أعجبت بدكتور الأسنان

السلام عليكم ورحمة الله وبركاته,
اخواتي الغاليات من زمان ماكتبت هنا وموضوعي هذا فضضفه واستفسار.
أنا بنت عمري 29 سنة جامعية وموظفة في شركة. الحمدلله اعتبر نفسي متدينة نوعا ما ومجال عملي فيه اختلاط. لكن ماسبق وحصل لي أي موقف والجميع يتعامل مع بعض بإحترام. وأنا رسمية مع الجميع وحريصة جدا على الحدود في التعامل. وحتى في تعاملي مع الطرف الآخر ما سبق وأحسست اني عندي مشاعر مو المفروض تكون موجودة. حتى أحيانا كثيرة فيه كذا شخص كان واضح أن فيه شي من جهتهم تجاهي أقصد استلطاف وحتى زميلاتي لاحظوا هذا الشي ولكن انا اتعامل معهم برسمية لدرجة اخذوا انطباع اني غير مهتمه بهالاشياء. طبعا الكلام هنا عن اعجاب وبعدها خطبة وزواج وفعلا هذا الشاب بعد مالمس عدم الاهتمام مني تقدم لأخرى من نفس شركتنا وتزوجها.
هذي مجرد نبذة بسيط عني قبل لا أدخل في الموضوع الأساسي. الموضوع أنه من فترة جاني خراج تحت سني والتهاب شديد أهملته فترة وفي يوم اشتد علي الصداع واضطريت أدور على أقرب عيادة أسنان وأقرب موعد. مبدئيا لقيت دكتور كبير في السن ويمدحونه ف قررت احجز عنده وكنت متعمدة أني احجر أما عند طبيبة أو طبيب كبير في السن.
لقيت أقرب موعد في نفس اليوم لكن في فرع آخر لعيادة الأسنان وعند طبيب ما أعرف عنه شي ولأن وقتي محدود وماعاد استحمل الألم أكثر والعيادة مضمونة وافقت.
رحت للعيادة وكنت مقررة أني اشرح للدكتور المشكله وبعدها أما اكشف عن منطقة الفم فقط أو اكشف وجهي لدقائق معدودة خلال الكشف.
وتفاجئت أن نظام العيادة أن الممرضة تجهزك وتكونين على كرسي الكشف والطبيب يجي يسمع منك ويبدأ شغل. وقتها اضطريت اكشف واتمضمض وبينما الممرضة تجهزني دخل الدكتور. سألني عن المشكله وفي البداية كان منزل عيونه وتكلمت وأنا اشرح صار يطالع فيني ومركز النظر بشدة. خلصت كلام وهو مانزل عينه وكأنه متنح لدرجة أني توترت وما انتبه لنفسه الا لما قلت أني خلصت شرح المشكلة.
طبعا هو طبيب جراحة اسنان وتجميل فك وهالامور. ف صار يقولي ايش رايك اسوي لك جراحة تجميلية بالفك ومن هالكلام. وانا يابنات الحمدلله مافيني اي مشكلة ظاهرة بالفك ابدا واساسا الحمدلله دائما اسمع اطراء على شكلي وكثييير بنات بالدوام يتفاجئوا لما اكشف. انا م امدح ولكن عشان اوضح لكم اني الحمدلله جميلة وملفتة ولا عندي اي مشكله بالفك. على كلامه ان المفروض الفك العلوي والسفلي يكونون متطابقين 100% وانا مش متطابقين ولكن طبيعيين جدا حتى ما احتاج تقويم. وطبعا رفضت ولكن قالي فكري وان احنا نخلي الاشياء دائما تصير أجمل؟
باقي الموعد كنت متوتره من نظراته وحتى هو لاحظ وقالي انك شادة نفسك مره.
المهم يااخواتي انا متضايقة جدا من هذا الموقف. اولا نظراته التفحصية ضايقتني جدا وحسيت اني المفروض كنت بنقابي وانا مو عارفة اذا نظراته هذي قلة أدب أو تفحصية بسبب مجال عمله.
ثانيا متضايقه من نفسي أحس بسبب تقدمي بالعمر ومع اني راضية الحمدلله و في مجال عملي متحكمة بحدودي مع الطرف الآخر ومشاعري إلا أن جاء في نفسي شي لما تعاملت مع هذا الطبيب يمكن لأنه صغير بالعمر وشكله مقبول جدا. وهذا الشي مضايقني ومو عارفة كيف اتخلص منه.
الآن متبقي لي مراجعة ومواعيد ولكن افكر اغيره رغم أنه يده خفيفة وشغله ممتاز.

أنتم ايش رايكم؟ هل فعلا تقدم البنت بالعمر بدون زواج يجعل مشاعرها هشة بهالطريقة؟ وأنا مو عارفه ليش هذي المره بس اللي صارت عندي مشاعر رغم أن مثل ماذكرت متعودة اتعامل مع ناس كثير من الطرف الآخر مميزين بالاخلاق والشكل؟ يابنات انا اتكلم عادي واخلص اموري برسمية ولكن من الداخل فيني حياء لدرجة ان اهلي صاروا يقولون لي انك انتي رسيمة جدا ومقفله الباب وتعطي اي شخص يبغى يتقدم لك انطباع انك غير مهتمه. طبعا اهلي صاروا يقولوا كذا لاني كبرت بالعمر وما صار يتقدم لي الا الكبار بالعمر والمتزوجين. طبعا هذا مو موضوعنا ولكن ابغى ابين اني صحيح اتمنى الزوج الصالح بالحلال ولكن قد ما اقدر ماسمحت لنفسي اكون مشاعر تجاه اي شخص حتى لو بالحلال وحتى لو رح تكون نهايتها الزواج وعشان كذا انا متضايقه من هذا الموقف ومن مشاعري الغريبة علي.