أعوذبالله من النكران والجحود

السلام عليكم ورحمة الله

كلام مستفز تقراه الوحده في أول صباحها يقلب مزاجها ويعكر باقي يومها😔


الله يكتب أجر أمهاتنا ويجزاهم عنا خير الجزاء.لو ماسوولنا إلا إهتمام أول سنتين بعمرنا يكفي إنا نظل مدينين لهم طول حياتنا بالبر والحب والصله.


تربي الأم وتحاتي وتقدم وتضحي وفي الأخير يوم الوحده يشتد عودها تقول أمي ماحنت علي.. ماني عارفه أعامل أطفالي بسبب قسوة أمي!!كلها مبررات لفشل الوحده في تربية أطفالها لأنها ماقدرت تتحمل المسؤوليه الي تحملتها امها وهي بعمرها.


ربونا أمهاتنا وكنا محور حياتهم الوحيد. والحين الوحده اطفالها مع المربيات وهي مع الصديقات والجوالات والمسلسلات ولا تقدر تتحمل مسؤولية طفل واحد.اعوذبالله من النكران والجحود.



الرسول صلى الله عليه وسلم قال لرجل سأله هل اوفيت حق أمي لأني حججتها حجه كامله وأنا شايلها على ظهري. قال صلى الله عليه وسلم فيما معناه لا.. يمكن وفيتها حق طلقه وحده من طلقاتها وهي تجيبك.


كفايه جحود وكفايه نكران! كل فشل نرميه على أمهاتنا.

الي يخليك تتحملين زوح مدمن وزوج بخيل وزوج عصبي وزوج شكاك وزوج شين يخليك تنسين إن أمك قست عليك مره أو مرتين.


سالفة أمي ما حنت علي وأمي ماكانت تقولي أحبك وأمي ماكانت تسمعلي هذي توقفوا عنها ولا تصدقونها عشان تبررون فشلكم.


تنامين وامك تدعيلك
تتألمين وأمك الي تبكي
تسهر وتربي وتغسل وتمرض وتشيل همك وانت ماتدرين بها.

تعبير الأم عن حبها لك مهو كلام بل افعال من لحظة حملك لين ربي يريحها من عقوقك وجحودك ونكرانك ويتوفاها إليه.

ارحمي ضعفها وكبرها وعجزها وهرمها واعرفي انك بتمرين بكل شي مرت فيه ويمكن ضعفه ياجاحده أيًا من تكونين


المعذره الكلام للبعض وليس للكل.