ألــــــــــــــــم

السلام عليكم ورحمة الله


جاية أبي أفضفض حاسة إني محرووووووقة وهم بقلبي كسر ضلوعي، فيه تفاصيل قديمة ماأبي أدخل فيها وبتكلم عن وضعي الحالي






أبي اسأل




عاااااادي إن الرجال يسهر يومياً برا بيته في إستراحة لحد 12 أو 1
ومن يأذن العشاء وهو كنه مقروص يقوم يتوضئ ويروح يصلي بالطريق وهو رايح لها مع أنها تبعد 5 دقايق بس

وأحياناً يطقها بالوجه يطلع عقب المغرب وإن صبر إلى نصف المغرب...

غير هذا كل آخر أسبوع يتواعد ويا أخوانه أو ربعه وينام برا البيت وصارت عادة وعذره تغيير جو عقب كرف الشغل والبيت والعيال



مع العلم الرجال متأكدة موب متزوج ( والله أعلم)
والرجال مصلي مسمي ( بس صارت مراهقة الرجال مايحكمها لادين ولا عقل)
وفي آخر الأربعين من عمره
ولا يطلع إلا وهو شايف حاجتنا ونومه برا لو كان عندي عزيمة أو مناسبة يقعد عشاني





له سوابق أكتشفتها من زمان بس إكتشافي مبهم مافيه تأكيد ولا صارحته وهو عرف بس ماتكلمنا في هالشي
بس ماعاد ودي أحرق قلبي في تفكيري هذا خاصة إني حلفته بطلاقي لو كان له علاقات وحلف ولا أظن الحلف بالطلاق لعب لأن فيه تحريم عليه لو حالف بربي بيطلع عن حلفه كفارة

اللي قهرني إنه دووم يكرر على مسمعي وش همك! مرووقة وكل شي متوفر لك ومدلعك
مايدري جرح القلب وش يسوي فيني وكيف كل ثانية يعذبني
مادرى إني لايهناني نوم ولا ضحك كل ماذكرت سالفة شفتها
مادرى إن حرقة قلبي وصدمتي فيه أقضت مضجعي
مادرى إن تفكيري اللي مالقى جواب خلاني مسبهه لاني طايلة سماء ولا أرض

غير هذا الرجال نفسياً تعبااااان وأنا عاذرته وعارفة ظروفه
وإن تعبه أثر على نفسيته وصرت وياه مثل الأخوان يعني ماأذكر متى أخر مرة جامعني

مع إني في عمر قمة الأنوثة والنضج وأحتاج للشي هذا بس مو محصلته
وصعب أضغط عليه فيه يأثر عليه ويكرهني لأني واثقة موب بيده
وقاعده بمسمى زوجة

زوجي يحبني ومو مقصر علي مادياً ويحترمني بس السوالف اللي قلت
أفقدتني لذة كل شي

لاتقولون قولي له إن هالشي يضايقك ويزعلك

ياما قلت ماأحصل غير التهم وكلام يجرح
أو يقعد من غير نفس وتتغير معاملته ويحاول يأدبني بالضغط على أعصابي

يستحيل يحس بخطئة أو يحس بألمي وحاجتي

باقي أقول صرت الفترة الأخيرة من مشاكلنا واللي أشوفه ،هااادية ومعطيته جوه ومهدية جو البيت والأولاد قد ماأقدر

أحاول إني أكون هادية أو مبتسمة وسوالف بسيطة ماتقلقه أو تثيره بطلت جدال وقول الحق عشان أشوف وين الخلل فيه يمكن يرتاح ويتغير

لقيت والله إن هذا طبع فيه وإني مالي دخل

أنا متجددة ومتعطرة ومرتبة ومدلعته كل كلامي معه ذووق وأدب وطيب،وجميلة مافيني عيب وهو دايم يقول مرتاح ومافيك شي وتعجبيني وماليه عيني


بس أبليس الله يلعنه يلعب بعقلي ويوسوس بي،وصايرة خلاص ماأتحمل تعبت وفاضت بي ومليت مليت

حاولت أختصر مشكلتي قد مأأقدر بس تكفون ماأبي ناس توسوس بي،ترى أبليس مكفي وموفي أبي ناس تريحني

كل شي سويته عرفت نمطه وعرفت وش يحب وش يكره وتجاوت أخطاء كثيرة بس مو محصلة رجال يشبعني عاطفياً ويرضيني،أنا إنسانة قنوعة لو يقول كلمة وحده حلوة نسيت كل شي

شلون أثق فيه وأريح قلبي شلوووووووووووووووووون:(