لا يخفى عليكن أخواتي العزيزات فضل الصدقه والحديث عنها يطول
موضوعي باختصار افكار بسيطه طرأت علي للصدقه والمجال واسع وغير محصور ..
*طبعاً أغلبنا إذا مو كلنا نروح المراكز الصحيه اللي في الحي او القريه
وممكن تصادف روحتنا وقت شغل العامله في تنظيف أرضية المركز
طبعاً تختلف طريقة تنظيفها للأرضيه
لكن ولا مره شفنا عامله تستخدم هذي/

أكيد وضحت الفكره
بالضبط زي ماجا في بالك
تشترين الممسحه الدواره وتودينها لها وتعطينها وممكن تعلمينها طريقة استخدامها ..
انتي بكذا تصدقتي وفرجتي عليها كربه بإنك سهلتي موضوع المسح واختصرتي عليها الوقت ..
*ترسلين اخوك او ابوك او زوجك او السواق يشتري عدد معين من الوجبات من مطعم وترسلينه لمحطه ويوزعها ع العمال اللي فيها ..
وعشان تحمسينه ذكريه بحجم الأجر اللي بيجيه بإذن الله وان الأجر مو لك وحدك ..
اذا كان صعب عليك تلقين احد يقوم بالمهمه هذي فيه حل ممكن ينفع بإذن الله:
طبعاً كثير نشوف شباب عارضين ارقامهم في اماكن كثيره وانهم يوصلون مشاوير وطلبات
الفكره انك تراسلين احدهم ويكون ثقه وتتفقين معه ع الموضوع وتعطينه أو تحولين له حق الوجبات والمشوار ..
الأفكار كثيره والمجالات متعدده .. بس احنا نشغل مخنا والله بيسهل لنا بإذنه ويعطينا على قد نيتنا ..
واللي عندها أفكار تكتبها لنا والله يجزاها خير ..
اللهم اجعل عملي هذا خالصاً لوجهك الكريم وتقبله مني ولا تحرمني أجر من اتبعه إلى يوم الدين ..
أبيح وأتمنى نقل الموضوع مع (عدم) ذكر المصدر ..
والسلام عليكم ورحمة الله وبركاته
فيه بعض المساجد اللي على طريق سفر يكون فرشها قديم ومقطع ياليت اللي بتسافر يكون معها سجادات تحطها في هذي المساجد