السلام عليكم ورحمة الله وبركاته
كيفكم حبيباتي .. أو بالأصح أستاذاتي .. لاني بجد اتعلمت منكم كتييييييييييير
أنا والأعمال الفنية والأشغال اليدوية أصحاب .. بس بصراحة أختكم في الله كسوووووولة كل مرة أقول لازم أصور وأنزل
عشان أفيدكم زي ما بأستفيد منكم بس الكسل يغلبني
بس دي المرة غيييييير
جايتكم حار يافول
توي مخلصة العمل دا قلت لازم تشوفو
صلو عالنبي أول
اللهم صلي على محمد وعلى آل محمد كما صليت على إبراهيم وعلى آل إبراهيم إنك حميد مجيد
وبارك على محمد وعلى آل محمد كما باركت على إبراهيم وعلى آل إبراهيم إنك حميد مجيد
دي أختي يا حبيباتي عندهم معرض ما أدري ايش بس المهم طلبوها وصحباتها يعملو خط الزمن لمراحل الجنين
بس خط الزمن فكرة قديمة وما عجبتهم فحبو يعملو بفكرة جديدة وطريقة ميزة
لفو ودارو وفي النهاية جوني وسويتلهم دي الفكرة
طبعاً الفكرة فكرتي مع براءة الإختراع ... والتنفيذ تنفيذي مع براءة التنفيذ <<<< خخخخخ من عندي
والفكرة تنفع لأي شي تاني
ممكن مثلا بدل الفكرة التقليدية لما بنروح الأفراح يحطو صورة العروسة على استاند
ممكن يحطولها عدة صور بنفس دي الفكرة وممكن تعمليها انتي بنفسك كمان
بس طبعا لكل مقام مقال حتستخدمي خامات أفخم وأرتب
ياللا نبدأ بسم الله الصورة الأولى
الفكرة الي عملتها زي الألبوم الدوار
جبت فيلينات وقصيتهم زي مو واضح في الصورة ولونتهم وركبتهم على بعض وثبت عليهم صور مراحل نمو الجنين طبعاً بعد ما غلفتها بالتغليف الحراري وزينتها من فوق بالورود والشرايط وحبات اللولو
أما القاعدة فهي عبارة عن فلينة دائرية ولبستها بقماش ساتان ناعم عشان يسهل دوران الفلينات فوقها
حتقولولي الفلين خشن وصعب يدور <<< شوفو ايش ركبت من تحتو عشان يمشي ويدور بكل سهولة
ولفيت حوليها شريطة عشان تديها شكل أحلى بس
والصور حتوضحلكم كل شي
شفتو السر في تسهيل الدوران <<<< حبات اللولو
وشايفين المحور الي بتدور عليه الصور <<<< فرشة ألوان قديمة شلت الراس الحديدي الي فيها وبريت أطرافها بالبراية العادية عشان يسهل غرزها بالفلين
شايفين كيف شكلها لما شلت الصور من عليها ولا كأنها فرشة ألوان
بس ترى دا الأبيض الي على راسها من حبيبات الفلين <<< معليش متحمسة وما انبهت أشيلها وقت التصوير
ودي الفلينة من تحت بعد ما غلفتها بالساتان تصير أطراف الساتان وحشة وتخلي الشغل مو نظيف فقصيت شكل دائري عالسريع من الجوخ ولصقتو على الدائرة بحيث يخفي أطراف الساتان وحتشوفو كمان المحور الي هوا الفرشة واضحة من النص
ودا من أسفل الفلينات حتشوفو حبات اللولو والفتحة الي بيدخل فيها المحور
ودي صورة للتزيين اللي فوق
ودي صورة أقرب إهداء لأول وحدة ترد
وتم بحمد الله
ملاحظة أخيرة : أنا غلطت غلطة وما انتبهتلها إلا بعدين لأني لما بأشتغل كنت بأشتغل على الأرض .. والأرض موكيت .. وخشنة طبعاً
والألبوم بأدورو ويدور زي الحلاوة .. بس لما جيت حطيت المجسم على المكتب ( ناعم طبعاً ) صرت لما أدورو ما تدور اللوحات بس .. يدور المجسم كامل حتى مع القاعدة فاضطريت امسك القاعدة بيدي عشان الألبوم يدور <<< والسبب إن القاعدة خفيفة .. فبالإمكان لما تعملي الفكرة نفسها تحاولي انو يكون وزن القاعدة أكتر من المجسم اللي فوق .. ممكن تكبريها أكتر أو تستخدمي من الفلين الأتخن .. أو تثقلي القاعدة بأي شي .. أنا كان عندي زي الحجار الصغيرة بلورية مفلطحة وثقيلة كنت أستخدمها أحيانا في المجسمات لتقيلها لأي سبب أو لتزييننها وفعلا يصير المجسم ثقيل بسببها .. لكن للأسف خلصت مع عندي دحين ..
أو ممكن تختصري الموضوع ووقت ما تحبي تعرضيها تحطي عالطاولة مفرش خشن .. وانتي وشطارتك
وأي استفسار من عيوني يا عيوني