أعلم جارتي والا ما أعلمها / استوفى الرد

السلام علكيكم ورحمة الله وبركاته

اخواتي انا بدخل في الموضوع على طول وابي نصيحتكم ,,, جارتي انسانه خلوقه وبنت حلااااااال وهي حاليا مسافره هي وزوجها ,,, صدف قبل شوي ان زوجي شاف رجال غريب معه حرمه داخلين في بيت جارتي ماشكينا فالوضع توقعنا انه جارنا رجع من السفر لحاله وهذول اقاربه ,, بس بعدين شكينا لأن زوجي طلع من الشقه وهو نازل من الدرج ,, الرجال الغريب فتح الباب وعليه علامات الارتباك وكأنه يبي يشيك عالوضع فالخارج ,,, ولمن رجع زوجي علمني فبعدين تذكرت ان جارنا ماله اقاااااارب في نفس منطقتنا نهاائياً يعني من تكون هالحرمه ,, أنا تضااايقت مرررره على جارتي لأني توقعت ان زوجها موجود فالبيت وزوجي لمن شافني متأثره بالمره قال انه مو متأكد انه شاف حرمه وقعد يهديني بعدين زوجي دق على جارنا عشان شغله وعرف من جارنا انه مارجع من السفر وانه فعلا معطي مفاتيح بيته لأصحابه ,, انا ارتحت نوعا ما لان زوج جارتي مو موجود معهم لأنها بنت حلال وتوها عروس وطايره بزوجها والي مخليني احس فيها أكثر اننا كلنا متزوجين بنفس الوقت تقريبا ومره حبيت هالأنسانه وعزيتها

المهم نرجع للسالفه انا قلت بتأكد إذا فيه حرمه والا لا لمن سمعت باب شقتهم انفتح طليت من الشباك وشفت الرجال لحاله ركب السياره وطلع وهينا قعدت أستغفر لاني حسيت أني ظلمت الناس ونسيت السالفه وبعدها بشوي نزل زوجي لسيارته الا الرجال الغريب راجع يبي يوقف ويوم شاف زوجي كمل طريقه ماوقف ,, هينا عرفت ان فيه إن فالموضوع وبعد شوي سمعت الباب انفتح ولمن طليت من الشباك شفت الحرمه طالعه من شقة جارتي وركبت مع الرجال ومشوا بسرعه
حسيت بصدمه وبقهر على جارتي بنت حلال مهتمه ببيتها وكل همها كيف تزينه ووش تحط فيه ووش تسوي حركه جديده وكيف تحصنه ودايم اذا طلعت من البيت تترك القرآن شغال فيه ودايم ريحة البخور تفوح منه وانسانه نظيفه حزنت عليها لانها ماتدري ان هالوصخه جايه تسرح وتمرح فيه بغيابها

والله انا مارضيتها عليها لاني ماأرضاها على نفسي ولا على اختي ولا على بنات الحلال مدري اعلمها توقف هالمصخره الي تصير ببيتها والا اسكت ولا كأني شفت شي ,