أعيش على رفات الماضي الحزن دمرني والحنين يعصف بي والحياه أصبحت رماديه

السلام عليكم ...
مادري من فين أبتدي لكن لازم اطلع اللي في قلبي ، بنات انا إنسانه أحب أبوي وامي بالمررره وهم كمان ربي يحفظهم لي يموتون فيني متزوجه الحمدلله وانا أكبر بناتهم ابوي وأمي كانوا ماشاءالله عليهم بعافيه دايم ازورهم و يزوروني دايم في بيتي اسبوعيا انا بالذات ويخصصون يوم لي و مناسباتي مايفوتونها يسهرون عندنا الوالد ربي يحفظه متعلق فيني انا وزوجي زي مااحنا متعلقين فيهم وأكثر احنا وأبنائنا والحمدلله ...لدرجة البيت بيته ويمون على كل شيء ابوي ينام كثير عندنا يسافر ويرجع عندنا لكم ان تتخيلون جميع تفاصيل حياته عندنا والعكس احنا ماشاءالله تبارك الله لا قوة الا بالله علاقة اهلي بينا عباره عن سلسله جميله لايمكن تخيلها مرت السنين على هذي الوتيره الجميله ....
فجأه انقلب كل شيء بفاجعه دمرتي نام حبيب قلوبنا عندنا في ليله كنت ماني مرتاحه فيها ليله من ليالي 2020 ليلة فيها احساس غريب كان فيه هواء وغبار عج على غير العاده جو مو بالعاده كانها ليلة وداع الصباح خرج من عندنا وصوت الباب مايزال عالق في ذهني في الليل زي الظلام الحالك اللي مافيه نور جاني خبر إصابة ابوي ...








ابوي أصيب بجلطه ونقل بالاسعاف بحالة حرجه
مادري كيف اوصف الاكيد اني جالسه اكتب لكم والدمووع ماليه عيوني !!!!
ذيك اللحظهاللي خبروني اهلي فيها زي الرجفه المروعه نفضت جسمي قمت اصيح ابكي ارتمي هنا وهناك زوجي يبكي الكل بصرخ وانا شبه مجنونه ابي اي شيء اي خبر اهلي مايدرون عن حالته شالوه اخواني بحال مروع ولايردون على الجوالات لان ابوي بالعنايه ...انتشر الخبر بسرعه انسان محبوب الكل يبكي اللي يعرفه واللي مايعرفه رجال حريم الكل يكلمنا تجيني ارقام مااعرفها ولااكلم ولاارد لاني احتاج من ياخذني الى العنايه انا ايضا لاني بدريت انهار انهيار فضيع صحتي بدت تتدهور ذيك الليله
ليله لايمكن ان يتخيلها عقل من هول البكاء والنحيب امي حالتها حاله وجوالها مايطفي كلمت احد اخواني بعد انتظار ٣ساعات طمنوني تكفوووووون قالوا شدي حيلك جلطه سقطت مغمى علي ......
للأسف مااقدرت اكمل بشكل متواصل وانا اكتب لكم هالكلمات لان كل شوي اجلس وابكي واكمل !
المهم ظل ابوي على هذا الحال وماقدروا الاطباء يذوبون الجلطه لانها كانت مو جلطه واحده كانت ٣جلطات ولاحول ولاقوة الا بالله باختصار اصبح ابوي طريح الفراش بشلل نصفي تحسنت حالته شوي وخرج من المستشفى لكن بنفس بس الباقي مو ابوي اللي اعرفه ابوي غاب عن املاكه وامواله واراضيه وكل شيء وقبل كل شيء غاب عن حياتنا
اقدر اقول لكم ابوي صرت محرومه منه وهو على قيد الحياه افتقددددته بكل ماتعني الكلمه ابوي فقد الكلام ايضا صارت دموعي ماتفارقني ازوره كل يوم بدال ماكان يزورني اتكلم ومادري وش يرد اصبحت بحزن عميييق وفكر مشتت صرت اكره بيتي ابي اخرج منه ابي ابيعه وخلاص كل ركن فيه اشوف ابوي جالس فيه بي للاسف مافي ابوي فقدت ضحكاته ومزحاته وشخصيته الرائعه اب مستحيل يتكرر ..
انا الحين صرت متحطمه فين ابوي ابوي ماعاد ابوي الاول وين سهراته وين صوته كيف اسمعه مره ثانيه طيب شلون مناسباتنا اللي كانت له ومايغيب عنها وينه الحين ماهو فيه فاقدينك ياابوي فاقدينك يانور دنيتي كيف مناسبه ماانت فيها كيف بيت ماتدخله
الحين سنه كامله مرت ماشفت سيارتك واقفه عند البيتنا انا الحين اسيره لكل ذكرى من ذكريات ابوي من وانا طفله لين مرض ابوي ماقدر اتعايش استرجع الطفوله الجميله وكل الايام زالسنوات ابوي حبيبي ادين له بكل شي جميل بحياتي
لكن الحين حياه رماديه وخيوط امل ضعيفه ودموع ماتوقف وطيف ابوي يلاحقني في كل زاويه ..
لساني مايفتر بالدعاء له كل ثانيه ودقيقه ان يشفيه زاأن يعافيه ويعفوا عنه وان يصبر قلبي ولاحول ولاقوة الا بالله...