السلام عليكم
كيفكم بنات وحشتوني كثيرآ ♥♥

اللي باركوا لي في التجمع السابق فديتكم وحده وحده والله يبارك فيكم وعقبال اللي ماولدوا يارب وربي يسهل عليكم ويرزقكم الولاده الميسره
ام الأمير حبيبتي سلامك وصل ياقلبي انتي فديتك ♥♥

أكشن ولادتي يوم الجمعه العصر كنت طالعه وأحس بمغص طنشته وبعدها بدقايق نفس المغص وطنشته المره الثالثة قلت خليني احسب إلا المغص كل ١٠ دقايق رحنا المطعم تغدينا والألم يزيد وأنا أتحمل زوجي شك قال فيك شيء قلت لا طلعت من عندهم وكلمت أمي قالت امشي واشربي حليب بفلفل اسود شوي وإذا زاد عليك نروح المستشفى
رجعت البيت وجلست أرتب بعض الأغراض الناقصة لانه الألم يروح ويجي مستمر وعلى الساعه ٩ طلعت امشي ورجعت وقلت بنام إذا اختفى فهو كذبي بس للأسف مانومني وعرفت انه بداء الجد غطست رجولي بمويه دافيه وأخذت لي شور دافئ وكلمتني أمي على ١٢ تطمن قلت لسى كل ١٠ دقايق بس الألم يزيد وقالت إذا زاد مريني نروح قلت أن شاء الله حاولت أنام ماقدرت الألم يصحيني من الساعه ١٢ وأنا أحاول أنام ماقدرت الساعه ٣ الفجر زاد علي قمت من السرير وجلست امشي في بيتي وأذن وصليت وجلست امشي وكان فيه ملابس وسخه لبناتي غسلتها وعلى ٥ صحيت بناتي وزوجي للدوام والألم لسى كل ١٠ دقايق بس يزيد ويشد علي قال زوجي نروح قلت لا على الساعه ٨ بروح مستوصف أهلي اكشف قبل لا أروح المستشفى يبهذلوني قال خلاص بروح اخلص كم شغله في الدوام واجي قبل ٨ وكلمتني أمي وقلت لها بروح المستوصف اكشف قبل قالت افضل بعد وعلى الساعه ٧ الألم صار قوي وكل ٥ دقايق كلمت زوجي قلت خلاص ما أتحمل تعال وصلني على ٨ وكنسلت المستوصف مريت أمي وعلى المستشفى وكانت الشوارع زحمه وصلت لهم ٩ و ٤٥ دقيقه ودخلوني الطوارئ على الساعه ١٠ كشفت علي الدكتوره قالت ٣ سم شوي ندخلك غرفة الولاده على الساعه ١١ دخلوني الغرفه جت دكتوره قاست الرحم لسى ٣ ونص وعلى الساعه ٢ الظهر صار ٤ وعلى الساعه ٤ صار ٤ ونص وفتحت لي المويه وقالت الطلق جداً بارد في الجهاز لازم طلق صناعي مع أني كنت أموت من حرارة الطلق ٤ ونص عطوني طلق صناعي الساعه ٥ ونص قاست لقته ٤ ونص لسى أمي توترت كانت متوقعه أني على العصر أكون ولدت طبعا هي معي في الغرفه وأحمد ربي أنها معي ربي يحفظها لي يارب تعبت جداً وتعسرت ولادتي الرحم ابد مو راضي يفتح القابلات و٣ دكتورات جو عندي وتابعوا حالتي وجاء معهم دكتور وأمي تقول أن شاء الله على المغرب تخلصين والدكتوره قالت بسوي لك توسيع لكن مااقدرت أتحمل الألم قالت خلاص ماراح أسوي لك وعلى الساعه ٧ ونص كشف علي دكتور لقاه ٦ والألم كل ماله يزود أكثر واكثر ومو قادره أتحمل قالوا نعطيك مسكن قلت لا راح يحمي الطلق أكثر وتزود الألم لأني جربته قبل ببنتي وكانت في قابله سعودية تتابع معهم حالتي وقالت صح عليك بس يمكن ينفتح الرحم بسرعه قلت ماابيها جاء الدكتور كشف