أفقدتي نفسك بعد الزواج ؟؟ أحتاج رأيكم جداً

عزيزاتي وحبيباتي بدخل بالموضوع على طول
انا متزوجه من سنين وعندي اطفال لكن ! من يوم تزوجت ماني سعيده ابدا واحس بضيق بصدري وخنقه وكأني مربوطه بحبل من رقبتي مااقدر ابعد ولااتحرك ادور مكاني ..
كنت قبل الزواج فرفوشه خفيفه حالمه اجتماعيه مرحه وعندي اهداف كثير اتمنى احققها وزي كل بنت كنت ارسم حياتي مع زوجي حياة جميله ..
تزوجت شخص يحمل كل الصفات اللي اكرهها حرفياً، ماهو شخص سيء جدا يحبني جدا وقايم بسؤلياته وكريم لكن كل شي اكرهه موجود بهذا الشخص
انسان موسوس مره يحب التسلط والسيطره عنده الزوجه مخلوقه عشان تخضع لزوجها وتمشي تحت اوامره عشان يدلعها ..


١-تخيلوا من بدايه الزواج حرمني من اهم واحب هوايه عندي التصوير حرمها علي تحريم ماعندي اي صوره للذكرى كانت من اهم هواياتي وشغفي اصور واوثق الذكريات لكن منعني وكرهني فيها بالصراخ والعصبيه ويشق الصور لو صورت بدون اذنه
٢- اجتماعيه جدا ومنعني من الناس بطريقه غير مباشره كل يوم يطلع عيب باقاربي او صديقاتي عشان يمنعني عنهم ولو ترجيته وطلعت ينكد علي بعدها تحقيق واساله وش سويتوا عسى ماصوروك لايصير يسمحون للسواقين يدخلون الاغراض لايكونون ناس متفتحه مايتغطون وهلما جرا لين كرهت كل الطلعات وصرت اخاف انادي احد بيتي يجلس يراقب وينتقد ويصرخ ليش فلانه عبايتها فيها لون ليش فلانه تعلي صوتها بالشارع مع اولادها ليش وليش كرهني كرهني كل شي


٣- اعشق الافلام والمسلسلات كلها حرمها علي وكل مادخل وشافني اتفرج مسلسل خليجي قام يصرخ ويحلف مااسمح لك تقتحين هالاشياء ببيتي هالقناة لاتنتفح عندي مااسامحك لو اولادي شافوها وهي مسلسلات عاديه حياة الفهد والا سعاد عبدالله صرت اشك بنفسي اني اسوي شي غلط وكل شي اسويه بالخفيه


٤- موسوس من ناحية اولادي من يوم كانوا صغار لو يشوف مخش صغير سوالي تحقيق من وين وكيف واشرحي لي شلون صار ويصرخ يصرخ يوترني وكل مااطلع مكان يقعد يحذر وينذر ويهدد لو جا عيالي شي بحملك المسؤليه وترا بحاسبك حساب عسير جدا


٥- الطلعات العائليه اموت فيها واحب الجمعات كثير والقى نفسي افرغ كل ضغوطات السنه فيها منعني منها ممنوع منع بات اطلع مع اهلي مخيم او جمعات بعيده لاستراحات ولاحتى اهله كلهم يطلعون ويجتمعون وينبسطون واحنا محرم علينا هالشي يقول مااحب ولاارتاح وسويت مشاكل وزعلت ومانفع معاه ترجيته مانفع معاه واستسلمت


٦- توظفت اكثر من مره ويضغط علي ضغط مو عادي ويسوي مشاكل ويخليني اغيب ويضغط يضغط لحد مايخليني استقيل


٧- مااطلع من البيت الا بإذنه وبمعروض اشرح فيه اسباب الطلعه ومبرارتها ومتى بطلع ومتى برجع ومع مين ولازم ارسله الموقع اذا طلعت واذا تاخرت ربع ساعه قلب الدنيا علي قلب
واشيااااء كثيييير
طبعا هو طيب حنون معاي بالبيت كريم جدا جدا يحاول يسعدني بالمال وتلبية الطلبات والهدايا لكن يتعامل معي زي الغنمه اللي يربطها بحبل وتدور حوالينه وقدام عينه


من تزوجته افكر بالطلاق كل يوووم استشرت مستشارين كثير كلهم قالولي انه زوجك عنده قلق مرضي ولازم يتعالج طبعا رافض الفكره ويعتبر نفسه اصحى مني اسلوب حياتي معاه كله تهديد ووعيد ياويلك خط احمر
حتى اولادي صاروا يتجنبوه محد يحب يجلس معاه ابدا مانحب نطلع معاه اي مكان دايما نتهرب منه كلنا نخاف منه خوف فضيع


الان بعد اكثر من ١٠ سنوات افكر جديا بالطلاق لاني احس اني فقدت نفسي جدا واحس اني فارغه من داخل ماني قادره اعطي اولادي ولاقادره اعطي زوجي تعبت جده وارهقت بس خايفه اندم لانه جدا كريم وموفر لنا حياة كويسه لكن افتقد نفسي فيها .. اهلي حالهم ممتاز بس اكيد لو رحت لهم بفقد الخصوصيه والماده شوي بنحرج اطلبها لكن عندي شهاده كويسه واقدر اشتغل فيها ياااارب كل وحده تدخل تعلق اي تعليق


بموووووووووت بمووووت من الحيره .. هل لو انت مكاني بتقبلين تعيشين حياتك مع شخص حرمك من كل شي تحبينه وسلب حريتك منح ووفر لك اشياء ماتهمك ابدا وحياتك معاه خوف وقلق وتوتر تخافين تتناقشين معاه تخافين تطلعين معاه كل حياتك خوف بخوف ؟؟!
لااحد يقول حاوريه او ناقشيه لاني سويت كل الطرق اللي ممكن تتسوى ولانفع معاه عنيد جدا وعنيف بالنقاش مايقبل