السلام عليكم جميعا..
من ثلاث ايام كنت أقرا موضوع في منتدى الديكور لوحدة من الخوات..ومر علي توقيع أختنا (الغلا)..وكاتبه فيه ادعو لولدي ان الله يشفيه وينطق لسانه..
الصراحة عوّرني قلبي عليها..ودعيت لها من قلبي..وكمّلت التصفح عادي..
وقبل أمس تعب ولدي مررررررة,,وهو عنده حساسية بالصدر
,,يعني من يوم يتعب لازم الفنتولين وجهاز البخار جنبي..الله يشفيه وكل مرضى المسلمين..
مو هاذي السالفة..
السالفة إني يوم جا الليل أخذت فراشي ورحت غرفة ولدي أبو 3 سنين, وفرشت بالأرض ونمت ونومته جنبي..وكان صوت صفير صدره يسمعه اللي واقف برا الغرفة..ويتقلب ومنكتم حيــــــــــــل يا بعد تسبدي..
يومنّه هدأ شوي..جا على بالي توقيع الغلا,, وقلت في نفسي: الحمدلله على كل حال..يمكن ولدي أحسن من ولدها حال..وقعدت أدعي له هو وولدي مع إني ما أعرفها أبدا..وأول مرة أشوف توقيعها أمس..
المهم..غفت عيني يمكن نصف ساعة..بعدها قمت مفزووووعة على كحة ولدي,,ماعمري شفته يكح كذا..قلت خلاص بتطلع روحه بسم الله عليه..وكحة متوصلة دقيقتين تقريبا..بعدها استفرغ بلغم -كرمكم الله- يمكن بحجم الليمونة..
قطعة كبيرة كذا زي الجيلاتين..وعطس عطسة طلع كل اللي بأنفه..ومسحته ونظفته..وبعدها نام نومة هنيّة لين الصبح..لدرجة اني تحسفت أقومه لجلسة البخار...
وتعجبت بشكل ما تتخيلونه!! العادة ولدي إذا تعب لازم أول ثلاث أيام يصير زي الخرقة على قولتهم..ما يتحرك ولا يتكلم وبس يصيح وعيونه تدمع ومنكتم مرة..
وهالمرة من أول ليلة خف وقلت أعراض التعب لأكثر من النصف..
وما جا ببالي إلا الأخت الغلا..يمكن لأني دعيت لولدها كافأني ربي بإنه خفف عن ولدي؟
يمكن يوم دعيت لها رددو الملائكة (ولكِ بالمثل)..
أكثروا من الدعاء لأنفسكم, وللمسلمين,اللي تعرفونهم واللي ماتعرفونهم..وسبحان الله كيف يوصلك أجر الصنيع الحسن ولو بعد حين..
وادعو لي أنا بعد :)
ياقلبيه بس
الله يجزاك خير على دعوتك
و يحفظلك ولدك ... ويشفى ولد الغلا
اللهم امين