أمـــي الله يهديهــا طفشــت شغالتـــي,,وأنــا علــى وشــك ولاده وصحتـــي متدهــوره!!

السلام عليكم ورحمة الله وبركاته
يابنات أطلب منكم توجيهي
أنا متزوجه بالرياض وأهلي بالشرقيه وماأنزل ألا كل شهر ونص أو شهرين وأجلس عندهم أسبوع
حنا ٩بنات وولدين وأنا الكبيره
المتزوجين أنا وأختي والولدين
أبوي متزوج ثنتين غير أمي وماأكذب أنه مقصر وظالم أمي
رغم أنه رجال ملتزم ومصلي وانا المقربه منه..
حاليآ أنا حامل بالشهر السابع وعندي ولد عمره سنه وسبعة أشهر جبته بعمليه قيصريه ومن بعدها تعبت كثير جاني نقص كالسيوم وهشاشه بالعظام
حتى وأنا أمشي فقرات ظهري تطقطق يديني أحسها متفككه
ماأقدر أشيل شي لكني أضغط على نفسي وتطلع الأوجاع لما أنسدح
غير الربو المزمن اللي أعانيه وانخفاض بالضغط..
وبما أن حوضي صغير تقرر ولادتي قيصريه وفي بداية حملي كان معي نزيف إلى الشهر الرابع جاب لي زوجي خادمه بالإعاره من مكتب شئون الخادمات لأني تعبت من الثقل والبيت يبيله تنظيف
والرجال يبي غداء والولد يبي له عنايه من ترويش وتغيير حفاظات وتحضير الحليب وترتيب البيت من حوسته
كانت أتفاقيتنا مع الخادمه أنها تبقى الى رمضان ومن شروط المكتب ان رجوعها يكون مع ثمن التذكره..
تعرفون التربيه صعبه جدااا فما بالكم برعاية أثنين صغار خاصه أني حريصه بالنظافه والتنظيم
مشكلتي:أمي الله يهديها مثلها مثل أي أم
فيها العصبيه والهدوء وفيها القسوه والحنيه
لكنها تبالغ ببعض التصرفات وتقول أشياء ماهي منطقيه بتاتآ مثلا قبل زواجي:
بما ان أبوي يعتبرني المقربه منه فكانت تهدد تقول زعلي ورضاي إذا جاء جلس يسولف معك أتركيه وقومي عنه
وتقول أن سلمتي عليه بدعي عليك في صلاتي وأقولها مثل ماأنتي أمي هو أبوي
ترضين يقولي لاتكلمين أمك ولا تسلمين عليها تعصب وتقول هذا اللي ناقص رغم أنها تجلس وتسولف معه.
وبعد زواجنا:هي تشوف النقص وتبي النسيب يغطيه رغم ان زوجي وزوج أختي مجرد ينزلوننا ويرجعون مايجلسون..
وأخواني اللي يجون ويشاركونهم بالاكل تراعيهم ولاتطلبهم وترحمهم..
وطبعا أزواجنا مانوضح لهم ظروف حياة اهلنا ماندري عن الدنيا مانبي الرجال بكره يذلنا..
مثلا تقولي:أطلبي من زوجك يتسلف مبلغ وعطينا وياليتها تطلب الشي البسيط..بالله هذا منطق وكلام ناس عقال..
ورغم أني مستحيل أدخل ألا بفاكهه أو خضره أو حلويات وشوكولاته..وعذري عند زوجي صعبه بجلس بآكل وأشرب من غير ماأشارك بشي..
وأعطيها من مصروفي اللي يعطني..وأختي تعطيها من مصروفها..ونعطي خواتي اللي نقدر عليه..
حتى تحب ولد أخوي وتميزه عن ولدي..وأقول عادي..اذا تفرق بيننا حنا عيالها ماتفرق بين أحفادها..
اذا أعطاني300 أعطيها250 وأخلي ال50 عصير وشيبس للصغير..
واذا جاء ولد أخوي قالت هاتوا له عصير وتعطيه حليب من ولدي وأمي لو تتكلمين معها بتاخذها زعله وبتسب وأنتوا فيكم وفيكم..وحنا متعودين نشتري مقاضي الشهر كامله من الصيدليه حليب وحفائظ
وشامبوهات خاصه للاطفال وكريمات..عشان مانتورط
واذا جات تروشه من شامبو ولدي حتى أنها تاخذ من شنطة ملابس ولدي من غير استئذان ويروح فيها وأستحي أقول هاتوها..وأقول فدووه وش أسوي..والله ماديتنا وسط لكننا منظمين ومرتبين وأحيان
يجي آخر الشهر وهو مفلس فيضطر يأخذ 200 أو300 من أخوياه..
عكس أخوي لعاب..
