أمانة عليكم.... ساعدوا صديقتي بأراءكم.. الله يوفقكم اجمعين ويبعد عنكم كل مكروه

السلام عليكم و رحمة الله وبركاته

صديقتي اتعاني من مشكلة منغصة عليها حياتها تقدرون اتقولون انها ازلية بس نفسيتها صدق تعبت من هاذي المشكلة وطلبت مني اشوف اراء البنات عشان يمكن هاذا الشي ايريحها ولو بنسبة بسيط

المشكلة تكمن في اب طووووووووووووووووول عمره كان مدمن خمر وحريم
والام طووووووول عمرها تقريبا مريضة بسبب الاب و تعاني من مرض نفسي
( الاكتئاب)
فطبيعي بسبب هاي الحياة البنت واخوانها كانو طول عمرهم يعانون معانة ما يعلم فيها غير رب العالمين..

ويوم كانت البنت في سن المراهقة وتصير بينها وبين امها مشاكل مثل المشاكل اللي تصير بين الامهات و بناتهن عادة في هاذا السن كانت تسمع كل حد يقول لها لا تعذبون امكم يكفيها اللي فيها.. والام ساعات تقول للبنات انتو وابوكم سبب عذابي…..ويوم تروح تنام الام تروح تنام مع اخوانهم في نفس الغرفة وتقول للبنات اذا صارت بينهم مشاكل انتوا مب عيالي هاذيلا عيالي

هذي الحياة وهذا الكلام وحدة سبب في تدمير نفسيات توها طالعة للدنيا ومالها ذنب في كل اللي يستوي.. وتعيش مع ام واب غير طبيعين بالمرة.. لان الام منعزلة ما تحب تحتلط بالناس وما تعرف شي ععن الحياة الاجتماعية وغيرها و دايما مادة بوزها نادرا ما تضحك الا اذا تبي تتمسخر..

اما البنات فدخولهن الجامهة خلاهن يختلطن بالناس تبرز شخصياتهن و يحبن الحياة

بعد ما كبرن و تزوجن صارت مشكلة ويا كثر المشاكل في حياتهن ..

فا كان من صولات و جولات الاب ان تعرف على مغربية سلبته ثلاثة ارباع امواله

الام بغت تتخبل مع ان هاذي مب اول مرة تصير بس لان المال اللي انسلب كااان وايد

قالت للبنات انتوا مستعدين ترفعون على ابوكم قضية حجر

قالو اللي تبغينه انشالله بنسوية لان في مصلحة لج ولاخوانا احنا تزوجنا بس انتوا اللي منتضررين اكثر منا. مع ان المشاكل الاسرية لو كانت البنت متزوجة تلحقها وتنغص عليها حياتها لانهم اهله في نهاية المطاف.. وطبعا البنات كانت دايما تراودهم هاذي الفكرة بس كانوا مستحيييل ايسوونها الا بتشجيع من حد كبير لانهم اصلن بعدهم صغار و مستحيل تييهم هاي الجرأة بس الحياة اللي عاشوها تخليهم يفكرون بعدة طرق و الام طلبت منهم هاذا الشي فكانوا اكيد بيسووونه عشانها رغم كل شي.. بس طلبت منهم بعد ان يخلونها برع الصورة تماما ولا يذكرون اسمها في المحكمة على اساس انها هي اللي قالت او أي شي يعني ما يقولون انها صاحبت الفكرة و بتسوي عمرها تسمع الخبر مثل غيرها لانها تخاف موووت من الاب.. وكان عادي عندهم.. ملييون مرة غيرت رايها خلال هاي الفترة بس هم اصروا ينفذون هاذا الشي لان قالوا يمكن المحكمة تاخذ للام وللأخوان وللبنات حقهم المسلوب من هاذا الاب طول عمرهم

المهم
راحوا المحكمة.. حاولوا يرفعون القضية بس انذلوا من القضاة لانهم كانوا يعرفون الاب فهو شخصية معروفة ومن اثرياء المنطقة.. فحسوا بالضعف وقالوا خلاص مستحيل يصير شي

فرجعوا بخفي حنين ما نابهم غير الذل والمهانة في مكان اول مرة يدخلونه وفكروا انه ممكن ينقذهم من حياة اسرية مفككة

المهم الام الله يسامحها في الفترة اللي راحوا البنات المحكمة راحت لاخوانهم ( اصغر منهم) قالت شفتوا خواتكم شو راحوا ايسوون يبون يطلعونا من البيت.. وشحذت الاخوان على البنات فقطعوا علاقتهم مع خواتهم شهرين ثلاث