علي الساعه ٨ لسى ٦ وكان يتكلم مع القابلة يقول مو حاس براس الجنين أحس بيدينه جت دكتوره استشارية بعده وكشفت قالت يتهيئ لك وضع الجنين كويس وسالتها أمي مطوله قالت لا أن شاء الله ساعتين وتولد على ٨ ونص صرت ارجع كثير مع أني مو مأكله شيء من ٦ الصباح بس مويه وخافت أمي يا عمري عليها حسيت روحي راح تطلع وعلى ٩ ونص خلاص بموت من الألم والدكتوره كشفت علي وصارت تسوي حركه دائريه وتفتح رجولي على الآخر وتسوي الحركه الدائريه وأنا أحس المنطقة ضيقه مره وكنت أتعذب من الألم وأمي صارت تبكي وأسمعها تكلم جدتي وتبكي وتقولها تعسرت ولادتها اسمعيها والرحم ماانفتح تعبت معي أمي مررره ياقلبي قلبها والدكتوره طلعتها بره لانها تعبت وأنا أحس بشيء بيطلع وأقولهم في شيء وادفع وتجمعوا علي وقاست الدكتوره قالت ٩ كويس وصارت تسوي نفس الحركه الدائريه والدكتور يقولي إذا حسيتي بألم قوي ادفعي ونفسي صار ضيق وحسيت بألم قوي والدكتوره صرخت قالت ادفعي ولا تطلعي صوت انتبهي سمعتهم أمي وجت عندي وصرت ادفع وكنت خايفه لانه نفسي راح والدكتور جاء على راسي وقالي رأسك على صدرك وادفعي وسويت زي ماقال ونفسي يخف وشافوا الرأس وصاروا يصارخون ويقول ادفعي من غير صوت وتكون دفعه قويه ودفعت مرتين والحمدالله جاء ولدي الساعه ١٠ باليل بعد عذاب ١٢ ساعه طلق وألم مستمر وحطووه على بطني وجلست يومين أعاني من حلقي طلعت فيه نفس الورمه من الدفع والصراخ
كلش يهون يوم شفته قدامي وياقلبي طلع متفخ من الطلق ووزنه ٢٨٠٠ مع انه قبلها بأسبوعين قالت لي الدكتوره في مستوصف أهلي ٣ كيلو وولدت في الاسبوع ٣٧ و ٥ أيام
والحين ولدي نتفه خخخخخ كل التفاخ راح ومعه صفار والجلكوز مقطوع من الصيدليات موجود بس في المستشفيات وولادتي كانت في مدينة الملك فهد الطبيه عنايتهم حلوه بس البيبي يكون عندك وإنتي اللي تسوين له كل شيء وممنوع الرضعات الصناعية وفيه عيب أنهم مايطعمون البيبي اول مايولد تطعيمه الدرن والالتهاب الكبدي يطعمونه اليوم الثاني العصر تعبت مع ولدي وطلعت ١٠ باليل لانه في تحليل يأخذونه من البيبي بعد ولادته ب ٢٤ ساعه عن الوراثة مدري ايش ويطلع بعد اسبوع انتهى ♥♥
طولت عليكم صحح خخخخخخخ

الحمد الله على سلامتگ يـِْ♡̨ـِْا رب
ۆ اللَّ? عشت معگ وحسيت بكل الي حسيتي فيه
يـِْ♡̨ـِْا قَلبـ♡ــي? انتي
اان شاء الله تكفير ذنوب
ًواهم شي صحتگ وصحت البيبي
وربي يهون علينا يـِْ♡̨ـِْا رب

الحمد لله على سلامتك ام غلا يالله الله ياجرك الصراحة قريت قصتك على هالصبح وجاني رعب
يالله تساهليك ياكريم

صباح الخير كروشات

مبرووووووك اللي ولدو عقبالنا يارب بولادات سهله ميسره..


معايا مغض وغثيان :(


الله يكتبلنا الأجر ويعوضنا خير في اطفالنا يارب العالمين

لقيت ورد الولاده وجالسه احاول انزله 

الله يسعد كل من ردت عليا يارب ويسهلها ولادتها ويسخر لها زوجها
ومبروك للي وولدو