ولما اسأل خواتي كيف تروشونه لو ماكان شامبو ولدي هنا يقولون من اللي نستخدمه..المعنى أنها تستغل وجودنا في تصريف الولد رغم أنهم يجيبون معه شنطه فيها حليب وحفائظ فقط..لاعصير لاشيبس
لاملابس أحتياطيه..
برايكم لو خلص حليبه أو حفايظه من بطلب أكيد زوجي ..وش عذري وهو يعرف ان اللي نشتريه يغطي لامحاله..حتى ان ال50 اعرف انها ماراح تكفي طالما أصرفها على أثنين أقوم بدل ماأشربه باليوم
اربعه أعطيه بس أثنين عشان أمشي الوضع..
والله أستخدم له من رجعنا شامبو صانسيلك وماقلت لأبوه يجيب لانه بيسأل كيف خلص؟؟والله الولد فيه أكزيما وجسمه حساس لكن الشكوى لله..كل هذا في صوب ممكن الواحد يتصرف الى ان الله يحلها
لكن في حالة الخدامه اللي بيدفع فيها دم قلبه عشان يريحني..
الزبـــــــــــده:
الخدامه نزلت فيها مرتين وبعد مارجعنا قالت مدام خلاص انا أبي أروح مكتب أنا ماأقدر أشتغل هنا وعند جده..ووديناها
أبوي كان يجيب لها خدامات قبل زواجه ولا وحده جلست عندنا سنتين ولا حتى سنه..
والسبب أمي تعاملها قاسي حبتين تكرفهم كرف الشر..من يقومون الفجر الى الساعه1بالليل..
ومايتروشون الا بأذن ولايأكلون الا بأذن والله يهديها تقومهم من النوم وحتى أنها تضربهم..
والله أني كنت أرحمهم وماأطلب منهم شي..
اللحين مع خدامتي تعرفون حنا المبتدئين بيوتنا عباره عن شقق صغيره.. يعني ماعندهم شغل هاك الزود..
مجرد تمسيح وغسل ملابس وطبخ ومن بعد الغداء ماعندها شي تروح ترتاح والمغرب تزين القهوه والشاي فقط لاغير..
وأمي الله يصلحها لما ننزل تكرفها تنزل المراوح وتغسل السجاد وتغسل الجدار وتغسل البطانيات في البانيو..والله ماتخليها تغسل بالغساله تخاف تخربها تغسل ملابسي وملابس ولدي بيدها..
يعني تلاحظ الفرق بين شقتنا وبيت أهلي فطبيعي تتذمر..وزياده على كذا تتزعل منها وتقول لها أنا جاووني شغالات ومافيهم وحده تقول لا..وخدامتي كل كلمه تعرفها وماتحب أحد يقارنها بالغير,,
كل مطلوبي أبيها تداريها عشاني وضعي مايسمح أقوم بالشغل لحالي..أنا عادي عندي تشتغل ومن حقها تآمرها لكن بأسلوب وبرحمه..ماأحب أنها تزعل مني عشان كذا أكون ساكته وبس ودي أرجع بيتي
وأنا في الاساس أكون متشفقه على النزول والوناسه مع خواتي..
المفروض تراعي أنها خادمه شخص هو اللي يدفع لها الراتب..
انا ماانكر فضلها بعد الله وحبها لي ولولدي لكنها بأي نقاش هي الصح ولابد لكلمتها أن تكون مطاعه مهما كان عظمة الغلط وألا بنكون عاصيين بنظرها وعاقين..
وكلي حيره ودي أستقدم شغاله وتعرفون لابد 10,000 ريال وغير الراتب..
خوفي بكره ننزل وتطفش من أسلوب أمي وتقول أبي أسافر أو تهرب.. وحنا في النهايه اللي خسرانين..ووقتها وش اقول للرجال وين أودي وجهي منه..وهو جايبها عشان راحتي..
لدرجة أني أقول ماله داعي أجيب خدامه وبضغط على نفسي بالشغل كله خوف من أمي..وفي نفس الوقت أعرف ماعندي مقدره على تحمل العبء والشغل في بيتي..كل أنسان له طاقه معينه..
وش رأيكـــــم/أجيب خدامه وألا ماأجيب؟؟
واذا جبت كيف أفهم أمي تراعي الفرق بين البيتين عشان تستمر معي الخدامه لأن الفلوس من تعب الرجال طول النهار ماحنا لاقيينها بالشارع..؟؟
واذا ماجبت بأكل تبن وأنتوا بكرامه؟؟
والله نفسيتي تعبانه من التعب الجسدي اللي أحسه,,ولما أنسدح بس افكر وش أسوي ويجي الصباح وقت دوام زوجي وعيوني مبققه مابعد نمت..
ياأرحم الراحمين أرحمني..