هذا ردي كان لاحد الاخوات هنا في الحياة الاسرية اللي تشتكي من سوء تفاهم مع أمها..وحبيت يكون بموضوع مستقل للفايده والاجر...
انا كتبت رد طويل عشان انتي وغيرك من القارئات يستفيدون ...لان مريت بظروف شبهك ...صح مو لدرجة الضرب..
بس حسيت بمعاناتك ...وهذا رأيي
بر الوالدين مو بالساهل....انت الله ابتلاك بهالأم لازم تصبرين وانت اللي تتغيرين لا تستننينها تتغير وتقولين سوت وسوت وقالت وقالت...ولا تنتظرين بنوقف معك ضد والدتك الله يحفظها
حاولي تتغيرين على قد ماتقدرين ولا تصارخين بوجهها انتبهي ,,,يبليك ربي بحياتك بعدين...."ولا تقل لهما آوف ولا تنهرهما "مهما كان السبب ...تناقشي معها بهدوء وتحمليها ...تعالي لها بوقت تكون رايقة حاولي معها جاهدي ...تبسمي لها ضحكيها سولفيلها بكل شي لو تافه اسأليها عن امور ماضيها ودراستها او اي موضوع هي تحبه """انا اسولف مع امي بأي موضوع تحبه حتى لو مايهمني بس عشان الانسان يحب يسولف بالشي الللي مهتم فيه"...اذا كانت منسدحه تعالي سوي لرجولها مساج ...او غطيها بغطا خفيف...
’’’
اذا شفتيها تقص اظافرها حاولي انك تاخذين القصاصة وتحلفين عليها انك تقصين اظافرها...بترفض اول مره بعدين تكيف على الدلع...وممكن تبرديهم وتلمعيهم لها وتدهنين ايدها ورجليها لو شفتيهم ناشفه
’’
اممممم كمان لو شفتيها تنادي احد يجيب لها مويا اركضي انتي جيبي لها مويا ...وكل ماعديتي من عندها اسأليها تبين شي يمه...حتى لو ماتبي ....اذا كانت نايمه لوحدها طلي عليه يمكن تبغى شي او مريضه او جيعانه..خاصة اذا مريضة سكر...وواذا كانت مريضه لا تفارقينها ....اذا كانت قدامك تبي تصلي سابقيها افرشي سجادتها
،،
...اذا كانت صايمه سوي لها فطور حتى لو في شغاله ...حتى لو شي بسيط ...لا تتقهوين ولا تاكلين قدامها من غير ماتعرضين عليها ...اذا شفتيها تبي تتقهوى سابقيها وصبي لها الشاي والقهوة ...
،
اذا لقيتيها تحاول تقرا اوراق هي او ابوك وماهم شايفين حاولي تساعدينهم...اذا لها مواعيد بالمستشفى اسأليها وتابعي معها ..المواعيد واقري لها لو ماتعرف تقرا ...طلعي لها اشياء من النت تحبها وتتفرج عليها ووريها ...قصايد وصور قديمة مثلا لو كانت تحبهم "أمي كذا"
...واذا هي حرمة كبيرة ...مازحيها وخذي واعطي معها بالمزح والدلع ...سايريها والله ينبسطون ...واذا تزوجتي سولفي لها عن حياتك بالتفاصيل العاديه والخفيفه واذا انتي تداومين سولفيلها عن دوامك التفاصيل الخفيفة واللي توسع الصدر ...بالعربي اشركيها بحياتك ...مو شرط اسرار حياتك "
وانتبهي تشيل شي قدامك وانت تتفرجين ريحيها وشيلي عنها ....اذا شفتيها طالعه وتدور على جزمتها تبي تخرج حطيهن قدامه عشان تلبسهم بسهوله...مو مهم اهل البيت اهم شي امك وابوك ...ريحيهم قد استطاعتك واعتذري لهم على طول...على اي شي ...واذا كانوا قاعدين ابوك ولا امك لوحدهم حاولي تجاملينهم قد ماتقدرين وتجلسين معهم...انت الكسبانه صدقيني واذا كان مجلس حريم وانت تقهوين ابدي بأمك وبعدين الحريم مهما كان..واذا كنت مسافره اول ماتسلمين على امك وابوك..وبعدين الناس...هاذي بعض الاافكار ...ونفسي اسوي اكثر عشااان اكسب برهم
ولو اخلصتي النية وعرفتي قيمتهم اكثر راح تطلع لك افكار كثيرة عشان تكسبين الام والاب ...مافي حب يجي بالساهل
كنت قبل مااتزوج
ماسوي هالأمور عن جهل مني وتقصير...وكان دايم في بيني وبين امي اختلاف بوجهات النظر وازعل واسوي حركات زعل مالها داعي....والحين ندمانه بالمره الله يتجاوز عني..وبعدين لما تزوجت وجربت الاطفال وحبهم وتعبهم وألامهم ..شي عمرك ماتتخيلينه الا لما تتزوجين وتخلفين اطفال ان شاء الله...
،،
حسيت بقيمته الوالدين وتعبهم ومتحسره على كل لحظة ماجاهدت نفسي فيها ورضيتها حتى لو هي غلطانه ...وندمانه اني ماكنت ابوس يدها غير لما تزوجت ندمانه"الحين احب ايدها.... ورجلها لو تبي بس هي ترفض.....ابوي...الله يغفر له كنت احب رجله وهو نايم"..اتحمليهم تراهم باب من ابواب الجنه...لو فقدتيه يويلك من الحسرة والندم بعدين... الله يطول بعمرهم لك
بريها ولا تنتظرين يتغيرون ....لا تنتظرين النتيجة بين يوم وليلة ...لاكن راح تشوفين البركه بحياتك بأم عينك...وراح حبهم لك ينبني ويتجدد من اول وجديد...ولا تراعين اخوانك واخواتك ...وتقولين ليش هم ..راعيهم بكل شي الا الوالدين سابقيهم بخدمتهم...
وانت الكبيرة والبكر صدقيني بقلبهم انت الحب الاول...وراح الكل يحترمك ...وتكبرين بعين الكل ...اهم شي اصبري وجاهدي وتحملي ...وراح تلقين النتيجة لو بعد سنين وبكره تراسليني وتقولين امي تغيرت ..مهما كانت استفزازية معك
...بأذن الله
،،
اهم شي
اذا طلعت استودعيها الله من قلب ...لا تشيلين عليها تكفين والله لا سمح الله ما راح تتوفقين...والله اني كل ماتحملت وصبرت اشوف راحه نفسية وبركة اللهم لك الحمد ...وربي حتى الشي اللي تكون امي ماهي راضية عنه ماكنت انبسط فيه...
كل شي قلته عن الام ينسحب على الاب ....
اللي تستفيد لا تنساني من الدعاء