكومية وارتفاع المعيشة ومن نظام ساهر بعد اللي قاعد لنا على الحبة ونصب شركات الاتصالات و تخبط شركة الكهرباء ..


وبعدين يعني !!!!!!

وبعد كل هذا تقولون ليش يسوون مظاهرات بجامعة نورة وجامعة أم القرى ..


أنا أقول اذا مابيتعدل الوضع أتوقع البلد يحصل فيها انفجار غير مسبوق يحترق فيها الاخضر واليابس ..