أغلب تسلخات منطقة الحفاظ .....بسبب

السلام عليكم












(الحقووووووووووووووني ولدي عنده تسلخات شديدة)

هذي العبارة دايما أشوفها هنا بعالم حواء وغيرها من المنتديات وصراحة أرحم الطفل اللي أمه تكتب هالموضوع وتشكي أرحم الطفل لما يتسلخ ويتجرح ويصب دم والسبب أمه الحمدلله الذي عافانا مما ابتلاها به وفضلنا على كثير مما خلق تفضيلا

تدرون ليش ؟
أغلب اللي أطفالهن يعانون الله يكرمكن يتبرز ويجلس نص ساعة ساعة وبعضهم ينام والوساخة فيه ليش حرام ترى الوساخة أماكن تكاثر للشياطين والبكتيريا حرام الطفل أمانة فحافظي عليه

الحفاظ يجلس يوم كامل مايتغير بحجة مافيها الا بول وتظل على الطفل وتثقل وتمتلئ ويصير مايقدر يشيلها من كثر البول ليش المفروض من مرتين الى 3 مرات تتغير

ونجي للطامة والمصيبة وهي المناديل المبللة أنا ما أنكر ان مالها أهمية هي مهمة لما تكوني بالسوق أثناء الطريق وانت مسافرة تعبانة ماتقدرين تغسلينه بالماء لكن بالبيت ومافيك الا العافية وتمسحينه حرام عليك حرام أصلا من كثر المسح الجلد يتجرح لأن جلد الطفل رقيق يابنات أعرف وحدة ماتستخدم الماء لتنظيف بنتها أبد بس مناديل لين جاها تسلخات وشديدة اضطرت تكشف عورتها عند طبيب ذكر ليش وش اللي حادك على كذا غير العجز والوساخة

بعضهن تغسله وتلبسه الحفاظ من غير تنشيف لازم تنشفين الماء بعدين تلبسينه


يابنات الطفل أمانة عشان تحمينه من التسلخ أول مايتبرز خوذيه للحمام وغسليه بعدين لفيه بمنشفة ولبسيه الحفاظ وأول ماتشوفين فيه احمرار لو بسيط على طول فازلين ولا تطول الحفاظة عليه

وبالنهاية الأم اللي تعذر اذا جاء طفلها تسلخ هي اللي يكون طفلها عندها اسهال شديد كل شوي يسهل هذي تعذر لأن اذا تسلخ هذا شي غصب عنها مع التزامها بما ذكرت سابقا من عدم ترك الحفاظ طويلا وعدم استخدام المناديل وتنشيف المنطقة




أسباب أخرى لا علاقة للام بها مع شرط التزامها بما سبق:
نوعية الحفاظ
جلد الطفل
الصابون يفضل استخدام صابون خاص بالاطفال
بعض الاطعمة


وأتمنى موضوعي مايزعلكن لأني أنصحكن مثل أخواتي وأولادكن مثل أولادي