و بعد هاي الفترة راحت وحدة من الخوات البيت عشان تعرف ليش اخوانها جذي يتصرفون وعرفت بالمؤامرة اللي سوتها الام انصدمت كشفت لاخوانها عن الحقيقة و فضحت الام ( الام تفرح اذا صارت مشاكل بين الاخوان و فرقت بينهم)

(خلا فترة المحكمة كانت الام كاتبة رسالة بخط ايدها توصف حياتها بشكل موجز وطلبت من بنت من البنات تبعثها لمحامي تشوف رايه ا لبنات انصمدوا بكلامها في الرسالة لان كان في وقائع تكشف اسرار من حياتهم ما كانوا يعرفونها..)

قرروا يخلون نسخة عندهم..

كانت الام مستميتة تحصل على الرسالة عطوها وكانت خايفة تكون في نسخ قالولها ما في.. بعدين اكتشفت ان في ..
كانت تصرفاته مع بناتها جدا فظيعة من ناحية الاسلوب .. بس هاذي الرسالة سبحان الله كشفت الام للاخوان بعد مع شحنتهم على خواتهم

المهم الزبدة

الاخوان عرفوا الام على حقيقتها.. دايما تبين نفسها مظلومة.. والناس ظالمينه وتردد عبارات مثل انا قلبي على ابني انفطر و قلب ابني علي حجر و غيرها. واصلن هم ما كاموا مرتاحين بدون خواتهم فهم اللي يجلبون البهجة للبيت بدونهم كل واحد في غرفته مافي كلام ما يلتقون في أي وجبة و جو نكد

بس البنت تقول.. انه تخاف الله دايما عشان جذي دايما تحاول تكون زينة مع الام وتحاول قدر الامكان تبتعد عن المشاكل بس الام لها اسلوب ينكد ويصنع المشاكل بشكل فظيييع.. وهي متزوجة واهل زوجها ما يعرفون أي شي عن مشاكلها و هي ما تبغي اتبين طبعا عشان تكن قوية جدامهم.. وعلى هل الاساس لازم تزور اهللها و تبات عندهم احيانا عشان محد يكشف المشاكل

تتعب لازارتهم ما في حياة..نكد في نكد ...والام كالعادة تثير المشاكل احيانا اطنش واحيانا ترد.. و المشكلة اللي صارت قبل خلقت جدار بينها و بين امها ودايما تدعي ان الله ايهد هاذ الجدار.. تقول كنت دايما ابغي احس ان عندي ام عقلها كبير ألجأ لها وقت الشدة اشاورها في اموري.. وكانت تسوي هاذا الشي اول حياتها على الرغم من طبايع امها فهي متقلبة بس يوم اكتشفت ان امها ناوية اتخرب بيتها وقفت وقامت ما تتكلم عن كثير من الاشياء جدامها

تقول احنا قوانينا تنصف الاباء على الابناء عكس امريكا مثلا ينصفون الابناء على الاباء..

المفروض القوانين تدرس الحالة قبل لا تقرر منو تنصف

هاي قصتها باختصاااار مشاكل اسرية ام واب بس للاسف كأنهم مب موجودين لانهم ما يأدون دورهم الصحيح.. بس تحمد الله

شو رايكم؟

كيف تتعامل مع امها؟؟ مهما كان الانسان كبير يحس دايما انه نفسه يكون عنده ام على الرغم من كل شي.. ويوم تشوف الناس اللي حولها علاقاتهم زينة مع اهلهم وخاصة امهاتهم يحز في خاطرها لانها مب قادرة تحقق هاذا الشي.. الصراحة هاذا شي مب بيدها لان الام مريضة نفسيا وتاخذ ادوية من سنين طويلة.. وكل يوم بحال..احيانا تحس انه ما في مشاعر تجاها اصلن واحيانا نفسها تقول لا اكيد في مشاعر بس المشاكل اللي تسويها الام تدمر هاذي المشاعر... ودايما تقول أي شخص بيسمع القصة من الام بيقول انه هم اللي يظلمونها مع ان الحقيقة العكس لان الام عندها اسلوب في نسج القصص و كسب تأييد الناس.. لانها متعلمة وتيب عبارات من الكتب وايييد.


خواتي


عطونا رايكم عشان نريحها باللي نقدر عليه.....


وسلمتم